ভয়ংকৰ ভূমিকম্পৰে কঁপি উঠিল ভাৰতৰ চুবুৰীয়া দেশ, ভাৰতৰো বহু ৰাজ্য উঠে কঁপি, আতংকিত জনতা
২০১৫ৰ ভয়ংকৰ ভূমিকম্পৰ ১০ বছৰ পাছত পুনৰ এক তীব্ৰ প্ৰাবল্যৰ ভূমিকম্পৰে কঁপি উঠিল ভাৰতৰ চুবুৰীয়া দেশ নেপাল। আজি শুকুৰবাৰে পুৱতি নিশা নেপালত অনুভুত হয় ৬.১ প্ৰাবল্যৰ ভূমিকম্প। সমগ্ৰ হিমালয় অঞ্চলত অনুভূত হয় ভূমিকম্পৰ কম্পন।
তাকো এবাৰ নহয়, দুবাৰকৈ ভূমিকম্পৰ কম্পন অনুভৱ কৰা হৈছিল। প্ৰথমবাৰ কাঠমাণ্ডুৰ সমীপত আৰু দ্বিতীয়বাৰ বিহাৰ সীমান্তৰ সমীপত ভূমিকম্প। ৰাষ্ট্ৰীয় ভূমিকম্পবিজ্ঞান কেন্দ্ৰৰ তথ্য অনুসৰি ভূমিকম্পৰ কেন্দ্ৰবিন্দু আছিল নেপাল। অৱশ্যে এই ভূমিকম্পত এতিয়ালৈকে কোনো ধৰণৰ প্ৰাণ বা সা-সম্পত্তিৰ ক্ষতিৰ কোনো তথ্য পোৱা নাই।
নেপালৰ সিন্ধুপালচৌক জিলাৰ ভৈৰৱ কুণ্ডাৰ সমীপত পুৱা প্ৰায় ২.৩৫ বজাত সংঘটিত হয় এই ভূমিকম্প। জাৰ্মান ৰিচাৰ্চ চেণ্টাৰ ফৰ জিঅ’ছায়েন্সেছে ভূমিকম্পৰ প্ৰাবল্য ৬.১ জুখিছিল, আনহাতে ভাৰতৰ নেচনেল চেণ্টাৰ ফৰ ছিচম’লজিয়ে ইয়াৰ প্ৰাবল্য ৫.৫ বুলি জুখিছে। সমতলৰ পৰা ১০ কিলোমিটাৰ গভীৰতা আছিল ভূমিকম্পৰ অভিকেন্দ্ৰ।
৬.১ প্ৰাবল্যৰ ভূমিকম্পক শক্তিশালী বুলি গণ্য কৰা হয় আৰু ইয়াৰ ফলত যথেষ্ট ক্ষতি হ’ব পাৰে। অৱশ্যে কোনো লোকৰে এই ভূমিকম্পৰ ফলত ক্ষতি নহলেও কেইবাঠাইতো ঘৰ- অট্টালিকা আদিত ফাট মেলা বুলি খবৰ প্ৰকাশ পাইছে।
আনহাতে এই ভূমিকম্পৰ কম্পন কেৱল নেপালতে অনুভুত নহয়, ভাৰততো ইয়াৰ কম্পন অনুভুত হয়। ভাৰতৰ বিহাৰ-পাটনা লৈকে অনুভুত হয় এই ৬.১ ৰিখটাৰ স্কেলৰ ভূমিকম্পৰ কম্পন।
কেৱল নেপালতেই নহয়, পাকিস্তানতো আহে আন এক ভূমিকম্প। এই ভূমিকম্পৰ ৰিখটাৰ স্কেল ৪.৫ প্ৰাবল্য। পুৱা ৫ বাজি ১৪ মিনিটিত অহা এই ভূমিকম্পৰ অভিকেন্দ্ৰ সমতলৰ পৰা ১০ কিলোমিটাৰ গভীৰতাত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
