১০ বছৰে ধৰি খালী হৈ থকা বিৰোধী নেতাৰ আসনত এইবাৰ কোন, নাম উত্থাপন হৈছে অসমৰ নেতাৰ
লোকসভা নিৰ্বাচনৰ পিছত তৃতীয়বাৰৰ বাবে কেন্দ্ৰত গঠন হৈছে এন ডি এ চৰকাৰ। নৰেন্দ্ৰ মোডী তৃতীয় বাৰৰ বাবে প্ৰধানমন্ত্ৰী হয়। ২৪ জুনত আৰম্ভ হ’ব ১৮ সংখ্যক লোকসভাৰ প্ৰথম অধিৱেশন আৰু ৩ জুলাইত সমাপ্ত হ’ব। ৯ দিনীয়া বিশেষ অধিৱেশনৰ সময়ত লোকসভাৰ অধ্যক্ষ নিৰ্বাচিত হ’ব আৰু নতুন সাংসদে শপত গ্ৰহণ কৰিব।
এই সময়ছোৱাত সংসদে বিৰোধীৰ নেতাকো পাব। এই পদটো যোৱা ১০ বছৰ ধৰি খালী হৈ আছিল। শেষবাৰৰ বাবে সুষমা স্বৰাজ ২০০৯ চনৰ পৰা ২০১৪ চনলৈ লোকসভাত বিৰোধী দলপতি আছিল। কিন্তু ২০১৪ আৰু ২০১৯ৰ নিৰ্বাচনত কোনো বিৰোধী দলৰ ৫৪ জন সাংসদ জয়ী হোৱা নাছিল। নিয়ম অনুসৰি বিৰোধী দলৰ নেতা হ’বলৈ হ’লে লোকসভাৰ মুঠ সংখ্যাৰ ১০% অৰ্থাৎ ৫৪ জন সাংসদ থকাটো প্ৰয়োজনীয়।
এইবাৰ কংগ্ৰেছে ৯৯ খন আসন লাভ কৰাত এই পদ লাভ কৰিব। অৱশ্যে পিছলৈ এই ১০০ৰ ওপৰ হয়। ইয়াৰ পূৰ্বে ৰাহুল গান্ধী লোকসভাত বিৰোধী দলৰ নেতা হ’ব পাৰে বুলি জল্পনা-কল্পনাৰ সৃষ্টি হৈছিল। কিন্তু সূত্ৰ অনুসৰি ৰাহুল গান্ধীয়ে এই পদ নাকচ কৰিছে। এনে পৰিস্থিতিত কংগ্ৰেছৰ পৰা আহিছে ৩ টা নাম। ইয়াৰে এজন অসমৰ নেতা।
লোকসভা নিৰ্বাচনত কংগ্ৰেছ নেতৃত্বাধীন INDIA Alliance য়ে ২৩২ খন আসন লাভ কৰিছে। এই সংখ্যা লোকসভাৰ মুঠ সংখ্যাৰ ১৮%। এনে পৰিস্থিতিত স্পষ্ট হৈ পৰিছে যে লোকসভাত বিৰোধী দলপতিৰ পদ কেৱল কংগ্ৰেছকহে আগবঢ়োৱা হ’ব।
কংগ্ৰেছ দলৰ সূত্ৰ অনুসৰি ৰাহুল গান্ধীয়ে লোকসভাত বিৰোধী দলৰ নেতা পদৰ বাবে অস্বীকাৰ কৰাৰ পিছত তিনিজন জ্যেষ্ঠ নেতা কুমাৰী চেলজা, গৌৰৱ গগৈ আৰু মনীষ তিৱাৰীৰ নাম বিবেচনা কৰা হৈছে। অসমৰ যোৰহাটৰ পৰা নিৰ্বাচনত জয়লাভ কৰি লোকসভাত উপস্থিত হৈছে গৌৰৱ গগৈ। গান্ধী পৰিয়ালৰ লগতো তেওঁৰ ঘনিষ্ঠ।
যদিহে সকলো ঠিকে ঠাকে থাকে তেন্তে গৌৰৱ গগৈয়ে সংসদত বিৰোধী দলপতি হিচাপে অসমৰ প্ৰথমগৰাকী নেতা হোৱাৰ গৌৰৱ অৰ্জন কৰিব। একপ্ৰকাৰ ইতিহাস সৃষ্টি কৰিব গৌৰৱ গগৈয়ে।
উল্লেখ্য যে, ২০১৯ চনৰ নিৰ্বাচনত পৰাজয়ৰ পাছত ৰাহুল গান্ধীয়ে কংগ্ৰেছৰ সভাপতি পদ ত্যাগ কৰিছিল। অৱশেষত মল্লিকাৰ্জুন খৰ্গেক কংগ্ৰেছৰ সভাপতি নিযুক্তি দিয়া হৈছিল। সূত্ৰ অনুসৰি ৰাহুল গান্ধীয়ে এতিয়াও কোনো পদ গ্ৰহণৰ পৰা বিৰত আছে।
আনহাতে যদি গৌৰৱ গগৈয়ে সংসদৰ বিৰোধী নেতাৰ পদ লাভ কৰে তেন্তে, বিৰোধী নেতা হিচাপে কেবিনেট মন্ত্ৰীৰ সমানে দৰমহা, ভাট্টা আৰু অন্যান্য সা-সুবিধা লাভ কৰিব। কেবিনেট মন্ত্ৰীৰ দৰে চৰকাৰী বাংলো, বাহন আৰু ১৪ জনীয়া কৰ্মচাৰীও লাভ কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
