হায়দৰাবাদৰ বিজেপিৰ ৰাষ্ট্ৰীয় কাৰ্যনিৰ্বাহক সভা

মানৱেন্দ্ৰ কুমাৰ দাসঃ যোৱা ২ জুলাইৰ পৰা দুদিনীয়াকৈ হায়দৰাবাদত অনুষ্ঠিত হৈছে বিজেপিৰ ৰাষ্ট্ৰীয় কাৰ্যনিৰ্বাহক সভা৷ বিজেপি শাসিত ৰাজ্যসমূহৰ মুখ্যমন্ত্ৰী আৰু উপ-মুখ্যমন্ত্ৰীসকলৰ উপস্থিতিত অনুষ্ঠিত হোৱা এই বিশেষ সন্মিলনত উপস্থিত থাকে প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ আৰু বিজেপিৰ ৰাষ্ট্ৰীয় সভাপতি জয়প্ৰকাশ নড্ডাসহ আটাইকেইগৰাকী জ্যেষ্ঠ নেতা৷

এই অধিৱেশনতে বিজেপিলৈ বহুকেইটা গুৰুত্বপূৰ্ণ ৰাজনৈতিক প্ৰস্তাৱ৷ সেই মতে আগন্তুক সময়ছোৱাত দেশৰ ৩০ কোটি হিতাধিকাৰীক প্ৰদান কৰা হ’ব চৰকাৰী সা-সুবিধা৷

আগন্তুক ১৮ বছৰত ১০ লাখ লোকক চৰকাৰী চাকৰিত নিযুক্তি দিয়াৰ বাবেও প্ৰস্তাৱ লৈছে কাৰ্যনিৰ্বাহক সভাই৷ ইফালে, তেলেংগানা চৰকাৰৰ ভূমিকাকো সমালোচনা কৰিছে বিজেপি নেতৃত্বই৷ কিন্তু কিয়?

প্ৰধানমন্ত্ৰীক আদৰণি নজনালে তেলেংগানাৰ মুখ্যমন্ত্ৰীয়ে। ইফালে, বিজেপিৰ ৰাষ্ট্ৰীয় কাৰ্যনিৰ্বাহকত উপস্থিত থাকিবলৈ ২ জুলাইত হায়দৰাবাদত উপস্থিত হয় দেশৰ প্ৰধানমন্ত্ৰী নৰেন্দ্ৰ মোদী৷

কিন্তু নৰেন্দ্ৰ মোদীক তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে বিমান বন্দৰত আদৰণি নজনোৱাক লৈ সৃষ্টি হৈছে বিতৰ্কৰ৷ উল্লেখযোগ্য যে প্ৰধানমন্ত্ৰীৰ আগমন হ’লে সংশ্লিষ্ট ৰাজ্যৰ মুখ্যমন্ত্ৰীয়ে আদৰণি জনোৱাটো এক সাংবিধানিক পৰম্পৰা৷

কিন্তু এই পৰম্পৰা ভংগ কৰা হ’ল কিয়? প্ৰধানমন্ত্ৰীক তেলেংগানা চৰকাৰে অপমান কৰিলে নেকি? বিজেপিক দম বিৰিয়ানি খোৱাৰ পৰামৰ্শ কিয়? বিজেপিৰ সভাত ‘ইৰাণী টি’ৰ প্ৰসংগ কিয়?

ইফালে, তেলেংগানাৰ মুখ্যমন্ত্ৰী কে চন্দ্ৰশেখৰ ৰাওক উভতি ধৰিছে বিজেপিৰ নেত্ৰী স্মৃতি ইৰাণীয়ে৷ কিন্তু স্মৃতি ইৰাণীয়ে মতপ্ৰকাশ কৰাৰ লগে লগে বিজেপি চৰকাৰ আৰু প্ৰধানমন্ত্ৰী নৰেন্দ্ৰ মোদীৰ বিৰুদ্ধে সৰৱ হৈ উঠে তেলেংগানা চৰকাৰৰ আন এগৰাকী মন্ত্ৰী কে টি ৰামাৰাও৷

কে টি ৰামাৰাৱে বিজেপিৰ কাৰ্যনিৰ্বাহক সভাক লৈ তিৰ্যক মন্তব্য দিয়ে আৰু হায়দৰাবাদ চহৰৰ হায়দৰাবাদী ‘দম বিৰিয়ানি’ৰ জুতি ল’বলৈ আহ্বান জনায় বিজেপি নেতৃত্বক৷

একে সময়তে তেলেংগানা চৰকাৰৰ মন্ত্ৰী কে টি ৰামাৰাৱে সন্ধিয়াৰ হায়দৰাবাদ চহৰত ইৰাণী চাহৰ মজা ল’বলৈও পৰামৰ্শ দিয়ে বিজেপিৰ নেতৃত্বক৷ হায়দৰাবাদ চহৰত বিজেপি বিৰোধী প’ষ্টাৰ-হৰ্ডিঙো লগাইছে তেলেংগানা চৰকাৰে৷

দক্ষিণ ভাৰতত বিজেপিৰ সাংগঠনিক আৰু ৰাজনৈতিক শক্তি বঢ়াবলৈ গেৰুৱা বাহিনীটোৱে কৌশল ৰচাৰ সময়ত তেলেংগানা চৰকাৰৰ এই ভূমিকাও অধিক লক্ষণীয় হৈ উঠিছে৷

অৱশ্যে আগন্তুক সময়ছোৱাত বিজেপিৰ ৰণকৌশেলেহে নিৰ্ণয় কৰিব দক্ষিণ ভাৰতীয় ৰাজনীতিত হিন্দুত্ববাদৰ প্ৰভাৱ৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ