ধ্বংসলীলা চলাবলৈ আহি আছে ঘূৰ্ণীবতাহ ৰেমাল, উত্তৰ-পূৱৰ কেইবাখনো ৰাজ্যলৈ ৰেড এলাৰ্ট, বহু হাজাৰ লোকক স্থানান্তৰিত
দেওবাৰে অৰ্থাৎ আজি পশ্চিম বংগ আৰু বাংলাদেশৰ উপকূলত আঘাত হানিব ‘ৰেমাল’ ঘূৰ্ণীবতাহ ধুমুহাই। এই ঘূৰ্ণীবতাহ বাবে সুৰক্ষাৰ প্ৰস্তুতি আৰম্ভ কৰিছে বিষয়াসকলে। কলকাতা বিমানবন্দৰৰ কাম-কাজ ইতিমধ্যে স্থগিত ৰখাৰ নিৰ্দেশ। এই ধুমুহাৰ বাবে বংগ আৰু উত্তৰ ওড়িশাত অত্যন্ত প্ৰবল বৰষুণৰ সৈতে ঘণ্টাত ১৩০ কিলোমিটাৰ বেগত বতাহ বলি আছে।
ভাৰতৰ বতৰ বিজ্ঞান বিভাগে কলকাতা, হাওৰা, পূব মিদনাপুৰকে ধৰি পশ্চিম বংগৰ বহু জিলাৰ বাবে ৰেড এলাৰ্ট জাৰি কৰিছে। উপকূলত খুন্দা মৰা ঘূৰ্ণীবতাহ ধুমুহা ‘ৰেমাল’ৰ ফলত পশ্চিম বংগ আৰু বাংলাদেশৰ উপকূলীয় অঞ্চলত ১.৫ মিটাৰ পৰ্যন্ত ওখ ঢৌৰ সৃষ্টি হ’ব পাৰে।
দক্ষিণ ২৪ পৰগনাছৰ প্ৰশাসনৰ ফালৰ পৰা প্ৰস্তুতিৰ সন্দৰ্ভত কয় যে, ইতিমধ্যে নিম্ন আৰু স্পৰ্শকাতৰ অঞ্চল চিনাক্ত কৰা হৈছে। প্ৰথম অৱস্থাত পৰিকল্পনা অনুসৰি নিম্নসমতলীয় স্থানৰ পৰা প্ৰায় ৮,০০০-১০,০০০ লোকক সুৰক্ষাজনিত কাৰণত আশ্ৰয় শিবিৰলৈ স্থানান্তৰিত কৰা হৈছে।
ইয়াৰ বাহিৰেও আজি বিয়লিৰ পৰা ২১ ঘণ্টাৰ বাবে কলকাতা বিমানবন্দৰৰ পৰা সকলো বিমান সেৱা বন্ধ কৰি দিয়া হৈছে। এই সময়ছোৱাত ৩৯৪খন ঘৰুৱা আৰু আন্তঃৰাষ্ট্ৰীয় বিমান সেৱা বাতিল কৰা হ’ব।
একে সময়তে সাধাৰণতে কলকাতা আৰু হাওৰাৰ আশে-পাশে থকা জিলাৰ সৈতে সংযোগ কৰা ছিলডা আৰু হাওৰা দুয়োটা সংমণ্ডলৰ বহু স্থানীয় ৰে’লো বাতিল কৰা হৈছে। আজি সন্ধিয়াৰ পৰা ১২ ঘণ্টাৰ বাবে সকলো কাৰ্গো আৰু কণ্টেইনাৰ হেণ্ডলিং কাম বন্ধ কৰিবলৈ নিৰ্দেশ জাৰি কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
