ৰাম মন্দিৰৰ নিৰ্মাণৰ কাম এতিয়াও শেষ হোৱা নাই৷ কাম শেষ নৌহওঁতেই আৰম্ভ হৈছে চুৰি৷ ৰামপথ, যি পথেৰে অযোধ্যাৰ ৰাম মন্দিৰ যাব পাৰি সেই ৰাস্তাৰ পৰাই উধাও হৈছে বাঁহেৰে কাৰুকাৰ্য কৰা লাইট৷ এটা দুটা নহয় প্ৰায় ৪০০০ লাইট চুৰি হৈছে৷ ইয়াৰোপৰি ভক্তি পথৰ পৰা চুৰি হৈছে গোবো প্ৰজেক্টৰো, যাৰ মাধ্যমেৰে পোহৰৰ খেলা দেখোওৱা হৈছিল৷ ৫০ লাখ টকাতকৈ অধিক মুল্যৰ লাইট চুৰিৰ অভিযোগত দাখিল হৈছে গোচৰ৷
ভাইৰেল খবৰ অনুসৰি অযোধ্যাৰ ৰামপথ আৰু ভক্তিপথৰ পৰা চুৰি হৈছে লাইট আৰু প্ৰজেক্টৰসমূহ৷ আৰক্ষী সূত্ৰই প্ৰকাশ কৰামতে, ৩৮০০ টা বাঁহেৰে কাম কৰা লাইট আৰু ৩৬টা প্ৰজেক্টৰ এতিয়ালৈকে চুৰি হৈছে৷ যাৰ বজাৰমূল্য প্ৰায় ৫০ লাখ টকাতকৈয়ো বেছি৷
অযোধ্যা ডেভেলপমেণ্ট অথৰিটিৰ তৰফৰ পৰা এই লাইট আৰু প্ৰজেক্টৰ বহুওৱাৰ কাম কৰিছিল যশ এণ্টাৰপ্ৰাইজ আৰু কৃষ্ণা অটোমোবাইলে৷ দুই সংস্থাই ৰামপথত মুঠ ৬৪০০টা বাঁহেৰে কাৰুকাৰ্য কৰা লাইট আৰু ভক্তিপথত ৯৬টা প্ৰজেক্টৰ লগাইছিল৷ কিন্তু ইয়াৰে আধাসংখ্যক এতিয়া নাই৷ বিগত ৯আগষ্টত এই ঘটনাক লৈ এফ আই আৰ দাখিল হৈছে অযোধ্যাৰ বিশেষ পুলিছ ষ্টেচনত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
