ৰাছিয়াই ইউক্ৰেইন আক্ৰমণ কৰাৰ পিছৰে পৰা ভাৰতে কূটনৈতিকভাৱে সংকটত পৰা দেখা গৈছে৷ নতুন দিল্লীৰ অৱস্থা ন যযৌ ন তস্থৌ হৈছে৷ এই মন্তব্য দেশৰ কূটনৈতিক বিশেষজ্ঞসকলৰ৷ যাৰ ফলত আমেৰিকাৰপৰা ভাৰতে অৰ্থনৈতিক নিষেধাজ্ঞা সন্মুখীন হোৱাৰো এক অৱস্থাৰ সৃষ্টি হৈছে৷
উল্লেখ্য যে ৰাছিয়াই ইউক্ৰেইন আক্ৰমণ কৰি যুদ্ধ সূচনা কৰাৰ পিছতে বিশ্বৰ অধিকাংশ দেশেই মুকলিকৈ যুদ্ধৰ বিৰোধিতা কৰিছে৷ আনকি আমেৰিকাই ৰাছিয়াক গৰিহণা দি ৰাষ্ট্ৰসংঘৰ মজিয়াত উত্থাপন কৰা গৰিহণা প্ৰস্তাৱত বিশ্বৰ অধিকাংশ দেশেই প্ৰস্তাৱৰ সপক্ষে ভোটদান কৰিছে৷ কিন্তু চীনসহ ভাৰতে বাৰে বাৰে ভোটদানৰ পৰা বিৰত আছে৷ ইয়াৰ কাৰণ হিচাপে কূটনৈতিক বিশেষজ্ঞসকলে ভাৰতৰ দুই নাৱত দুই ভৰি অৱস্থাটোকে চিহ্ণিত কৰিছে৷
সাম্প্ৰতিক বিশ্ব ৰাজনৈতিক পৰিস্থিতিৰ বাবেই ভাৰতে ৰাছিয়াক বিৰোধিতা নকৰাকৈ থকা নাই, ভাৰতে ৰাছিয়াক মুকলিকৈ বিৰোধিতা নকৰাৰ বহুকেইটা কাৰণৰ ভিতৰত শীতল যুদ্ধ আৰু তৎজনিত পৰিস্থিতিত উৎপত্তি হোৱা বিশ্বৰ ৰাজনৈতিক পৰিস্থিতি আৰু ১৯৭১ চনত বাংলাদেশৰ মুক্তিযুদ্ধৰ সময়ত ৰাছিয়াই ভাৰতক কৰা সহযোগিতাও আছে৷
লগতে পঢ়ক দুৰ্ভাগ্য! ‘যুদ্ধবাজ এখন দেশ এৰি আকৌ এখন যুদ্ধৰ সন্মুখীন হ’লো’
ইয়াৰ ভিতৰত কাশ্মীৰ প্ৰসংগটোও আছে৷ ভাৰতৰ বিবদামান কাশ্মীৰৰ সমস্যাটোৰ ক্ষেত্ৰত ৰাষ্ট্ৰসংঘত ৰাছিয়াই ভাৰতক সম্পূৰ্ণ সমৰ্থন কৰিছিল৷ উল্লেখ্য যে ২০১৯-২০ চনত চীনে ৰাষ্ট্ৰসংঘত কাশ্মীৰৰ বিষয়টো উত্থাপন কৰিলেও ৰাছিয়াই চীনৰ পক্ষে ন’লৈ ভাৰতৰ পক্ষত থিয় দিছিল৷
ইফালে ভাৰতে প্ৰতিৰক্ষাৰ ক্ষেত্ৰত সৰ্বাধিকভাৱে নিৰ্ভৰশীল ৰাষ্ট্ৰখনেই হৈছে ৰাছিয়া৷ ভাৰতে ৰাছিয়াৰ পৰাই সৰ্বাধিক যুদ্ধাস্ত্ৰ, যুদ্ধ বিমান ক্ৰয় কৰিছে৷ অৰ্থাৎ ভাৰতৰ বাবে সৰ্বাধিক অস্ত্ৰ সৰবৰাহ কৰা ৰাষ্ট্ৰখন হৈছে ৰাছিয়া৷ বৰ্তমান ভাৰতে ৰাছিয়াৰ পৰা চাৰিটা এছ ৪০০ যুদ্ধাস্ত্ৰ সংগ্ৰহ কৰিবলৈ আছে৷
ৰাছিয়াৰ বিৰুদ্ধে গৈ ভাৰতে ৰাছিয়াৰ সৈতে থকা প্ৰতিৰক্ষা চুক্তিসমূহ উলংঘন কৰিব খোজা নাই৷ ভাৰতৰ বাবে এনে এখন বিশ্বস্ত আৰু নিৰ্ভৰশীল ৰাষ্ট্ৰৰ সৈতে থকা সকলো ধৰণৰ দ্বিপাক্ষিক সম্পৰ্ক ভাৰতে কূটনৈতিক কাৰণতে নষ্ট কৰিব খোজা নাই৷ ৰাছিয়াৰ ওপৰত প্ৰতিৰক্ষা সঁজুলিৰ ক্ষেত্ৰত নিৰ্ভৰশীল ভাৰতে এই সময়ত কৰা এটা ভুলৰ আচিলা লৈ ৰাছিয়াই প্ৰতিৰক্ষা সঁজুলিসমূহৰ মূল্য বৃদ্ধি কৰি ভাৰতৰ ওপৰত প্ৰতিশোধো ল’ব পাৰে৷
লগতে পঢ়ক সংকটত ৰাছিয়া! ৰেকৰ্ডিং ভাইৰেল, কেন্দ্ৰীয় আৰ্দেশ নামানে পদাতিক ৰুছ সেনাই!
আনহাতে, অন্য এটা কাৰণ হৈছে চীন ভাৰতৰ সংঘাত৷ চীনেই ৰাছিয়াৰ বিৰুদ্ধে আমেৰিকাই উত্থাপন কৰা গৰিহণা প্ৰস্তাৱত ভোটদান নকৰাই নহয়, চীনে ৰাছিয়াৰ ইউক্ৰেইন আক্ৰমণক মুকলিকৈ সমৰ্থনো কৰিছে৷ অৰ্থাৎ যুদ্ধৰ আচিলাৰে ৰাছিয়াৰ সৈতে চীনৰ ঘনিষ্ঠতা বৃদ্ধি পোৱাটো ভাৰতৰ বাবে কেৱল কূটনৈতিকভাৱেই বিপদজনক নহয়, ইয়ে ভাৰতৰ আভ্যন্তৰীণ নিৰাপত্তা আৰু সুৰক্ষাকো বিঘ্নিত কৰিব৷
স্মৰ্তব্য যে যোৱা দুটামান বৰ্ষৰ ভিতৰত কাশ্মীৰৰ লাডাখ আৰু অৰুণাচল প্ৰদেশৰ সীমান্তত চীনে ভাৰতৰ সৈতে বিবাদত লিপ্ত হৈ আহিছে৷ চীনে এই সুযোগতে ৰাছিয়াৰ সৈতে ঘনিষ্ঠতা বৃদ্ধি কৰি ভাৰতৰ সীমান্ত নিৰাপত্তাৰ দিশটোক অস্থিৰ কৰি তুলিব পাৰে৷
এইবোৰ কাৰণতে ভাৰতে ৰাছিয়াৰ বিৰুদ্ধে অৱস্থান ল’বলৈ সাহস কৰা নাই৷ ইফালে ৰাছিয়াক মুকলিকৈ বিৰোধিতা নকৰাৰ বাবে আমেৰিকা যুক্তৰাষ্ট্ৰৰ সৈতে ভাৰতৰ দ্বিপাক্ষিক সম্পৰ্ক বিঘ্নিত হ’ব বুলিও কূটনৈতিক বিশেষজ্ঞসকলে ধাৰণা কৰিছে৷ ইয়াৰ বাবে ভাৰতে আমেৰিকাৰ অৰ্থনৈতিক নিষেধাজ্ঞাৰো সন্মুখীন হ’ব পাৰে বুলি কূটনৈতিক বিশেজ্ঞসকলে আংশকা কৰিছে৷ অৰ্থাৎ এইদৰেই দুয়োকুল ৰক্ষা কৰিবলৈ গৈ বিপদ পৰিব পাৰে ভাৰতে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ