বৈবাহিক ধৰ্ষণক অপৰাধ বুলি গণ্য কৰা হ’ব নে নহয় সেই বিবাদে এতিয়া নতুন মোৰ লৈছে৷
উল্লেখ্য যে বৈবাহিক ধৰ্ষণক অপৰাধ বুলি গণ্য কৰা হ’ব নে নহয় সেই প্ৰশ্নটো দিল্লী উচ্চ ন্যায়ালয়ত শুনানি হোৱাৰ পূৰ্বে কেন্দ্ৰই ইয়াৰ শুনানি স্থগিতাদেশ বিচাৰি আবেদন কৰিছিল৷
ইয়াৰ পিছতে শুকুৰবাৰে কেন্দ্ৰই উচ্চ ন্যায়ালয়ত এক শপতনামা দাখিল কৰি কৈছে যে বৈবাহিক ধৰ্ষণক অপৰাধ বুলি গণ্য কৰা হ’ব নে নহয় সেই সিদ্ধান্ত সংসদে গ্ৰহণ কৰিব৷ এই বিষয়ে সংসদৰ চলিত অধিবেশনত এই সপ্তাহৰ ভিতৰতে আলোচনা কৰা হ’ব৷
চলিচিটৰ জেনেৰেল তুষাৰ মেহতাই দিল্লী উচ্চ ন্যায়ালয়ত দাখিল কৰা শপতনামাখনত লগতে কোৱা হৈছে যে বৈবাহিক ধৰ্ষণক আইনীভাৱে অপৰাধ হিচাপে গণ্য কৰা হ’ব নে নহয় সেই লৈ সপক্ষে আৰু বিপক্ষে যুক্তি তৰ্ক অব্যাহত আছে৷
কেন্দ্ৰ তৰফৰ পৰা লগতে আৰু জনোৱা হৈছে যে এই বিষয়টোৰ সম্পৰ্কে কঠোৰ আইনগত পদক্ষেপ লোৱাৰ পূৰ্বে বিশদ আলোচনাৰ প্ৰয়োজন আছে৷
ইফালে শুকুৰবাবে দিল্লী উচ্চ ন্যায়ালয়ত গোচৰটোৰ জ্যেষ্ঠ আইনজীৱী কলিন গোনশ্লেভে মহিলাৰ পক্ষ গ্ৰহণ কৰি ইংলেণ্ডৰ আইন কমিছনাৰৰ এক প্ৰতিবেদন আৰু দেশখনৰ শীৰ্ষ আদালতত বৈবাহিক ধৰ্ষণক অপৰাধ বুলি গণ্য কৰাৰ কে’বাটাও উদাহৰণ দাঙি ধৰে৷
জ্যেষ্ঠ আইনজীৱীগৰাকীৰ মতে ভাৰতৰ দৰে এখন বিশাল আৰু বৈচিত্ৰময় দেশত এগৰাকী মহিলাৰ সপক্ষে কোনটো বৈবাহিক ধৰ্ষণ আৰু কোনটো নহয় সেয়া নিৰ্ধাৰণ কৰা সহজ নহয়৷ কাৰণ এই ঘটনাটো ব্যক্তিগত পৰিসৰত সংঘটিত হয়৷
তেওঁ লগতে দাবী কৰে যে আদালতে পুৰুষৰ ক্ষেত্ৰত ভাৰতীয় দণ্ডবিধি আইনৰ ৩৭৫ ধাৰা বাতিল কৰিলে এই অপৰাধৰ শাস্তিৰ বিষয়টো সংসদৰ হাতত ন্যস্ত থাকিব৷
ইফালে কেন্দ্ৰই আদালতত কয় যে শুনানিত কোনো এখন ৰাজ্যৰে প্ৰতিনিধি উপস্থিত নাই, তেওঁলোকৰ অনুপস্থিতিত এই সিদ্ধান্ত গ্ৰহণ কৰিলে প্ৰকৃত ন্যায় বিচাৰৰ ক্ষেত্ৰত অন্তৰায়হে আহিব৷
কেন্দ্ৰৰ এই শপতনামাই বৈবাহিক ধৰ্ষণক অপৰাধমুক্ত কৰাৰ প্ৰচেষ্টা কৰা বুলিয়ে ধাৰণা কৰা হৈছে৷ সংসদত বিষয়টো আলোচনা হ’লে ইয়াক আইনী অপৰাধ ৰূপে ঘোষণা কৰাটো আৰু সহজ নহ’ব৷ কাৰণ বিজেপি সাংসদসকলে বৈবাহিক ধৰ্ষণক অপৰাধ ৰূপে গণ্য কৰাতো মুকলিকৈ বিৰোধিতা কৰি আহিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
