ডিজিটেল ডেস্কঃ ডাউদ ইব্ৰাহিমৰ স্বাস্থ্যৰ অৱস্থা অতিকৈ সংকটজনক। কাৰাচীৰ এখন হস্পাতালত মৃত্যুৰ ক্ষণ গণা বুলি সৰ্বত্ৰে বাতৰি প্ৰচাৰ হৈছে। ডাউদৰ এই খবৰৰ মাজতে চৰ্চিত হৈছে ইয়াৰ সৈতে জড়িত আন এক খবৰ। ডাউদ ইব্ৰাহিমক বিহ পাণ কৰোৱাৰ খবৰ প্ৰথমে কোন সাংবাদিকে লাভ কৰিছিল! কোন সাংবাদিকে প্ৰথমে বাতৰি পৰিৱেশন কৰিছিল যে, ডাউদ ইব্ৰাহিমক বিহ পাণ কৰোৱা হৈছে!
ডাউদক বিহ পাণ কৰোৱাৰ খবৰ প্ৰথমে লাভ কৰিছিল এগৰাকী পাকিস্তানী মহিলা সাংবাদিকে। আৰু সেই মহিলা সংবাদিকগৰাকীয়ে খবৰ পৰিৱেশন কৰাৰ পাছতেই সমগ্ৰ বিশ্বই লাভ কৰিছিল ডাউদৰ খবৰ। অতিকৈ নিৰ্ভীক আৰু স্পষ্টবাদী পাকিস্তানৰ সেই মহিলা সাংবাদিকগৰাকী হৈছে আৰজু কাজমী। পোনপ্ৰথমে আৰজু কাজমীয়ে ডাউদৰ এই খবৰটো পৰিৱেশন কৰাৰ পাছতে বিজুলী বেগেৰে সমগ্ৰ বিশ্বত বিয়পি পৰিছিল ডাউদৰ স্বাস্থ্যৰ অৱনতিৰ কথা।
পূৰ্বৰে পৰাই মধুমেহৰ লগতে অন্যান্য বহু ৰোগত আক্ৰান্ত ডাউদক হস্পাতালত ভৰ্তি হৈ থকাৰ খবৰো পাইছিল পাক সাংবাদিকগৰাকীয়ে। হস্পাতালৰ বিচনাতে কোনোৱে বিহ খুৱাই দিয়াৰ পাছত ডাউদৰ স্বাস্থ্য অধিক অৱনতি ঘটিছিল। এই সকলোবোৰ খবৰ পুংখানুপুংখভাৱে পৰিৱেশন কৰিছিল সাংবাদিক আৰজু কাজমীয়ে। এক ভিডিঅযোগে আৰজু কাজমীয়ে এই সকলোবোৰ কথাৰ সৈতে অন্য এক গুৰুত্বপূৰ্ণ প্ৰসংগও চৰ্চালৈ আনিছে।
আৰজু কাজমীয়ে বাতৰিটোত উল্লেখ কৰিছে যে, ডাউদ বৰ্তমান হস্পাতালত আছেনে নাই, তাৰ সঠিক তথ্য কাৰোৰে হাতত নাই। আৰু কোনোবাই যদি এই তথ্য উদঘাটন কৰিবলৈ যায় তাৰো বিপদ অনিবাৰ্য। সংবাদিকগৰাকীয়ে লগতে কয় যে, পাকিস্তানত ইতিমধ্যে ইন্টাৰনেট সেৱা কৰ্তন কৰা হৈছে। গুগলৰ পৰা আদি কৰি কোনো ছচিয়েল মিডিয়াৰ প্লেটফৰ্ম অচল হৈ পৰিছে পাকিস্তানত। গতিকে এনে পৰিৱেশত সকলোবোৰ খবৰ ধূসৰ হৈ পৰিছে।
পাক সাংবাদিকগৰাকীয়ে তেওঁৰ সমগ্ৰ কথা-বতৰাত এটা কথা সঘনাই উল্লেখ কৰিছে যে, ডাউদৰ ক্ষেত্ৰত কিবা অঘটনো ঘটিব পাৰে। এই অঘটনৰ কথা স্পষ্টকৈ নকলেও কোনো কোনোৱে সন্দেহ প্ৰকাশ কৰিছে যে, ডাউদৰ স্বাস্থ্যক লৈ পাকিস্তানে বহু কথাই লুকুৱাব বিচাৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
