দীৰ্ঘ দিৰ পাছত বিদেশী পৰ্যটকৰ বাবে ভূটানৰ সীমান্ত মুকলি কৰি দিয়া হৈছে৷ প্ৰায় ৩০ মাহৰ পাছত ভূটানে বিদেশী পৰ্যটকৰ বাবে আন্তঃৰাষ্ট্ৰীয় সীমান্ত খুলি দিয়াৰ লগতে পৰ্যটকৰ বাবে কেতবোৰ নতুন নিয়ম প্ৰৱৰ্তন কৰিছে৷
উল্লেখ্য যে কৰ’ণা মহামাৰীৰ বাবে ভূটানে দেশখনত বিদেশী পৰ্যটকৰ প্ৰৱেশ নিষিদ্ধ কৰিছিল৷ বিশেষকৈ ভূটানৰ উন্মুক্ত সীমান্তৰেদি বিদেশী পৰ্যটকৰ প্ৰৱেশ তেতিয়াৰে পৰা সম্পূৰ্ণ নিষিদ্ধ কৰা হৈছিল৷ আনকি দেশখনৰ নাগৰিকসকলেও নিজ দেশৰ সীমান্ত পাৰ হৈ প্ৰতিবেশী দেশৰ সৈতে কোনো ধৰণৰ সম্পৰ্ক ৰক্ষা কৰিব পৰা নাছিল৷
শুকুৰবাৰে এই নিষেধাজ্ঞাসমূহ প্ৰত্যাহাৰ কৰাৰ পিছত ভূটানৰ নাগৰিকেও সীমান্ত পাৰ হ’ব পাৰিব। অৱশ্যে এইবাৰ ভূটান চৰকাৰে বিদেশীৰ বাবে কেতবোৰ নিয়ম প্ৰৱৰ্তন কৰিছে৷ এতিয়াৰে পৰা ভূটানত প্ৰৱেশ কৰিলে প্ৰৱেশৰ সময়ত দৈনিক মাচুল দিয়াটো বাধ্যতামূলক কৰা হৈছে। ইয়াৰ বাবে আগতীয়াকৈ প্ৰৱেশৰ অনলাইন আবেদন কৰিব লাগিব।
লগতে পঢ়ক গাৰ্লফ্ৰেণ্ড হ’ব নেকি? হ’লে লাভ কৰিব মাহে দুই লাখকৈ দৰমহা! বিজ্ঞাপন দিলে দুই যুৱকে
২০২০ চনৰ জানুৱাৰীত সংসদে গৃহীত হোৱা আইনৰ অধীনত ভূটান চৰকাৰে বিদেশী প্ৰৱেশৰ ওপৰত কৰ আৰোপ কাৰ্যকৰী কৰিছে। ভাৰতীয়সকলকো এই নিয়মত অন্তৰ্ভুক্ত কৰা হৈছে, যদিও ভাৰতীয়সকলে পৰিমাণৰ ক্ষেত্ৰত কিছু ৰেহাই পাইছে। ভাৰতীয়সকলে ভূটানত প্ৰৱেশৰ বাবে প্ৰতিদিনে ১২০০ টকা মাচুল দিব লাগিব। আনহাতে, অন্য বিদেশীৰ বাবে এই পৰিমাণ প্ৰতিদিনে ২০০ ডলাৰ।
এতিয়াৰে পৰা ভূটান ভ্ৰমণৰ পূৰ্বে অনলাইন পঞ্জীয়ন কৰাটো বাধ্যতামূলক কৰা হৈছে। ভাৰতীয় নাগৰিকত্বৰ প্ৰমাণ হিচাপে কেৱল পাছপ’ৰ্ট আৰু ভোটাৰ আইডিহে গ্ৰহণ কৰা হ’ব। পূৰ্বে আধাৰ কাৰ্ড আৰু ড্ৰাইভিং লাইচেন্স ব্যৱহাৰ কৰিব পাৰিছিল যদিও এতিয়া সেই নিয়ম সলনি হৈছে। লগতে ১৮ বছৰৰ তলৰ ভাৰতীয়সকলে পৰিচয় প্ৰমাণ হিচাপে জন্মৰ প্ৰমাণ পত্ৰ দাখিল কৰিব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
