ইউৰোপীয় আয়োগৰ সভাপতি উৰছুলা ভন ডেৰ লেয়েনে শিশুসকলক অনলাইন জগতৰ বিভিন্ন বিপদৰ পৰা সুৰক্ষিত কৰাৰ বাবে এক পৰিকল্পনা আগবঢ়াইছে। বৃহস্পতিবাৰে তেওঁ ঘোষণা কৰা এই পৰিকল্পনাত ১৩ বছৰৰ তলৰ শিশুক ছ’চিয়েল মিডিয়া ব্যৱহাৰৰ পৰা আঁতৰাই ৰখাৰ প্ৰস্তাৱ দিয়া হৈছে। ইয়াৰ লগতে অনলাইন প্লেটফৰ্মসমূহক শিশুৰ বাবে অধিক সুৰক্ষিত একাউণ্ট ব্যৱস্থা তৈয়াৰ কৰাটো বাধ্যতামূলক কৰাৰ কথাও কোৱা হৈছে। এই প্ৰস্তাৱটো EU Kids Act নামেৰে আগবঢ়োৱা হৈছে। ইয়াৰ মূল উদ্দেশ্য হৈছে শিশুসকলক ছ’চিয়েল মিডিয়া, ভিডিঅ’ শ্বেয়াৰিং প্লেটফৰ্ম, অনলাইন গেম, AI chatbot আৰু AI companion আদিৰ সম্ভাব্য ক্ষতিকাৰক প্ৰভাৱৰ পৰা সুৰক্ষা দিয়া।
প্ৰস্তাৱ অনুসৰি, ১৩ৰ পৰা ১৫ বছৰ বয়সৰ শিশুৰ ছ’চিয়েল মিডিয়া একাউণ্ট অভিভাৱকৰ নিয়ন্ত্ৰণত থাকিব। অৰ্থাৎ, এই বয়সৰ শিশুৱে অনলাইনত কি কৰিব পাৰিব বা নোৱাৰিব, সেই ক্ষেত্ৰত অভিভাৱকৰ অধিক নিয়ন্ত্ৰণ থাকিব। আনহাতে, ১৮ বছৰৰ তলৰ শিশুৰ বাবে ছ’চিয়েল মিডিয়া, ভিডিঅ’ শ্বেয়াৰিং ছাইট, অনলাইন ভিডিঅ’ গেম, AI companion আৰু chatbotৰ ক্ষেত্ৰতো কিছুমান স্পষ্ট নিয়ম প্ৰযোজ্য হ’ব।
শিশুৰ বাবে ডিজিটেল প্লেটফৰ্মসমূহত কিছুমান বিশেষ ফিচাৰ নিষিদ্ধ কৰাৰ প্ৰস্তাৱ দিয়া হৈছে। ইয়াৰ ভিতৰত আছে— আসক্তি সৃষ্টি কৰিব পৰা ফিচাৰ, ব্যৱহাৰকাৰীৰ প্ৰফাইল অনুসৰি নিৰ্মাণ কৰা recommendation feed, শেষ নোহোৱা Infinite Scroll, শিশুক অধিক সময় প্লেটফৰ্মত ৰখাৰ বাবে ব্যৱহাৰ কৰা reward tricks আৰু অচিনাকি লোকৰ পৰা অহা অনাকাংক্ষিত যোগাযোগ। ইয়াৰ উপৰি AI companion আৰু chatbot শিশুৰ একাউণ্টত ডিফল্টভাৱে বন্ধ কৰি ৰখাৰ প্ৰস্তাৱো আছে।
নতুন নিয়ম অনুসৰি অনলাইন কোম্পানীসমূহে শিশুৰ কথা মনত ৰাখি নিজৰ algorithm সুৰক্ষিতভাৱে ডিজাইন কৰিব লাগিব। লগতে অভিভাৱকসকলৰ বাবে সহজে ব্যৱহাৰ কৰিব পৰা parental control ব্যৱস্থা থাকিব লাগিব। অভিভাৱকে যাতে সহজে কোনো ব্যৱহাৰকাৰীক block বা mute কৰিব পাৰে, সেই সুবিধাও প্লেটফৰ্মসমূহে প্ৰদান কৰিব লাগিব। ইয়াৰ উপৰিও, শিশুৱে অনলাইন একাউণ্ট খোলাৰ সময়ত তেওঁলোকৰ বয়স নিশ্চিত কৰাৰ বাবে কোম্পানীসমূহে age assurance technology ব্যৱহাৰ কৰিব লাগিব। অৰ্থাৎ, ব্যৱহাৰকাৰীজনৰ বয়স সঠিকভাৱে পৰীক্ষা কৰাৰ ব্যৱস্থা থাকিব লাগিব।
নিয়ম ভংগ কৰিলে কোম্পানীসমূহৰ ওপৰত কঠোৰ ব্যৱস্থা লোৱাৰো প্ৰস্তাৱ কৰা হৈছে। নিয়ম মানি নচলিলে কোনো কোম্পানীক বিশ্বব্যাপী বাৰ্ষিক আয়ৰ ৬ শতাংশ পৰ্যন্ত জৰিমনা বিহা হ’ব পাৰে। ইয়াৰ লগতে নিয়ন্ত্ৰণকাৰী সংস্থাসমূহৰ কাম-কাজৰ বাবে কোম্পানীসমূহে supervisory fee-ও দিব লাগিব।
উৰছুলা ভন ডেৰ লেয়েনে কয় যে আজিৰ শিশুসকলে বিশ্বৰ আটাইতকৈ উন্নত প্ৰযুক্তিৰ সৈতে জড়িত হৈ পৰিছে। কিন্তু এই প্ৰযুক্তিসমূহ শিশুৰ মানসিক বিকাশ আৰু কল্যাণক কেন্দ্ৰ কৰি নিৰ্মাণ কৰা হোৱা নাছিল। তেওঁৰ মতে, বাস্তৱ জীৱনত শিশুৰ বাবে যিদৰে কিছুমান সীমা আৰু নিয়ম থাকে, ডিজিটেল জগততো শিশুৰ সুৰক্ষাৰ বাবে স্পষ্ট সীমা নিৰ্ধাৰণ কৰা প্ৰয়োজন। বিশেষকৈ Facebook, Instagram, TikTok, YouTube আৰু ChatGPTৰ দৰে প্লেটফৰ্ম শিশুৰ মানসিক স্বাস্থ্য আৰু সুৰক্ষাৰ ওপৰত কেনেধৰণৰ প্ৰভাৱ পেলাইছে, সেই বিষয়ক লৈ বিভিন্ন দেশত উদ্বেগ বৃদ্ধি পাইছে। ইতিমধ্যে বিশ্বৰ কেইবাখনো দেশেও শিশুৰ ছ’চিয়েল মিডিয়া ব্যৱহাৰ নিয়ন্ত্ৰণ কৰাৰ বাবে বিভিন্ন পদক্ষেপ গ্ৰহণ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
