অহা বহাগৰ পূৰ্বে ৰাজ্যত হাজাৰ হাজাৰ নিবনুৱাই লাভ কৰিব চৰকাৰী চাকৰি। এই কথা ঘোষণা কৰি ৰাজ্যৰ মুখ্যমন্ত্ৰী হিমন্ত বিশ্ব শৰ্মাই। কালি ৮ জুলাই তাৰিখে নিশা সামাজিক মাধ্যম ফেচবুক যোগে সদৰি কৰিলে এই কথা। লগতে সদৰি কৰিলে পৰীক্ষাৰ তাৰিখ।
কেতিয়াকৈ অনুষ্ঠিত হব তৃতীয় বৰ্গ, চতুৰ্থ বৰ্গ, শিক্ষক আৰু অসম আৰক্ষীৰ পৰীক্ষা সকলো তাৰিখ ঘোষণা কৰিলে মুখ্যমন্ত্ৰী হিমন্ত বিশ্ব শৰ্মাই। অহা ছেপ্টেম্বৰ মাহৰ পৰা অনুষ্ঠিত হব পৰীক্ষা আৰু বহাগ বিহুৰ পূৰ্বে সকলোৱে লাভ কৰিব নিযুক্তি পত্ৰ।
ঘোষণা কৰা অনুসৰি, ADRE 2024 – Assam Direct Recruitmentৰ তৃতীয় বৰ্গ তথা গ্ৰেড ৩ৰ পৰীক্ষা ১৫, ২২ আৰু ২৯ ছেপ্তেম্বৰত অনুষ্ঠিত হব। এইবাৰ পৰীক্ষা লোকসেৱা আয়োগৰ পৰীক্ষাৰ আৰ্হিত অনুষ্ঠিত হব। প্ৰথমে প্ৰিলিমছ, তাৰ পাছত মেইনছ আৰু শেষত ভাইভা প্ৰক্ৰিয়া।
চতুৰ্থ বৰ্গ তথা গ্ৰেড ৪ৰ বাবেও একেই ব্যৱস্থাৰে পৰীক্ষা হব। প্ৰথমে প্ৰিলিমছ, তাৰ পাছত মেইনছ আৰু শেষত ভাইভা। ২০ আৰু ২৭ ছেপ্টেম্বৰত অনুষ্ঠিত হ’ব পৰীক্ষা। গ্ৰেড ৩ৰ বাবে খালী হৈ আছে প্ৰায় ৭৫০০ পোষ্ট, গ্ৰেড৪ত খালী হৈ আছে ৪৫০০ৰো অধিক পোষ্ট। বিহুৰ পূৰ্বে সকলো খালী পদ পূৰ হব।
প্ৰাথমিক শিক্ষা বিভাগৰো শিক্ষকৰ নিযুক্তি প্ৰক্ৰিয়া সোনকালেই অনুষ্ঠিত হব। অৱশ্যে চেকেণ্ডাৰী বিভাগৰ পৰীৰক্ষা অলপ পলম হব। তাতোকৈ ডাঙৰ কথা এইবাৰ প্ৰথমবাৰৰ বাবে ৰাজ্যত অনুষ্ঠিত হব -গণিত বিষয়ত সুকীয়া শিক্ষকৰ পদৰ পৰীক্ষা। পূৰ্বে কেৱল বিজ্ঞান শিক্ষক আছিল, এতিয়াৰ পৰা গণিত বিষয়তো হব।
আৰক্ষীৰ নিযুক্তি সন্দৰ্ভত মুখ্যমন্ত্ৰীয়ে কয়, ৬৪৩৪টা পদৰ আৰক্ষীৰ বাবে আবেদন প্ৰক্ৰিয়া আৰম্ভ হব । অহা ৩ অক্টোবৰৰ পৰা আৰক্ষীৰ শাৰিৰীক যোগ্যতাৰ পৰীক্ষা আৰম্ভ হ’ব। সেয়ে বানপানী শুকোৱাৰ পিছত খেলপথাৰবোৰ মুকলি হোৱাৰ পিছত সকলোকে শাৰিৰীক যোগ্যতাৰ পৰীক্ষাৰ বাবে প্ৰস্তুতি আৰম্ভ কৰিবলৈ আহ্বান মুখ্যমন্ত্ৰীৰ।
শাৰিৰীক যোগ্যতাৰ পৰীক্ষাৰ পাছতে হ’ব লিখিত আৰু ভাইভা পৰীক্ষা। চলিত বিত্তিয় বৰ্ষতে এই পদ পূৰ্ণৰ লক্ষ্য। ২০২৫ ত আৰু নতুন পদৰ আবেদন প্ৰক্তিয়া আৰম্ভ কৰাৰ লক্ষ্য অসম চৰকাৰৰ।
এই পৰীক্ষা সমুহৰ বিষয়ে সদৰি কৰি উঠি কয় যে, মেধাৰ ভিত্তিত নিযুক্তি দিয়াটো বৰ সহজ নহয়। ক’ৰবাত ক’ৰবাত দলৰ ক্ষতিও হয়। দলৰ কাৰ্যকৰ্তায়ো দুঃখ কৰে দলত থাকিও চাকৰি নাপাঁও বুলি। কিন্তু চৰকাৰে নিযুক্তি প্ৰক্ৰিয়া মেধাৰ ভিত্তিতেই কৰিব
মুখ্যমন্ত্ৰীগৰাকীয়ে লগতে কয়, ১ লাখ নিযুক্তিৰ প্ৰতিশ্ৰুতি সম্পূৰ্ণ কৰাৰ পিছত এইবাৰৰ নিৰ্বাচনী সভাত আৰু ৩৫ হাজাৰ চাকৰি দিয়াৰ প্ৰতিশ্ৰুতি দিয়া হৈছিল। অহা ব’হাগ বিহুৰ আগতেই আৰু ৩৫ হাজাৰ চাকৰি দিয়া হব। আজিৰ পৰাই এই প্ৰক্ৰিয়া আৰম্ভ হৈছে। সেয়ে সকলোকে ভালকৈ পঢ়িবলৈ আহ্বান।
উল্লেখ্য যে, কালি ৮ জুলাই তাৰিখে এক বিশেষ বৈঠকত এই পৰীক্ষা সন্দৰ্ভত আলোচনা কৰি বিশেষ সিদ্ধান্তত উপনীত হয় আৰু সামাজিক মাধ্যম যোগেই সকলো কথা সদৰি কৰে। ইয়াৰ উপৰিও কাইলৈ বুধবাৰ ১০ জুলাই তাৰিখে কেবিনেট বৈঠক অনুষ্ঠিত হোৱাৰ কথাও সদৰি কৰে।
https://www.facebook.com/share/v/CoMaEfoMRNsmRWXS/
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
