অসম লাইভ২৪ঃ পশ্চিম এছিয়াৰ আকাশত এতিয়া কেৱল ধোঁৱা, চৌপাশে বাৰুদৰ গোন্ধ। হামাছৰ বিৰুদ্ধে লেথাৰিকৈ চলিছে আক্ৰমণ। গাজা ষ্ট্ৰিপত এতিয়া গোলা-বাৰুদৰ শব্দৰ বাদে একো নাই। পেলেষ্টাইনী সন্ত্ৰাসবাদীৰ গোপন ঘাটিত আক্ৰমণ চলাইছে মাৰিয়া ইজৰাইলী এয়াৰফৰ্ছে। এই আক্ৰমণক লৈ আকৌ এবাৰ মন্তব্য আগবঢ়াইছে ইজৰাইলৰ প্রধানমন্ত্ৰী বেঞ্জামিন নেতানিয়াহু।
মধ্য-প্ৰাচ্যৰ ইতিহাস, ভূগোল সলনি কৰি দিয়াৰ হুংকাৰ দিছে প্ৰধানমন্ত্ৰী নেতানিয়াহুৱে। সোমবাৰে গাজাষ্ট্ৰীপ সংলগ্ন চহৰসমূহৰ মেয়ৰ আৰু চৰকাৰী অধিকাৰীসকলক লৈ জৰুৰী বৈঠকৰ আয়োজন কৰিছিল ইজৰাইলৰ প্ৰধানমন্ত্ৰী নেতানিয়াহুয়ে। সেই বৈঠকৰ পাছতেই তেওঁ সংবাদমাধ্যমৰ সন্মুখত কৰিছে কেইবাটাও মন্তব্য। নেতানিয়াহুৰ কণ্ঠত বাৰে বাৰে শুনা গৈছে ধমকিৰ সুৰ। ইজৰাইলৰ প্ৰধানমন্ত্ৰীয়ে সংবাদ মাধ্যমৰ সন্মুখত কয়, ‘গাজাক সম্পূৰ্ণৰূপে ধূলিৰ সৈতে মিলাই দিম। নৃশংসভাৱে আমাৰ দেশক আক্ৰমণ কৰা আক্ৰমণকাৰীসকলক আমি কোনো কাৰণতে এৰি নিদিও। মধ্যপ্ৰাচ্যৰ নক্সা সলোৱাৰ সময় আহিছে। আমি হাৰ নামানো। শেষ কৰিহে এৰিম।’
ইয়াৰোপৰি গাজাৰ সাধাৰণ জনতাক সেই স্থান ত্যাগ কৰিবলৈ আহ্বান জনাইছে ইজৰাইলৰ প্রধানমন্ত্ৰীয়ে। ইহুদীবাসীৰ বাবেও বিশেষ কিছু নিৰ্দেশনা জাৰি কৰিছে নেতানিয়াহুয়ে।
আগন্তুক ৪৮ ঘণ্টা ইজৰাইলবাসীৰ বাবে খুবেই গুৰুত্বপূৰ্ণ। জনতাক প্ৰয়োজনীয় খাদ্য, ঔষধ আৰু পানী সংগ্ৰহ কৰি ৰাখিবলৈ বাৰে বাৰে আহ্বান জনাইছে চৰকাৰী পক্ষই। বিশেষজ্ঞসকলৰ দাবী বৃহস্পতিবাৰৰ ভিতৰত আক্ৰমণৰ তীব্ৰতা আৰু বৃদ্ধি হোৱাৰ সম্ভাৱনা আছে। সেয়ে এই নিৰ্দেশিকা প্ৰদান কৰা হৈছে। স্থানীয় সংবাদমাধ্যম সূত্ৰৰ খবৰ অনুসৰি শনিবাৰে হামাছে চলোৱা আক্ৰমণৰ পাছতেই গাজাক চাৰিওফালৰ পৰা বেৰি ধৰিছে ইজৰাইলবাহিনীয়ে। বন্ধ কৰি দিয়া হৈছে পানী আৰু বিদ্যুৎ। দেওবাৰৰ পৰাই ইজৰাইলৰ টেঙ্কবাহিনীয়ে বেৰি আছে গাজাষ্ট্ৰীপ।
যুদ্ধৰ একাধিক ভিডিঅ’ ইতিমধ্যে সামাজিক মাধ্যমত পোষ্ট কৰিছে প্ৰধানমন্ত্ৰী নেতানিয়াহুৱে। ইজৰাইলী প্ৰতিৰক্ষামন্ত্ৰীৰ মন্ত্ৰণালয়ে জনোৱা অনুসৰি, সন্ত্ৰাসবাদীসকলৰ গুলীত প্ৰাণ
হেৰুৱাইছে এজন লেফ্টেনেণ্ট কৰ্ণেলে। বৰ্তমানলৈকে এই যুদ্ধত প্ৰাণ হেৰুৱাইছে ডেৰ হাজাৰৰো অধিকলোকে। ইজৰাইলী প্ৰতিৰক্ষামন্ত্ৰী য়েভ গেলাণ্টে এই সন্দৰ্ভত কয়, ‘আমি দীৰ্ঘকালীন যুদ্ধৰ বাবে প্ৰস্তুত হৈছো। আমাৰ সেনাই সেইধৰণে যুদ্ধ আগুৱাই নিছে।’ ইফালে হামাছক সমৰ্থন জনাইছে লেবাননেও। লেবানন সীমান্তৰ পৰা ইজৰাইলৰ ওপৰত মৰ্টাৰ আৰু কামানেৰে গুলী চলাই আছে পেলেষ্টাইনপন্থী সংগঠন হিজবুল্লাইয়ো। শনিবাৰে হামাছৰ আক্ৰমণৰ আঁৰত ইৰাণৰো হাত আছে বুলি সন্দেহ কৰিছে নেতানিয়াহু চৰকাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
