অসম লাইভ ২৪ঃ অপেক্ষাৰ অৱসান। আৰু মাত্ৰ ৭৩ দিনৰ অপেক্ষা। তাৰ পাছতেই ভাৰতৰ বজাৰত উপলব্ধ হ’ব ভাৰতত প্ৰস্তুত কৰা ক’ৰোনা ভেকচিন COVISHIELD। ভাৰতৰ সৰ্ববৃহৎ ঔষধ প্ৰস্তুতকাৰী সংস্থা ‘ছেৰাম ইনষ্টিটিউট অব্ ইণ্ডিয়া’ই এই ভেকচিন প্ৰস্তুত কৰিছে। কেৱল সেয়াই নহয়, এই ভেকচিন প্ৰত্যেক দেশবাসীকে বিনামূল্যে দিয়াৰ দায়িত্ব লৈছে ভাৰত চৰকাৰে। ভেকচিনৰ ট্ৰায়েল চলি আছে আৰু ট্ৰায়েল শেষ হ’বলৈ লাগিব ৫৮ দিন। ভেকচিনৰ ট্ৰায়েল শীঘ্ৰেই সমাপ্ত কৰিবলৈ ইতিমধ্যে ইনষ্টিটিউটটোত বিশেষ লাইচেন্স প্ৰদান কৰিছে ভাৰত চৰকাৰে। ভাৰতত এই COVISHIELDৰ তৃতীয় পৰ্যায়ৰ ট্ৰায়েল চলি আছে। তৃতীয় পৰ্যায়ত প্ৰথম ড’জৰ ভেকচিন দিয়া হয় ২২ আগষ্টত। প্ৰথম ড’জৰ ২৯ দিনৰ পাছত দ্বিতীয় ড’জ দিয়াৰ পৰিকল্পনা চলি আছে। দ্বিতীয় ড’জৰ ভেকচিন দিয়াৰ ১৫ দিনৰ পাছত ভেকচিনৰ কাৰ্যকৰিতা সম্পৰ্কে প্ৰতিবেদন দাখিল কৰা হ’ব। ভাৰতৰ ১৭টা কেন্দ্ৰত মুঠ ১,৬০০ জনৰ শৰীৰত ভেকচিনৰ ট্ৰায়েল চলিছে। ট্ৰায়েল প্ৰক্ৰিয়া সম্পন্ন হোৱাৰ পাছতহে ছেৰাম ইনষ্টিটিউটৰ পৰা প্ৰায় ৬৮ কোটি COVISHIELD ভাৰত চৰকাৰে ক্ৰয় কৰি সাধাৰণ মানুহক বিনামূলীয়াকৈ প্ৰদান কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
