দুখীয়া মানুহ বুলি কি চিকিৎসাৰ পৰা বঞ্চিত হ’ব নেকি? চৰকাৰৰ তৰফৰ পৰা দেশজুৰি স্বাস্থ্যকেন্দ্ৰসমূহত বিনামূলীয়া চিকিৎসাৰ ব্যৱস্থা কৰা হৈছে৷ নূন্যতম খৰচতেই সঠিক চিকিৎসা পাব সাধাৰণ মানুহে৷ কিন্তু এই নূন্যতম খৰচত কেইজন দৰিদ্ৰই চিকিৎসা লাভ কৰে চৰকাৰী হাস্পতালত? প্ৰায় প্ৰতিখন চৰকাৰী চিকিৎসালয়ক লৈ ওজৰ আপত্তি কৰে বহুজনে৷
শেহতীয়াকৈ তেনে এক দুৰ্নীতিৰ কথা পোহৰলৈ আহিছে৷ এগৰাকী দৰিদ্ৰ লোকৰ পৰা ১টকাৰ সলনি ২টকা লৈ চাকৰি হেৰুৱালে এগৰাকী ব্যক্তিয়ে৷ বিধায়কৰ হাতত ধৰা পৰাত চৰম পদক্ষেপ ল’লে বিধায়কে৷ ঘটনাটো ঘটিছে উত্তৰ প্ৰদেশৰ জগদৌৰত৷ সোমবাৰে জগদৌৰৰ এক কমিউনিটি হেলথ চেণ্টাৰ পৰিদৰ্শন কৰিবলৈ গৈছিল বিজেপি বিধায়ক প্ৰেম সাগৰ পেটেল৷ দীৰ্ঘদিন ধৰি তেওঁৰ ওচৰলৈ অভিযোগ আহিছিল যে নানান বে-আইনী কাম চলি আহিছিল সেই কমিনিউটি চেণ্টাৰত৷
সেই অভিযোগৰ ভিত্তিতেই পৰিদৰ্শনলৈ আহিছিল বিজেপি বিধায়কগৰাকী৷ তেওঁ পৰিদৰ্শনলৈ অহাৰ কথা কোনোৱে গম পোৱা নাছিল৷ স্বাস্থ্যকেন্দ্ৰলৈ সোমাই তেওঁ দেখা পায় যে চিকিৎসকে সাধাৰণ ৰোগী এগৰাকীৰ পৰা ধন লওঁতে ২টকা বেছিকৈ লৈছিল৷ কিন্তু চৰকাৰে বান্ধি দিয়া ফি অনুসৰি ১টকাহে ল’ব পাৰে৷ ইয়াৰ পাছতেই বিধায়কগৰাকীয়ে ৰোগী আৰু তেওঁলোকৰ পৰিয়ালৰ সৈতে কথা পাতে৷ তেতিয়াই তেওঁ জানিব পাৰে যে চৰকাৰী ঔষধ প্ৰদান নকৰি বাহিৰৰ পৰা ঔষধ ক্ৰয় কৰিবলৈ পৰামৰ্শ দিয়াৰ লগতে প্ৰেছক্ৰাইবো কৰে স্বাস্থ্যকেন্দ্ৰই৷
নিশাৰ ছিফটত মহিলা চিকিৎসকৰ অনুপস্থিতি, সন্তান প্ৰসৱৰ পাছত চৰকাৰৰ তৰফৰ পৰা যি আৰ্থিক সাহায্য দিয়া হয় সেয়া সময়মতে নোপোৱাৰো অভিযোগ লাভ কৰিছিল বিধায়কজনে৷ এই দুৰ্নীতি নিজ চকুৰে দেখাৰ পাছতেই তেওঁ ৰুদ্ৰমূৰ্তি ধৰে৷ ফাৰ্মাষ্টিটক মাতি তেওঁ কয়, ‘আপোনাৰ সাহস কেনেকৈ হ’ল এই দুখীয়া মানুহৰ পৰা ১টকা বেছিকৈ ল’বলৈ? মই গাওঁত ডাঙৰ হৈছো৷ দাৰিদ্ৰতা আৰু অসহায়তা কি বুজি পাওঁ৷ ইয়াত কি হৈছে মোক পৃথককৈ বুজোৱাৰ প্ৰয়োজন নাই৷ মই সকলো জানো৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
