অসম লাইভ৪ঃ অতিৰিক্তভাৱে স্মাৰ্টফোন ব্যৱহাৰ কৰিয়েই অন্ধ হৈ পৰিল এগৰাকী যুৱতী৷ স্মাৰ্টফোন অত্যাধিক মাত্ৰাত ব্যৱহাৰ কৰিয়েই অন্ধ হৈ পৰিছে হায়দৰাবাদৰ যুৱতীগৰাকী৷ এই ভয়ংকৰ কাণ্ডৰ কথা প্ৰকাশ কৰিছে চকু বিশেষজ্ঞ ডাঃ সুধীৰ কুমাৰে৷ চিকিৎকৰ এই টুইট ভাইৰেল হৈ পৰিছে সামাজিক মাধ্যমত৷ ৩০ বছৰীয়া মঞ্জু নামৰ মহিলাগৰাকী কেইবাবছৰ ধৰি মোবাইল ফোনত আসক্ত হৈ পৰিছিল৷ দিন-ৰাতিৰ প্ৰায় প্ৰতিসময়তে ভাৰ্চুৱেল পৃথিৱীতেই বিচৰণ কৰি আছিল মঞ্জুৱে৷ আনকি বাথৰুমত থকাৰ সময়ছোৱাতো ফোনতেই আসক্ত হৈ আছিল মঞ্জু৷
দিনটোৰ বেছিভাগ সময়ে ফোনটোত ব্যস্ত হৈ থকা মঞ্জুৱে পাছলৈ চকুত অস্বস্তি অনুভৱ কৰিবলৈ আৰম্ভ কৰে৷ মাজে মাজে সকলো বস্তুৱেই জিলমিলকৈ দেখে৷ এনেকৈ লাহে লাহে এই অসুবিধা বাঢ়ি গৈ এসময়ত প্ৰায় নেদেখাই হৈ পৰে মঞ্জুৱে৷ লগে লগেই মঞ্জুৱে চকু বিশেষজ্ঞ সুধীৰ কুমাৰৰ কাষ চাপে৷ চিকিৎসকগৰাকীয়ে মঞ্জুৰ অসুখৰ কথা টুইটাৰত শ্বেয়াৰ কৰি লিখিছে যে তেওঁ মঞ্জুক কোনো ঔষধ নিদিলে৷ তাৰ পৰিবৰ্তে স্মাৰ্টফোনৰ ব্যৱহাৰ কমাবলৈ নিৰ্দেশ দিয়ে চিকিৎসকগৰাকীয়ে৷ যদি স্মাৰ্টফোনৰ ব্যৱহাৰ কমাই আনে তেতিয়াহে তেওঁ সুস্থ হৈ উঠাৰ সম্ভাৱনা আছে বুলি চিকিৎসকে প্ৰকাশ কৰে৷
উল্লেখ্য যে প্ৰতিসময়তে ফোনত ব্যস্ত হৈ থকাৰ বাবেই মঞ্জুৰ নাৰ্ভৰ ক্ষতি হৈছে৷ এইধৰণেই যদি ফোন ব্যৱহাৰ কৰি থাকে তেন্তে তেওঁ সম্পূৰ্ণৰূপেই অন্ধ হৈ পৰিব বুলিও প্ৰকাশ কৰিছে চিকিৎসকে৷ ইয়াৰোপৰি চিকিৎসকে কয়, মঞ্জুৰ সৈতেই কেৱল এই ঘটনা হৈছে এনে নহয়৷ অত্যাধিক পৰিমানে ফোন ব্যৱহাৰ কৰিলে প্ৰায়সংখ্যক লোকৰেই এই সমস্যা হ’ব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
