অসম লাইভ ২৪ঃ উজনি অসমত উদ্বেগজনকভাৱে বৃদ্ধি পাইছে HIV আক্ৰান্ত ৰোগী৷ বিগত দুটা বছৰত AMCHত চিনাক্ত হৈছে ৩২৩ গৰাকী HIV ৰোগী। ইয়াৰে ডিব্ৰুগড়, তিনিচুকীয়া, চৰাইদেউ, শিৱসাগৰ, ধেমাজী, লখিমপুৰ জিলাত আক্ৰান্তৰ সংখ্যা সৰ্বাধিক। অতি উদ্বেগজনক কথা যে আক্ৰান্ত হৈছে ১৩ টিকৈ শিশুও। মুঠ ৩২৩ গৰাকী আক্ৰান্তৰ ভিতৰত ১৯২ গৰাকী পুৰুষ, ১১৭ গৰাকী মহিলা। আক্ৰান্তৰ এগৰাকী তৃতীয় লিংগৰ লোক। আক্ৰান্তসকলৰ ৩৮ গৰাকীৰ ইতিমধ্যে মৃত্যু হৈছে। নিয়মীয়া চিকিৎসা গ্ৰহণ কৰি থকা আক্ৰান্তৰ সংখ্যা ২২৯ গৰাকী। একেটা চিৰিঞ্জ ব্যৱহাৰ কৰি ড্ৰাগছ সেৱন আৰু আক্ৰান্তৰে শাৰীৰিক সম্পৰ্কৰ বাবেই উজনিত ভয়াৱহ ৰূপত HIV আক্ৰান্তৰ সংখ্যা বৃদ্ধিৰ আশংকা প্ৰকাশ হৈছে৷ ডিব্ৰুগড়ৰ অসম চিকিৎসা মহাবিদ্যালয় চিকিৎসালয়ৰ অধীক্ষক ডাঃ প্ৰশান্ত দিহিঙীয়াই প্ৰকাশ কৰিছে এই উদ্বেগজনক তথ্য। ড্ৰাগছৰ ভয়াৱহ প্ৰচলনে HIV আক্ৰান্তৰ সংখ্যা বৃদ্ধি কৰাৰ আশংকাই অধিক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
