ভাৰতৰ প্ৰতিটো শিশু, প্ৰতিগৰাকী কন্যা, প্ৰতিজন যুৱকৰ বাবে আছিল এই সপোন… পুত্ৰৰ মৃত্যুৰ পাছতেই সম্পদৰ ৭৫ শতাংশ দান কৰিলে বেদান্ত গ্ৰুপৰ চেয়াৰমেনে

বিলিয়নাৰ উদ্যোগীগৰাকীয়ে কয় যে তেওঁৰ প্ৰয়াত সন্তান অগ্নিয়ে এক আত্মনিৰ্ভৰশীল ভাৰত গঢ়াৰ বাবে বহু সপোন দেখিছিল৷ অগ্নিয়ে প্ৰায়েই পিতৃক কৈছিল, ‘দেউতা এটা জাতি হিচাপে আমাৰ একোৰেই অভাৱ নাই৷ তাৰপিছতো আমি কিয় পিছুৱাই আছো? মই সপোন দেখো দেউতা, কোনো শিশুৱেই যেন ক্ষুধাৰ্ত নাথাকে, কোনো শিশুৱেই যেন শিক্ষাৰ পৰা বঞ্চিত নহয়, প্ৰতিগৰাকী নাৰীয়েই যেন নিজৰ ভৰি নিজে থিয় হ’ব পাৰে৷ প্ৰতিজন ভাৰতীয় তৰুণেই যেন অৰ্থপূৰ্ণ কাম পায়৷’ অগ্নিক তেতিয়া পিতৃয়ে প্ৰতিশ্ৰুতি দিছিল যে তেওঁলোকে যি উপাৰ্জন কৰিব তাৰ ৭৫শতাংশতকৈ বেছি সমাজকেই উভতাই দিব৷

১৯৭৬ চনৰ ৩জুনত পাটনাত জন্ম হৈছিল অগ্নিবেশৰ৷ আজমেৰৰ মেয়ো কলেজত পঢ়াশুনা কৰি পৰবৰ্তীকালত এক ভাল পেছাগত জীৱনো তেওঁ গঢ়ি তোলে৷ তেওঁ ফুজাইৰাহ গোল্ড প্ৰতিষ্ঠাত গুৰুত্বপূৰ্ণ ভূমিকা পালন কৰে আৰু পাছলৈ হিন্দুস্থান জিংকৰ চেয়াৰমেন হিচাপে দায়িত্ব পালন কৰি বিশ্বব্যাপী ব্যৱসায়িক মহলত সন্মান অৰ্জন কৰে৷ বেদান্ত গ্ৰুপৰ চেয়াৰমেন তথা অগ্নিৰ পিতৃয়ে কৈছে, ‘এই ক্ষতিত এটা পৰিয়াল বিধ্বস্ত৷ মোৰ পত্নী কিৰণ আৰু মই ভাঙি পৰিছো৷ অগ্নিবেশ মোৰ সকলোতকৈ বিশ্বস্ত বন্ধুও আছিল৷’

উল্লেখ্য যে প্ৰধানমন্ত্ৰী নৰেন্দ্ৰ মোদীয়েও এগৰাকী যুৱ উদ্যোগীৰ মৃত্যুত শোকপ্ৰকাশ কৰিছে৷ প্ৰধানমন্ত্ৰী মোদীয়ে লিখিছে, ‘শ্ৰী অগ্নিবেশ আগৰৱালৰ অকালপ্ৰয়াণ অত্যন্ত বেদনাদায়ক আৰু শোকাৱহ৷ প্ৰাৰ্থনা কৰিছো আপোনাৰ পৰিয়ালে যেন শক্তি আৰু সাহস ধৰি ৰাখিব পাৰে৷ ওম শান্তি৷’