৮০সংখ্যক স্বাধীনতা দিৱস উপলক্ষে কংগ্ৰেছৰ মুখ্য কাৰ্যালয়তো পতাকা উত্তোলন অনুষ্ঠানৰ আয়োজন কৰা হয়। এই অনুষ্ঠানত দলৰ নেতা-কৰ্মীসকলে দেশৰ স্বাধীনতা আন্দোলনত অৱদান আগবঢ়োৱা স্বাধীনতা সংগ্ৰামীসকলক স্মৰণ কৰে। অনুষ্ঠানৰ মাজতে ‘বন্দে মাতৰম’ৰ সম্পূৰ্ণ সংস্কৰণ গোৱাক লৈ বিতৰ্কৰ সৃষ্টি হয়। প্ৰতিবেদন অনুসৰি, পতাকা উত্তোলন কাৰ্যসূচীৰ সময়ত ‘বন্দে মাতৰম’ৰ সম্পূৰ্ণ সংস্কৰণ গোৱাৰ ক্ষেত্ৰত ছোনিয়া গান্ধীয়ে আপত্তি প্ৰকাশ কৰা দেখা যায়।
এই ঘটনাৰ সৈতে জড়িত এটা ভিডিঅ’ও প্ৰকাশ পাইছে। ভিডিঅ’টোত ছোনিয়া গান্ধীয়ে ‘বন্দে মাতৰম’গানটো বাজি থকা সময়ত হাতৰে ইংগিত দিয়া দেখা যায়। অৱশ্যে কি উদ্দেশ্যে এই ইংগিত দিয়া হৈছিল তাৰ নিশ্চিত তথ্য পোহৰলৈ অহা নাই। সেই সময়ত তেওঁৰ কাষতে কংগ্ৰেছ সভাপতি মল্লিকাৰ্জুন খৰ্গেও থিয় হৈ আছিল। একেদৰে ৰাহুল গান্ধীকো হাতৰে ইংগিত কৰা দেখা যায়। এই বিষয়টো সন্দৰ্ভত কংগ্ৰেছ নেতা শ্বকীল আহমেদে প্ৰতিক্ৰিয়া প্ৰকাশ কৰে। তেওঁ কয় যে-কংগ্ৰেছৰ কাৰ্যসূচীত পূৰ্বৰে পৰাই ‘বন্দে মাতৰম’ৰ দুটা স্তৱক গোৱা হৈ আহিছে। কিন্তু এইবাৰ অনুষ্ঠানত ছয়টা স্তৱক গোৱা হয়। শ্বকীল আহমেদে লগতে কয় যে কংগ্ৰেছৰ সৈতে ‘বন্দে মাতৰম’ৰ সম্পৰ্ক বহু পুৰণি। ভাৰতৰ স্বাধীনতা আন্দোলনৰ সময়ৰ পৰাই কংগ্ৰেছৰ বিভিন্ন কাৰ্যসূচীত এই গীতটো গোৱা হৈ আহিছে। অৱশ্যে কংগ্ৰেছৰ মুখ্য কাৰ্যালয়ত ‘বন্দে মাতৰম’ গীতটো পৰিৱেশন কৰাক লৈ ৰাহল গান্ধী আৰু ছোনিয়া গান্ধীৰ এই ইংগিতৰ প্ৰকৃত কাৰণ কি সেই সন্দৰ্ভত কোনো প্ৰতিক্ৰিয়া প্ৰকাশ কৰা নাই দুয়োগৰাকী কংগ্ৰেছ নেতৃত্বই।
এইবাৰ স্বাধীনতা দিৱসৰ কেন্দ্ৰীয় অনুষ্ঠানতো ‘বন্দে মাতৰম’ৰ সম্পূৰ্ণ সংস্কৰণ গোৱাক লৈ বিশেষ চৰ্চা হয়। প্ৰধানমন্ত্ৰী নৰেন্দ্ৰ মোদীয়ে পতাকা উত্তোলন কৰাৰ পূৰ্বে ‘বন্দে মাতৰম’ গীতটো পৰিৱেশন কৰা হয়। ‘বন্দে মাতৰম’ ভাৰতৰ স্বাধীনতা আন্দোলনৰ সৈতে গভীৰভাৱে জড়িত এক গুৰুত্বপূৰ্ণ গীত। দীৰ্ঘদিন ধৰি দেশৰ বিভিন্ন ৰাষ্ট্ৰীয় অনুষ্ঠানত ইয়াৰ নিৰ্বাচিত স্তৱকসমূহ পৰিৱেশন কৰা হৈ আহিছে। এইবাৰ সম্পূৰ্ণ সংস্কৰণৰ পৰিৱেশনে নতুনকৈ চৰ্চাৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
