অসম লাইভ২৪ঃ আগন্তুক শনিবাৰ অৰ্থাৎ ১৪ অক্টোবৰত মহালয়া বা সৰ্বপিতৃ অমাবস্যা। সেই দিনটোতেই আছে সূৰ্যগ্ৰহণো। চলিত বছৰত এয়াই শেষৰটো সূৰ্যগ্ৰহণ। তাৰপাছতেই কোজগৰী পূৰ্ণিমা বা লক্ষ্মী পূৰ্ণিমাত চন্দ্ৰগ্ৰহণ। শাস্ত্ৰ অনুসৰি সূৰ্যগ্ৰহণৰ বিশেষ প্ৰভাৱ সকলোসময়তে থাকে। জ্যোতিষবিদসকলে জনোৱা অনুসৰি কেইটামান কাম সূৰ্যগ্ৰহণত কাহানিও কৰিব নালাগে। এইকেইটা কাম সূৰ্যগ্ৰহণত কৰিলে আৰ্থিকভাৱে ক্ষতি হোৱাৰ সম্ভাৱনা থাকে। এই ক্ষতি ইমানেই বেছি হ’ব পাৰে যে এজন অৱস্থাপন্ন লোক দৰিদ্ৰ হৈয়ো যাব পাৰে।
সূৰ্য গ্ৰহণৰ সময়ত কৰা কিছু কামে আমাৰ জীৱনলৈ শুভ প্ৰভাৱো কঢ়িয়াই আনে। যদিও মহালয়াৰ দিনা সূৰ্যগ্ৰহণ ভাৰতত দেখা নাযাব তথাপিও গ্ৰহণৰ সময়ত এই কাম কৰিলে আমি শুভ ফল লাভ কৰিম। সূৰ্যগ্ৰহণৰ সময়ত কি কি কাম কৰিব জানি থওক।
যদি চাকৰিত উন্নতি কৰিব বিচাৰে তেন্তে সূৰ্য গ্ৰহণৰ সময়ত স্নান কৰি পৰিস্কাৰ কাপোৰ পৰিধান কৰক। তাৰপাছতেই সূৰ্যদেৱক ধ্যান কৰক। ধ্যান শেষ কৰি খেজুৰ, গম, ৰঙা কাপোৰ, তামৰ সামগ্ৰী দান কৰিব পাৰে। জ্যোতিষ শাস্ত্ৰ অনুসৰি সূৰ্যগ্ৰহণৰ সময়ত এই কাম কৰিলে কোষ্ঠীত সূৰ্যৰ অৱস্থান শক্তিশালী হয়।
সূৰ্যগ্ৰহণৰ পাছত সূৰ্যদেৱৰ পূজা আৰু মন্ত্ৰ জপ কৰিলেও সুফল লাভ কৰিব। ইয়াৰ ফলত সূৰ্যৰ আশীৰ্বাদত আপোনাৰ কেৰিয়াৰত উন্নতি হ’ব। গ্ৰহণৰ ওপৰিও সূৰ্যদেৱক তুষ্ট কৰিবলৈ প্ৰত্যেক দিনাই আদিত্য হৃদয় স্তোত্ৰ জপ কৰিব পাৰে।
জ্যোতিষশাস্ত্ৰ অনুসৰি সূৰ্যগ্ৰহণৰ পাছতেই সূৰ্য অষ্টকাম জপ কৰক। সংস্কৃতত ৰচিত এই মন্ত্ৰ জপ কৰিলে গ্ৰহদোষ আৰু অসুখ বিসুখৰ পৰা মুক্তি পোৱা যায়। সূৰ্য চালিছা পাঠ কৰক।
আপোনাৰ জন্মচকত যদি সূৰ্য দুৰ্বল হয় তেন্তে সূৰ্য গ্ৰহণ শেষ হোৱাৰ পাছত ৰঙা ফুল আৰু গুড় ইত্যাদি দান কৰক। ইয়াৰ ফলত কোষ্ঠীত সূৰ্য শক্তিশালী হৈ পৰিব। নিজৰ কেৰিয়াৰত উচ্চ স্থান অধিকাৰ কৰিব পাৰে।
সূৰ্যগ্ৰহণৰ পাছত তেজফল, ওক বা মদাৰ অথৱা সূৰ্যমুখী গছত নিয়মিত পানী ঢালিব। ইয়াৰ ফলত সূৰ্যৰ আশীৰ্বাদ আপোনাৰ ওপৰত থাকিব। এই গছসমূহ সূ্ৰ্যদেৱৰ অতি প্ৰিয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
