অসম লাইভ ২৪ঃ সুশান্ত সিং ৰাজপুতৰ মৃত্যু সন্দর্ভত CBIয়ে শুকুৰবাৰে প্ৰথমবাৰৰ বাবে ৰিয়া চক্ৰৱর্তীক জেৰা কৰে। উচ্চতম ন্যায়ালয়ে সুশান্তৰ মৃত্যুৰ তদন্ত CBIক অর্পণ কৰাৰ পাছত CBIয়ে ৬ আগষ্টৰ পৰা সুশান্তৰ মৃত্যুৰ তদন্ত আৰম্ভ কৰিছে। CBIৰ পৰা জাননী পোৱাৰ পাছতে ২৮ বছৰীয়া ৰিয়া চক্ৰৱর্তীয়ে পিতৃৰ সৈতে DRDO IAFৰ অতিথিশালাত ১০.২০ বজাত উপস্থিত হয়। নিশা ৮.৩০ বজালৈকে ১০ ঘণ্টা ধৰি CBIয়ে জেৰা চলায় ৰিয়া চক্ৰৱর্তীক। জেৰাৰ অন্তত পুনৰ এই প্ৰক্ৰিয়াৰ বাবে ৰিয়াক সাজু থাকিবলৈ জনায় CBIয়ে। CBIয়ে সুশান্তৰ মানসিক অৱস্থাৰ সন্দর্ভত প্ৰশ্ন কৰে আৰু ৰিয়াৰ ভাষ্য ৰেকর্ড কৰে। লগতে তেওঁলোকৰ ইউৰোপ ভ্ৰমণ আৰু সুশান্তৰ স্বাস্থ্যক লৈ বিভিন্ন প্ৰশ্ন কৰে ৰিয়া চক্ৰৱর্তীক। ৰিয়াক জেৰা কৰাৰ এদিন পূর্বে অর্থাৎ বৃহস্পতিবাৰে ভাতৃ সৌভিকক ১৪ ঘণ্টা ধৰি জেৰা চলায় CBIয়ে। সুশান্তৰ পিতৃ কে কে সিঙে ৰিয়াৰ ওপৰত চাঞ্চল্যকৰ অভিযোগ উত্থাপন কৰিছিল যে ৰিয়াই বিষ দি সুশান্তক হত্যা কৰিছে। ইয়াৰ উপৰিও সুশান্তৰ লগত একেলগে থকা অৱস্থাত ৰিয়াই সুশান্তৰ পিতৃৰ ফোন কল সুশান্তক গ্ৰহণ কৰিব দিয়া নাছিল। আনকি পৰিয়ালৰ পৰা আঁতৰাই আনিছিল সুশান্তক। CBIৰ জেৰাকালত ৱাটছএপ মেছেজৰ জৰিয়তে এই অভিযোগৰ তথ্য প্ৰমাণ দিয়ে। সুশান্তৰ একাউণ্টৰ ১৫ কোটি টকা হৰলুকি সন্দর্ভতো ৰিয়াক প্ৰশ্ন কৰে CBIয়ে। কিন্তু এই সকলোবোৰ অভিযোগ ৰিয়াই অস্বীকাৰ কৰে CBIৰ আগত। ৰিয়াক জেৰা কৰাৰ পূর্বে CBIয়ে ভাতৃ সৌভিক, সুশান্তৰ ফ্লেট মেট সিদ্ধার্থ পৃথানী, ঘৰৰ মেনেজাৰ চেমুৱেল মিৰাণ্ডা আৰু ৰান্ধনী নিৰজ সিঙক জেৰা কৰে। আজি পুনৰ CBIয়ে জেৰা আৰম্ভ কৰিছে ৰিয়া চক্ৰৱর্তীক। পুৱা ১০ বজাত সিদ্ধার্থ পৃথানী, চেমুৱেল মিৰাণ্ডাৰ সৈতে DRDO IAFৰ অতিথিশালাত উপস্থিত হৈছে ৰিয়া চক্ৰৱর্তী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
