Appleত প্ৰায় ১৫ বছৰ ধৰি গুৰুত্বপূৰ্ণ ভূমিকা পালন কৰাৰ পিছত টিম কুকে CEO পদৰ পৰা অৱসৰ গ্ৰহণ কৰিছে। ২০১১ চনৰ আগষ্ট মাহত তেওঁ Appleৰ মুখ্য কাৰ্যবাহী বিষয়া হিচাপে দায়িত্ব গ্ৰহণ কৰিছিল। তেওঁৰ নেতৃত্বত Apple-এ প্ৰযুক্তিৰ জগতত নিজৰ স্থান আৰু অধিক শক্তিশালী কৰিবলৈ সক্ষম হয়। টিম কুকক আজি বিশ্বৰ অন্যতম সফল ব্যৱসায়িক নেতা হিচাপে গণ্য কৰা হয়। কিন্তু তেওঁৰ সফলতাৰ আঁৰত থকা সংগ্ৰামৰ কাহিনী বহু লোকেই নাজানে। Appleৰ CEO হোৱাৰ বহু বছৰ আগতেই তেওঁ নিজৰ ভৰিত থিয় হ’বলৈ আৰম্ভ কৰিছিল। আনকি মাত্ৰ ১১ বছৰ বয়সতে ধন উপাৰ্জন কৰিবলৈ কাম আৰম্ভ কৰিছিল টিম কুকে।
১৯৬০ চনত আমেৰিকাৰ আলাবামাত জন্মগ্ৰহণ কৰা টিম কুকে সৰুতেই কামৰ সৈতে পৰিচিত হৈছিল। প্ৰায় ১১ বছৰ বয়সত তেওঁ স্থানীয় বাতৰি কাকত ঘৰে ঘৰে বিলোৱাৰ কাম আৰম্ভ কৰে। তেওঁ ‘Press-Register’ নামৰ স্থানীয় বাতৰি কাকত চাইকেলেৰে ঘৰে ঘৰে বিলাইছিল। কামটোৰ বাবে তেওঁ অতি পুৱাই উঠিব লাগিছিল। সেই সময়ত তেওঁৰ দিনটো আৰম্ভ হৈছিল পুৱা ৩ বজাতে। এটা প’ডকাষ্টত টিম কুকে কৈছিল যে তেওঁৰ বাতৰি কাকত বিতৰণ কৰা অঞ্চলটো যথেষ্ট ডাঙৰ আছিল আৰু সেয়ে তেওঁ চাইকেল ব্যৱহাৰ কৰিছিল। শৈশৱতে আৰম্ভ হোৱা সোনকালে উঠাৰ এই অভ্যাস তেওঁৰ জীৱনৰ এটা অংশ হৈ পৰিছিল। পিছলৈ Appleৰ CEO হোৱাৰ পাছতো তেওঁ অতি পুৱাই উঠি ই-মেইল আৰু বাৰ্তা পঢ়াৰ অভ্যাস অব্যাহত ৰাখিছিল।
টিম কুকৰ কৰ্মজীৱন কেৱল বাতৰি কাকত বিলোৱাতে সীমাবদ্ধ নাছিল। প্ৰায় ১৪ বছৰ বয়সতে তেওঁ এখন ফাষ্ট-ফুড ৰেষ্টুৰেণ্টতো কাম কৰিছিল বুলি বিভিন্ন প্ৰতিবেদনত উল্লেখ কৰা হৈছে। ইয়াৰ পিছত তেওঁ কাগজ কল আৰু এলুমিনিয়াম প্লাণ্টতো কাম কৰে। এই অভিজ্ঞতাবোৰে পৰৱৰ্তী সময়ত তেওঁৰ ব্যৱসায়িক জীৱনত যথেষ্ট সহায় কৰিছিল। বিশেষকৈ কাগজ কল আৰু উদ্যোগত কাম কৰাৰ ফলত তেওঁ উৎপাদন, পৰিচালনা আৰু যোগান শৃংখল (Supply Chain) সম্পৰ্কে বাস্তৱ অভিজ্ঞতা লাভ কৰিছিল। এই অভিজ্ঞতাই এপলত তেওঁক সহায় কৰিছিল
টিম কুকে পিছলৈ ঔদ্যোগিক অভিযান্ত্ৰিকী অধ্যয়ন কৰে। তাৰ পিছত IBM আৰু Compaqৰ দৰে ডাঙৰ প্ৰযুক্তি কোম্পানীত কাম কৰি অভিজ্ঞতা আহৰণ কৰে। ১৯৯৮ চনত তেওঁ এপলত যোগদান কৰে। সেই সময়ত এপল বহু প্ৰত্যাহ্বানৰ সন্মুখীন হৈছিল। টিম কুকৰ উৎপাদন আৰু যোগান শৃংখল সম্পৰ্কীয় অভিজ্ঞতা কোম্পানীটোৰ বাবে বিশেষভাৱে উপযোগী হৈছিল। তেওঁ কোম্পানীটোৰ যোগান ব্যৱস্থা অধিক দক্ষ কৰাৰ ক্ষেত্ৰত গুৰুত্বপূৰ্ণ ভূমিকা পালন কৰে। পৰৱৰ্তী সময়ত এপলৰ ভিতৰত তেওঁৰ দায়িত্ব ক্ৰমাৎ বৃদ্ধি পাই যায় আৰু অৱশেষত ২০১১ চনত তেওঁ ষ্টিভ জবছৰ পিছত CEOৰ দায়িত্ব গ্ৰহণ কৰে।
CEO হিচাপে টিম কুকৰ প্ৰায় ১৫ বছৰীয়া যাত্ৰাৰ এতিয়া অন্ত পৰিছে। বিদায়ৰ সময়ত তেওঁ এপলৰ কৰ্মচাৰীসকললৈ এখন আৱেগিক চিঠি লিখি নিজৰ অনুভূতি প্ৰকাশ কৰে। চিঠিখনত তেওঁ কয় যে এপলৰ CEO হিচাপে শেষ দিনটো আহিব বুলি তেওঁ সদায় জানিছিল যদিও সেই মুহূৰ্তটো বাস্তৱত উপস্থিত হোৱাটো তেওঁৰ বাবে বিশ্বাস কৰিবলৈ কঠিন। এপলৰ কৰ্মচাৰীসকলৰ প্ৰতি গভীৰ কৃতজ্ঞতা প্ৰকাশ কৰি কুকে কয় যে তেওঁৰ সফলতাৰ আঁৰত কোম্পানীটোৰ অসাধাৰণ দলটোৰ গুৰুত্বপূৰ্ণ অৱদান আছে। তেওঁৰ মতে, এপলৰ শক্তি কেৱল ইয়াৰ সামগ্ৰী বা ব্যৱসায়িক সফলতাত নহয়, কোম্পানীটোৰ সংস্কৃতি আৰু ইয়াত কাম কৰা মানুহৰ মাজতো নিহিত হৈ আছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
