বৰপেটাৰ সৰ্থেবাৰী আৰক্ষী থানাৰ অন্তৰ্গত চতলা গাঁৱত এখন বিবাহক কেন্দ্ৰ কৰি সৃষ্টি হৈছে উত্তপ্ত পৰিস্থিতি। অভিযোগ অনুসৰি, বিয়াৰ বাবে অহা দৰা মকবুল আলী ইতিমধ্যে বিৱাহিত আৰু তেওঁ এটি সন্তানৰ পিতৃ। কিন্তু এই তথ্য কইনা পক্ষৰ আগত কৌশলেৰে লুকুৱাই ৰাখিছিল মকবুল আলী আৰু তেওঁৰ পৰিয়ালে। জানিব পৰা মতে, চতলা গাঁৱৰ এগৰাকী যুৱতীৰ সৈতে নলবাৰী জিলাৰ লচিমা গাঁৱৰ মকবুল আলীৰ বিৱাহৰ কথা চলিছিল। দুয়োটা পৰিয়ালৰ মাজত আলোচনাৰ পাছত বিয়াৰ দিন-বাৰো ঠিক কৰা হৈছিল। সেই অনুসৰি দেওবাৰে লচিমা গাঁৱৰ পৰা দৰা মকবুল আলী কইনা ঘৰলৈ বিয়া কৰাবলৈ আহিছিল।
কিন্তু বিয়াৰ অনুষ্ঠান চলি থকাৰ সময়তে কইনা পক্ষৰ লোকসকলে মকবুল আলীৰ পূৰ্বৰ বৈৱাহিক জীৱনৰ বিষয়ে জানিব পাৰে বুলি অভিযোগ উঠিছে। বহু বিৱাহ সন্দৰ্ভত মুখ্যমন্ত্ৰী হিমন্ত বিশ্ব শৰ্মাৰ কঠোৰ পদক্ষেপকো একপ্ৰকাৰ ভেঙুচালি কৰি মকবুল আলী পূৰ্বৰে পৰা এগৰাকী মহিলাৰ সৈতে সামাজিকভাৱে বিৱাহপাশত আবদ্ধ হোৱাৰ লগতে আইনীভাৱেও বিৱাহিত হোৱাৰ পিছতো পুনৰ বিৱাহপাশত আৱদ্ধ হব খোজা বিষয়টোৱে চৰ্চা লাভ কৰিছে। প্ৰাপ্ত খবৰ অনুসৰি মকবুলৰ এটি পুত্ৰ সন্তান থকাৰ কথাও পোহৰলৈ আহে। কইনা পক্ষৰ অভিযোগ, মকবুল আলীয়ে নিজৰ পূৰ্বৰ বিৱাহ আৰু সন্তান থকাৰ বিষয়টো গোপন কৰি নতুন বিৱাহৰ বাবে সন্মতি দিছিল। এই কথা বিয়াৰ দিনাই জানিব পাৰি কইনা পক্ষৰ মাজত তীব্ৰ ক্ষোভৰ সৃষ্টি হয়।
মকবুলৰ এই গোপন অভিসন্দিৰ কথা ৰাজহুৱা হৈ পৰাৰ পিছতে পৰিস্থিতি উত্তপ্ত হৈ পৰে। কইনা পক্ষই দৰাঘৰীয়াৰ লোকসকলক আবদ্ধ কৰি ৰাখে। ঘটনাটোক কেন্দ্ৰ কৰি চতলা গাঁৱত উত্তেজনাময় পৰিস্থিতিৰ সৃষ্টি হয়। ইফালে, অভিযুক্ত মকবুল আলীক আৰক্ষীয়ে সুৰক্ষা দিয়াৰো অভিযোগ উত্থাপন কৰিছে কইনা পক্ষই। অৱশ্যে আৰক্ষীৰ ফালৰ পৰা এই অভিযোগ সন্দৰ্ভত কি বক্তব্য দিয়া হৈছে, সেয়া স্পষ্ট হোৱা নাই।
ঘটনাটোক কেন্দ্ৰ কৰি স্থানীয় লোকৰ মাজতো বিভিন্ন প্ৰতিক্ৰিয়াৰ সৃষ্টি হৈছে। কইনা পক্ষৰ অভিযোগ যদি সত্য হয়, তেন্তে পূৰ্বৰ বিৱাহৰ তথ্য গোপন কৰি নতুন বিবাহৰ বাবে আগবাঢ়ি অহাৰ বিষয়টোৱে একাধিক প্ৰশ্নৰ সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
