ডায়েবেটিছ নিয়ন্ত্ৰণ আৰু ওজন কমোৱাৰ বাবে ব্যৱহৃত Ozempicসহ GLP-1 শ্ৰেণীৰ ঔষধক লৈ শেহতীয়াকৈ চকুৰ দৃষ্টিশক্তিৰ ওপৰত সম্ভাব্য প্ৰভাৱক লৈ আলোচনা আৰম্ভ হৈছে। Al Jazeeraৰ শেহতীয়া এক প্ৰতিবেদনত এই ঔষধসমূহৰ সৈতে NAION (Non-Arteritic Anterior Ischaemic Optic Neuropathy) নামৰ এক অতি বিৰল চকুৰ সমস্যাৰ সম্ভাব্য সম্পৰ্কৰ কথা উল্লেখ কৰা হৈছে।
কি এই NAION?
NAION হৈছে চকুৰ দৃষ্টিস্নায়ু (optic nerve)লৈ ৰক্তপ্ৰবাহ কমি যোৱা এক অৱস্থা। ইয়াৰ ফলত হঠাতে, এটা চকুৰ দৃষ্টিশক্তি কমি যাব পাৰে। অৱশ্যে এই সমস্যা অতি বিৰল। European Medicines Agency (EMA)ৰ পৰ্যালোচনাত semaglutide-ৰ সৈতে NAIONৰ সম্ভাব্য সম্পৰ্ক পোৱা গৈছে যদিও ইয়াক দুৰ্লভ পাৰ্শ্বপ্ৰতিক্ৰিয়া হিচাপে গণ্য কৰা হৈছে। অৰ্থাৎ ১০,০০০জনৰ ভিতৰত এজনৰ ক্ষেত্ৰত এনে সমস্যা দেখা দিব পাৰে, চিন্তনীয় কথাটো হৈছে সেই দুৰ্ভাগ্যজনক ব্যক্তিজন কোন হ’ব পাৰে তাৰ কোনো নিশ্চয়তা নাই। আনহাতে, কিছুমান অধ্যয়নত আশংকা সামান্য বৃদ্ধি পোৱাৰ ইংগিত পোৱা গৈছে যদিও বৃহৎ ক্লিনিকেল পৰীক্ষণৰ তথ্যৰ কিছুমান বিশ্লেষণত NAIONৰ বৃদ্ধি স্পষ্ট হোৱা নাই। সেয়ে বিষয়টো লৈ গৱেষণা এতিয়াও চলি আছে।
ভাৰততো Ozempic উপলব্ধ নেকি?
ভাৰততো semaglutide-ভিত্তিক ঔষধ উপলব্ধ। Ozempic, Wegovy আৰু Rybelsusৰ দৰে ব্ৰেণ্ডৰ লগতে ভাৰতত স্থানীয়ভাৱে উৎপাদিত বা অনুমোদিত semaglutide formulation-ও বজাৰত প্ৰচলন হৈ আছে। Ozempic মূলত type-2 diabetes নিয়ন্ত্ৰণৰ বাবে ব্যৱহাৰ কৰা হয়, আনহাতে “Wegovy মূলত মেদবহুলতা (শৰীৰত অতিৰিক্ত চৰ্বি জমা হোৱা) কমোৱা আৰু ওজন নিয়ন্ত্ৰণত ৰখাৰ বাবে ব্যৱহাৰ কৰা হয়। দুয়োটাৰে মূল সক্ৰিয় উপাদান হৈছে semaglutide।
কেতিয়া সাৱধান হ’ব?
এই ধৰণৰ ঔষধ ব্যৱহাৰ কৰি থকা অৱস্থাত যদি হঠাতে এটা চকুৰ দৃষ্টি কমি যায় বা দৃষ্টি অস্পষ্ট হৈ পৰে, তেন্তে পলম নকৰি চিকিৎসকৰ পৰামৰ্শ লোৱাটো জৰুৰী। অৱশ্যে কেৱল এই প্ৰতিবেদন পঢ়ি নিজে নিজে Ozempic বা আন GLP-1 ঔষধ বন্ধ কৰাটো উচিত নহয়। চিকিৎসকৰ পৰামৰ্শ অনুসৰিহে ঔষধৰ dose সলনি বা বন্ধ কৰিব লাগে।
Ozempicৰ সৈতে দৃষ্টিশক্তি হেৰুৱাব পৰা এক অতি বিৰল চকুৰ সমস্যাৰ সম্ভাব্য সম্পৰ্ক পোৱা গৈছে। কিন্তু এই আশংকা অতি কম আৰু ইয়াক লৈ গৱেষণা অব্যাহত আছে। ভাৰততো semaglutide-ভিত্তিক ঔষধ উপলব্ধ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
