সঘনাই কথাবোৰ পাহৰে নেকি? এয়া হ’ব পাৰে ভয়ংকৰ ৰোগৰ লক্ষণ!

বৰ্তমান সময়ৰ জীৱনশৈলীত বহু লোকে এটা সময়ত মানসিকভাৱে ক্লান্তি অনুভৱ কৰে, অলস লাগে বা কোনো কামত মনোযোগ কেন্দ্ৰীভূত কৰিবলৈ অসুবিধা হয়। সাধাৰণতে ইয়াক সাধাৰণ ক্লান্তি বুলি ভাবি অৱহেলা কৰা হয়। কিন্তু যদি এই সমস্যা দীৰ্ঘদিন ধৰি অব্যাহত থাকে, তেন্তে ই ব্ৰেইন ফগ (Brain Fog)ৰ লক্ষণ হ’ব পাৰে।

বিশেষজ্ঞসকলৰ মতে, ব্ৰেইন ফগ নিজে কোনো পৃথক ৰোগ নহয়, বৰঞ্চ ই এটা লক্ষণ, যি বিভিন্ন শাৰীৰিক, মানসিক আৰু জীৱনশৈলীৰ সৈতে জড়িত সমস্যাৰ ফলত দেখা দিব পাৰে। ইয়াৰ সম্ভাৱ্য কাৰণসমূহৰ ভিতৰত আছে—পৰ্যাপ্ত নিদ্ৰাৰ অভাৱ, দীৰ্ঘদিনীয়া মানসিক চাপ, ভিটামিনৰ অভাৱ, হৰম’নৰ পৰিৱৰ্তন, সংক্রমণ বা আন কিছুমান স্বাস্থ্যজনিত সমস্যা।

ব্ৰেইন ফগ আৰু সাধাৰণ ক্লান্তিৰ মাজত পাৰ্থক্য

বিশেষজ্ঞৰ মতে, ওৰে দিনটো কাম কৰাৰ পিছত ক্লান্ত অনুভৱ কৰাটো স্বাভাৱিক। পৰ্যাপ্ত জিৰণি আৰু ভাল টেপনি হ’লে এই ক্লান্তি সাধাৰণতে দূৰ হয়। কিন্তু ব্ৰেইন ফগত কেৱল শৰীৰেই নহয়, মগজুৰ কাৰ্যক্ষমতাও প্ৰভাৱিত হয়। সাধাৰণ ক্লান্তিত জিৰণি লোৱাৰ পিছত ব্যক্তিয়ে নিজকে সুস্থ অনুভৱ কৰে। আনহাতে, ব্ৰেইন ফগত পৰ্যাপ্ত বিশ্ৰামৰ পিছতো মনোযোগ কেন্দ্ৰীভূত কৰা, তথ্য মনত ৰখা বা মানসিকভাৱে সক্ৰিয় হৈ থকাত অসুবিধা অব্যাহত থাকিব পাৰে।

ব্ৰেইন ফগৰ লক্ষণসমূহ

১. মনোযোগ কেন্দ্ৰীভূত কৰাত অসুবিধা
ব্ৰেইন ফগৰ অন্যতম সাধাৰণ লক্ষণ হ’ল দীঘলীয়া সময় ধৰি কোনো কামত মনোযোগ দিব নোৱাৰা। ব্যক্তিজন সহজেই বিভ্ৰান্ত হ’ব পাৰে, পঢ়া কথা সোনকালে পাহৰি যাব পাৰে বা এটা কাম সম্পূৰ্ণ কৰিবলৈ স্বাভাৱিকতকৈ অধিক সময় ল’ব পাৰে। দীৰ্ঘদিনীয়া মানসিক চাপ, নিদ্ৰাৰ অভাৱ আৰু মানসিক ক্লান্তিয়ে মনোযোগ নিয়ন্ত্ৰণ কৰা মগজুৰ অংশসমূহক প্ৰভাৱিত কৰিব পাৰে।

২. সদায় মানসিকভাৱে ক্লান্ত অনুভৱ কৰা
NCBIৰ মতে, যদি পুৱা টোপনিৰ পৰা উঠাৰ পিছতো মূৰ গধুৰ লাগে বা গোটেই দিনটো মানসিক শক্তিৰ অভাৱ অনুভৱ হয়, তেন্তে ইয়াক কেৱল কামৰ চাপ বুলি ধৰি লোৱা উচিত নহয়। দীৰ্ঘদিন ধৰি চলি থকা মানসিক ক্লান্তি ব্ৰেইন ফগ, অপৰ্যাপ্ত নিদ্ৰা, মানসিক চাপ বা পুষ্টিৰ অভাৱৰ লক্ষণ হ’ব পাৰে।

৩. সৰু-সুৰা কথাবোৰ বাৰে বাৰে পাহৰি যোৱা
আমেৰিকান ব্ৰেইন ফাউণ্ডেশ্যনৰ মতে, চাবি ক’ত ৰাখিছে, মোবাইল ক’ত থৈছে বা অলপ আগতে হোৱা কথা-বতৰা পাহৰি যোৱাটো ব্ৰেইন ফগৰ এটা সাধাৰণ লক্ষণ হ’ব পাৰে। যদিও মাজে মাজে পাহৰি যোৱাটো স্বাভাৱিক, কিন্তু যদি ইয়াৰ বাবে দৈনন্দিন জীৱনত অসুবিধা হ’বলৈ ধৰে, তেন্তে চিকিৎসকৰ পৰামৰ্শ লোৱা উচিত।

৪. সিদ্ধান্ত লোৱাত অসুবিধা
ব্ৰেইন ফগ থকা অৱস্থাত সৰু-সুৰা সিদ্ধান্ত ল’বলৈও অধিক সময় লাগিব পাৰে। বহুতে কয় যে আগৰ তুলনাত তেওঁলোকৰ কৰ্মক্ষমতা হ্ৰাস পাইছে আৰু একেলগে একাধিক কাম চম্ভালিবলৈ অসুবিধা হৈছে।

৫. কামত আগৰ দৰে আগ্ৰহ নথকা
দীৰ্ঘদিনীয়া মানসিক ক্লান্তিৰে যুঁজা ব্যক্তিৰ কৰ্মক্ষমতা আৰু আত্মবিশ্বাস দুয়োটাকে প্ৰভাৱিত কৰিব পাৰে। বহু ক্ষেত্ৰত ইয়াৰ সৈতে মানসিক চাপ, উদ্বেগ (Anxiety) বা হতাশা (Depression)ৰো সম্পৰ্ক থাকিব পাৰে। সেয়ে লক্ষণসমূহ দীৰ্ঘদিন ধৰি থাকিলে বিশেষজ্ঞ চিকিৎসকৰ পৰামৰ্শ লোৱা উচিত।

নিদ্ৰাৰ অভাৱ আৰু ব্ৰেইন ফগৰ সম্পৰ্ক

NCBIৰ তথ্য অনুসৰি, নিদ্ৰাৰ সময়ত মগজুৱে দিনটোত সংগ্ৰহ কৰা তথ্যসমূহ সজাই তোলে, স্মৃতিশক্তি শক্তিশালী কৰে আৰু মগজুৰ অপ্ৰয়োজনীয় বর্জ্য পদাৰ্থ আঁতৰোৱাত সহায় কৰে। যদি নিয়মিতভাৱে ৭–৯ ঘণ্টা মানসম্পন্ন টোপনি নহয়, তেন্তে মনোযোগ, শিকাৰ ক্ষমতা, সিদ্ধান্ত গ্ৰহণ আৰু সঁহাৰি দিয়াৰ ক্ষমতাৰ ওপৰত নেতিবাচক প্ৰভাৱ পৰিব পাৰে। সদায় মানসিকভাৱে ক্লান্ত অনুভৱ কৰাটো সকলো সময়তে সাধাৰণ ক্লান্তিৰ লক্ষণ নহয়। যদি মনোযোগ দিবলৈ অসুবিধা হয়, বাৰে বাৰে পাহৰি যায়, সিদ্ধান্ত লোৱাত কষ্ট হয় আৰু দীৰ্ঘদিন ধৰি মানসিক ক্লান্তি অনুভৱ হয়, তেন্তে সেয়া ব্ৰেইন ফগৰ লক্ষণ হ’ব পাৰে। ইয়াৰ আঁৰত নিদ্ৰাৰ অভাৱ, মানসিক চাপ, ভিটামিনৰ অভাৱ বা আন স্বাস্থ্যজনিত সমস্যা থাকিব পাৰে। সঠিক কাৰণ চিনাক্ত কৰি সময়মতে চিকিৎসা গ্ৰহণ কৰিলে অধিকাংশ ক্ষেত্ৰতে এই লক্ষণসমূহত উন্নতি সম্ভৱ।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ