ডাঃ শ্বাম্মী আখটাৰঃ স্বাস্থ্য বা চিকিৎসা-সেৱাৰ ক্ষেত্ৰত জৰুৰী বা আপাতকালীন (ইমাৰজেন্সী) প্ৰক্ৰিয়াৰ নাম প্ৰায় সকলোৰে অৱগত, অৰ্থাৎ শুনিছে। বা যিকোনো এখন চিকিৎসালয়লৈ (চৰকাৰী, বে-চৰকাৰী) গ’লেই প্ৰথমেই বা সমুখতেই দৃষ্টিগোচৰ হোৱা বিভাগটোৱেই হৈছে— আপাতকালীন বা জৰুৰী (ইমাৰজেন্সী) সেৱা বিভাগ।
এই ইমাৰজেন্সী সেৱা বিভাগ কি আৰু ইয়াত কি ধৰণৰ চিকিৎসা সেৱা আগবঢ়োৱা হয়, সেই সম্পৰ্কে কিছু কথা জনাবলৈ লৈছো। আপাতকালীন বা জৰুৰী এই শব্দ দুটিয়েই বুজাই যে-তাৎক্ষণিকভাৱে হোৱা যিকোনো শাৰৰীৰিক সমস্যা, জটিলতাত যেতিয়া এজন ব্যক্তি আক্ৰান্ত হয়, তেনে অৱস্থাত সেই ব্যক্তিজনৰ বাবে তৎকালীনভাৱে একপ্ৰকাৰৰ জীৱনদায়ী, যি চিকিৎসা আগবঢ়োৱা হয়৷
এই চিকিৎসা-পদ্ধতিকেই আপাতকালীন চিকিৎসা সেৱা বা চিকিৎসা-বিজ্ঞানৰ ভাষাত ‘ইমাৰজেন্সী মেডিচিন’ বোলা হয়। অৰ্থাৎ, যিকোনো এজন ব্যক্তিয়েই যেনিবা হঠাৎ কোনো দুৰ্ঘটনা ঘটি যিকোনো ধৰণে আঘাতপ্ৰাপ্ত, অগ্নিদগ্ধ, বিষক্ৰীয়াত আক্ৰান্ত, ষ্ট্ৰ’ক কিম্বা হাৰ্ট-এটেক, হঠাতে ঘটা দুৰ্ঘটনা বা ৰোগত আক্ৰান্ত হ’লে সেই ৰোগীজনক তাৎক্ষণিকভাৱে চিকিৎসাৰ প্ৰয়োজন হয়; যাতে প্ৰাথমিকভাৱে হ’লেও জৰুৰী চিকিৎসা প্ৰদান কৰি ৰোগীজনৰ প্ৰাণৰক্ষা কৰিব পৰা যায়। এনেকুৱা শাৰীৰিক স্থিতিত, এইখিনিৰ পিছতহে প্ৰয়োজন সাপেক্ষে পৰৱৰ্তী পৰ্যায়ৰ চিকিৎসা প্ৰদান কৰা সম্ভৱ, যি দীঘলীয়া বা নাতিদীৰ্ঘও হ’ব পাৰে।
লগতে পঢ়ক টাটা পৰিয়ালৰে ৭০ বছৰীয়া সম্পৰ্ক কিয় যতি পৰিল? কোন আছিল চাইৰাছ মিষ্ট্ৰী?
যিকোনো বয়সৰ ৰোগীয়েই এই বিভাগৰ অধীনত চিকিৎসাধীন হ’ব পাৰে, কাৰণ জৰুৰী অৱস্থাত আক্ৰান্ত হোৱাৰ কোনো নিৰ্ধাৰিত বয়স নেথাকে। এই চিকিৎসা-সেৱা বিভাগত আপাতকালীন চিকিৎসা আগবঢ়াবৰ বাবে সকলো সময়তেই চিকিৎসকসহ আন চিকিৎসা-কৰ্মীসকল উপস্থিত থাকে। আপাতকালীন চিকিৎসা-সেৱা আগবঢ়োৱা চিকিৎসকজনে সামগ্ৰিকভাৱে সকলো ধৰণৰ বেমাৰ-আজাৰ, দুৰ্ঘটনা আদি জৰুৰী অৱস্থাত, কেনেধৰণৰ আৰু কি চিকিৎসা আগবঢ়াব লাগে সেই বিষয়ে সম্পূ্ৰ্ণ অভিজ্ঞ হ’ব লাগিব। ৰোগী এজনৰ এনে জটিল পৰিস্থিতিক ততাতৈয়াকৈ বাধা দিয়া, যাৱতীয় পৰীক্ষা-নিৰীক্ষা আদি কৰাৰ পৰা পৰৱৰ্তী পৰ্যায়ৰ চিকিৎসা পৰ্যন্ত সকলোবোৰ চম্ভালি ল’ব পৰা হয়।
হাস্পতাল এখনৰ এনে বিভাগলৈ ৰোগী এজন অহাৰ লগে লগে তেওঁক তাৎক্ষণিক চিকিৎসা প্ৰদানৰ লগতেই প্ৰয়োজন সাপেক্ষে তেজ, ই চি জি(হৃদপিণ্ডৰ পৰীক্ষা), আলট্ৰাচাউণ্ড, চি টি স্কেন আদি পৰীক্ষা কৰাই আভ্যন্তৰীণ ৰূপত কি কি হৈছে আৰু কি চিকিৎসাৰ প্ৰয়োজন হ’ব সেই সকলো দিহা কৰাৰ দ্বায়িত্ব আপাতকালীন বিভাগত কৰ্তব্যৰত চিকিৎসকজনৰেই। মুঠতে এক কথাত ক’বলৈ গ’লে পূৰ্বে উল্লেখিত বা অনা যিকোনো ধৰণৰ শাৰীৰিক-মানসিক ৰোগ বা দুৰ্ঘটনা সম্পৰ্কে দ্বায়িত্বৰত চিকিৎসকজনৰ সাময়িক তথা জৰুৰী সকলো জ্ঞান থাকিব লাগিব। কাৰণ কি পৰিস্থিতিত কেনেধৰণৰ ৰোগী আহিব, তাৰ কোনো নিশ্চয়তা নেথাকে। গতিকে শিশুৰ পৰা বয়স্ক ব্যক্তিলৈকে, পুৰুষ-নাৰী উভয়ৰেই ভিন্ন সমস্যা বা ৰোগ সম্পৰ্কে জনা আৰু চিকিৎসা প্ৰদান কৰা পৰ্যন্ত চিকিৎসকজন অভিজ্ঞ হ’ব লাগিব।
লগতে পঢ়ক ৰীল নিৰ্মাণ কৰিবলৈ গৈ ৰে’লৰ খুন্দাত গুৰুতৰভাৱে আহত যুৱক, চিকিৎসালয়ত ভর্তি
আপাতকালীন চিকিৎসা সেৱা বিভাগত কৰ্তব্যৰত চিকিৎসক এজনে একেসময়তে বহু ৰোগীৰেই চিকিৎসা কৰিব লগা হ’ব পাৰে, অৰ্থাৎ এনে পৰিস্থিতি প্ৰায়েই হোৱা দেখা যায়। কাৰণ সৰু-বৰ দুৰ্ঘটনাই হওক অথবা তাৎক্ষণিকভাৱে হোৱা যিকোনো ৰোগতে আক্ৰান্ত লোকৰ সংখ্যও কম নহয়। গতিকেই এই চিকিৎসালয় এখনৰ এনে বিভাগত সাধাৰণতেই ৰোগীৰ যথেষ্ট ভিৰ থকা দেখা যায়। চিকিৎসালয়ৰ এই আপাতকালীন সেৱা বিভাগত জটিল সেৱা বিভাগত থকাৰ দৰেই ২৪ ঘন্টাই এনে এজন অভিজ্ঞ চিকিৎসক উপস্থিত থাকেই।
প্ৰয়োজন সাপেক্ষে এনে পৰিস্থিতিত ৰোগীৰ কি হৈছে নাই, জনাৰ লগতেই চিকিৎসাও প্ৰদান কৰা হয়। ৰোগীজনৰ বেছি জটিলতা থাকিলে, যেনে— জটিল দুৰ্ঘটনা, ষ্ট্ৰ’ক, হাৰ্ট এটেক, অগ্নিদগ্ধ হ’লে বা অস্ত্ৰোপচাৰ আদিৰ প্ৰয়োজন হ’লে, ৰোগীক ততালিকে ইন্টেনচিভ কেয়াৰ ইউনিট(আই চি ইউ)ত ভৰ্তি কৰাৰ লগতে প্ৰয়োজন সাপেক্ষে অস্ত্ৰোপচাৰৰ ব্যৱস্থা আদিও কৰিব লগা হয়। ঠিক একেদৰেই, কম পৰিমাণে আঘাতপ্ৰাপ্ত বা কিছু যাৱতীয় চিকিৎসাত সুস্থ হৈ উঠে আৰু চিকিৎসালয় এৰিব পাৰে। এনে ক্ষেত্ৰত ৰোগীৰ তাৎক্ষণিক সকাহৰ বাবে সাধাৰণতে এড্ৰেনেলিন, ম’ৰফিন চালফেট, ডাইজেপাম আদি বিভিন্নধৰণৰ দৰৱৰ ব্যৱহাৰ কৰা হয়।
এম ডি, এফ ই এম(চি এম চি, ভেল্ল’ৰ), এম আৰ চি ই এম(লণ্ডন), গুৱাহাটী মেট্ৰ’ হস্পিটেল, চিকিৎসকৰ ফোন- ৯১০১১৮৭৬০৭
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
