ডেনমাৰ্ক চৰকাৰে মছজিদসমূহত লাউডস্পীকাৰযোগে আজান দিয়াৰ ব্যৱস্থাৰ ওপৰত নিষেধাজ্ঞা আৰোপ কৰাৰ প্ৰসংগ বিবেচনাধীন হৈ আছে। দেশখনৰ এগৰাকী মন্ত্ৰী মৰ্টেন বডস্কভে কয় যে-এই বিষয়ত আইনী দিশসমূহ পুনৰ পৰ্যালোচনা কৰা হ’ব আৰু ইয়াৰ বাবে এক পৰিকল্পনা প্ৰস্তুত কৰা হৈছে। আন্তঃৰাষ্ট্ৰীয় সংবাদমাধ্যম এক প্ৰতিবেদন অনুসৰি, মন্ত্ৰী বডস্কভে মন্তব্য কৰে যে-ডেনমাৰ্কৰ কিছুমান অঞ্চল ‘ইছলামাবাদৰ দৰে’ যেন অনুভৱ হয়। তেওঁৰ মতে-দেশত ক্ৰমবৰ্ধমান ‘ইছলামীকৰণ’ৰ আশংকাৰ বাবেই লাউডস্পীকাৰযোগে আজান দিয়াৰ ওপৰত আইনীভাৱে নিষেধাজ্ঞা আৰোপ কৰাৰ প্ৰসংগটো বিবেচনা কৰা হৈছে। ডেনমাৰ্কৰ ক্ষমতাত থকা ছ’চিয়েল ডেম’ক্ৰেটছ পাৰ্টিয়ে মছজিদত লাউডস্পীকাৰ ব্যৱহাৰ সীমিত কৰাৰ বাবে ইতিপূৰ্বেও দুবাৰ চেষ্টা চলাইছিল। মছজিদত লাউডস্পীকাৰ বন্ধ কৰাৰ দলটোৰ এয়া তৃতীয়টো চেষ্টা।
আইনী পৰ্যালোচনাত আছে প্ৰস্তাৱ
দেশখনত মছজিদসমূহত লাউডস্পীকাৰ ব্যৱহাৰত নিষেধাজ্ঞা আৰোপ হ’ব নে নাই ইয়াৰ চূড়ান্ত সিদ্ধান্ত হোৱা নাই। চৰকাৰী বিষয়াসকলে পৰীক্ষা কৰি আছে যে ডেনমাৰ্কৰ সংবিধানে নিশ্চিত কৰা ধৰ্মীয় স্বাধীনতা আৰু উপাসনাৰ অধিকাৰৰ সৈতে এনে নিষেধাজ্ঞা সামঞ্জস্যপূৰ্ণ হ’ব নে নহয়। সেয়েহে এই বিষয়টো এতিয়াও পৰ্যালোচনাৰ পৰ্যায়তে আছে। ডেনমাৰ্কত লাউডস্পীকাৰযোগে আজান দিয়াক লৈ পূৰ্বেও বিতৰ্কৰ সৃষ্টি হৈছিল। যদিও এতিয়ালৈকে দেশজুৰি সম্পূৰ্ণ নিষেধাজ্ঞা আৰোপ কৰা হোৱা নাই, তথাপিও কোপেনহেগেনকে ধৰি কিছুমান ঠাইত শব্দ-নিয়ন্ত্ৰণ সম্পৰ্কীয় স্থানীয় নিয়মৰ বাবে লাউডস্পীকাৰৰ ব্যৱহাৰ ইতিমধ্যে সীমিত কৰা হৈছে। ইয়াৰ সমান্তৰালভাৱে, ডেনমাৰ্কে ধৰ্মীয় উত্তেজনা বা উচটনি ৰোধৰ ক্ষেত্ৰতো কিছুমান কঠোৰ ব্যৱস্থা গ্ৰহণ কৰিছে। ২০২৩ চনত দেশখনে ধৰ্মীয় গ্ৰন্থৰ অপমান ৰোধৰ উদ্দেশ্যে এক আইনো প্ৰণয়ন কৰিছিল।
ডেনমাৰ্কত মুছলিম জনসংখ্যা
প্ৰায় ৬০ লাখ জনসংখ্যাৰ ডেনমাৰ্কত অধিকাংশ লোকে খ্ৰীষ্টান ধৰ্ম পালন কৰে। কিন্তু বিগত কিছু বছৰত দেশখনত মুছলিম জনসংখ্যা বৃদ্ধি পাইছে। বিশেষকৈ ভাৰত, পাকিস্তান আদি দক্ষিণ এছিয়াৰ দেশৰ পৰা যোৱা বহু লোক ডেনমাৰ্কত বসবাস কৰি আছে। উপলব্ধ তথ্য অনুসৰি, ডেনমাৰ্কত প্ৰায় ২.৭ লাখ মুছলিম লোক বাস কৰে আৰু দেশখনৰ বিভিন্ন প্ৰান্তত প্ৰায় ১০০টাতকৈও অধিক মছজিদ আছে। শেহতীয়াকৈ সমগ্ৰ ইউৰোপতে প্ৰব্ৰজনবিৰোধী মনোভাৱ ক্ৰমাৎ তীব্ৰ হৈ উঠিছে। ইয়াৰ প্ৰভাৱ বিশেষকৈ মুছলিম সম্প্ৰদায় আৰু দক্ষিণ এছিয়াৰ অভিবাসীসকলৰ ওপৰত পৰা দেখা গৈছে। ডেনমাৰ্কতো হিজাব, ইছলামিক ৰীতি-নীতি আৰু অভিবাসন নীতিক কেন্দ্ৰ কৰি বিভিন্ন সময়ত ৰাজনৈতিক আৰু সামাজিক বিতৰ্ক চলি আহিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
