অন্য এক হঠকাৰী সিদ্ধান্ত গ্ৰহণ কৰিছে ডঃ হিমন্ত বিশ্ব শৰ্মাৰ ৰাজ্য চৰকাৰে৷ এইবাৰ অসমীয়াৰ বাপতিসাহোন বিহুৰ ওপৰত আক্ৰমণ ৰাজ্য চৰকাৰৰ৷
শিক্ষামন্ত্ৰী ডাঃ ৰণোজ পেগুৱে ঘোষণা কৰিছে যে উচ্চতৰ মাধ্যমিকৰ পাঠ্যক্ৰমৰ পৰা বিহুক আঁতৰাই দিয়া হৈছে৷ কেৱল বিহুৱেই নহয় উক্ত পাঠ্যক্ৰমৰ পৰা স্বদেশ প্ৰেমৰ পাঠো আঁতৰাই দিয়া হৈছে৷
অসমীয়া সংস্কৃতি সংৰক্ষণ কৰিবলৈ বিভিন্ন অভিলাষী পদক্ষেপ লোৱা আৰু নিজকে দেশপ্ৰেমী বুলি আত্ম জাহিৰ কৰি অহা চৰকাৰৰ এই সিদ্ধান্তই ৰাজ্যৰ সুধী সমাজত ব্যাপক প্ৰতিক্ৰিয়াৰ সৃষ্টি কৰিছে৷ আছুসহ বিভিন্ন সংগঠনে ইয়াৰ বিৰুদ্ধে সোচ্চাৰ হোৱাও দেখা গৈছে৷
ইফালে শিক্ষামন্ত্ৰী ডাঃ ৰণোজ পেগুৱে শুকুৰবাৰে ঘোষণা কৰে যে অসমৰ চাৰিটা জনজাতীয় ভাষাক নিম্ন প্ৰাথমিক স্তৰৰ পাঠ্যক্ৰমত অন্তভুৰ্ক্ত কৰা হ’ব৷
মন্ত্ৰী ডাঃ পেগুৱে প্ৰথম শ্ৰেণীৰ পৰা পঞ্চম শ্ৰেণীলৈ মিচিং, ৰাভা, তিৱা আৰু দেউৰী ভাষাক অন্তভুৰ্ক্ত কৰা হ’ব বুলি ঘোষণা কৰিছে৷
‘‘চৰকাৰে এই সম্প্ৰদায়সমূহৰ দাবী পূৰণৰ বাবে নিম্ন প্ৰাথমিক বিদ্যালয় পৰ্যায়ত চাৰিটা জনজাতীয় ভাষাক শিক্ষাদানৰ মাধ্যম হিচাপে প্ৰৱৰ্তন কৰাৰ সিদ্ধান্ত লৈছে। প্ৰথম শ্ৰেণীৰ পৰা পঞ্চম শ্ৰেণীলৈকে শিক্ষাৰ মাধ্যম হিচাপে মিচিং, ৰাভা, তিৱা আৰু দেউৰী ভাষা প্ৰৱৰ্তনৰ সিদ্ধান্ত লোৱা হৈছে।’’ মন্ত্ৰী ডঃ পুগুৱে কয়৷
আনহাতে, মন্ত্ৰী ডাঃ পেগুৱে লগতে কয় যে চৰকাৰে চলিত বছৰতে এই ভাষাসমূহ শিক্ষাৰ মাধ্যম হিচাপে প্ৰৱৰ্তন কৰিবলৈ চেষ্টা কৰিব৷
অৱশ্যে, পাঠ্যপুঠি প্ৰণয়ন আদিৰ কাৰিকৰী সমস্যাৰ কথা উল্লেখ কৰি মন্ত্ৰী ডাঃ পেগুৱে আৰু কয় যে উক্ত ভাষাসমূহৰ ভাষিক শিক্ষণ অৰ্হতা থকা শিক্ষকক পাঠ্যক্ৰম প্ৰস্তুতৰ বাবে বাছনি কৰাৰ ব্যৱস্থা কৰা হ’ব৷ পাঠ্যক্ৰম প্ৰস্তুতি আদিত সময়ৰ প্ৰয়োজন হ’লে ২০২৩ শিক্ষা বৰ্ষত এই ভাষাকেইটা প্ৰৱৰ্তন কৰা হ’ব বুলিও উল্লেখ কৰে ৰাজ্যৰ শিক্ষা মন্ত্ৰীগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
