পাকিস্তানৰ প্ৰত্যাঘাতৰ পাছতেই ভাৰতৰ এক বিশেষ অস্ত্ৰকলৈ সমগ্ৰতে চলিছে চৰ্চা৷ যি অস্ত্ৰৰে নিঃশব্দে পাক ভূখণ্ডত সোমাই সন্ত্ৰাসবাদী ঘাটিসমূহ ধ্বংস কৰি দিলে ভাৰতে৷ মঙলবাৰে মাজনিশা অপাৰেছন সেন্দূৰ আৰম্ভ কৰিছে ভাৰতে৷ সূত্ৰৰ খবৰ অনুসৰি সেই আক্ৰমণত যি অস্ত্ৰ ব্যৱহাৰ কৰা হৈছিল তাৰমাজত আছে স্কেল্প, হামাৰ ক্ষেপণাস্ত্ৰ৷ এই দুটাৰ ওপৰিও আৰু এটা মাৰণ অস্ত্ৰ ব্যৱহাৰ কৰা হৈছে৷ সেয়া হৈছে আত্মঘাতী ড্ৰোণ স্কাই ষ্ট্ৰাইকাৰ৷ এই ড্ৰোণ নজৰদাৰী ড্ৰোণৰ দৰে নহয়৷ এই ড্ৰোণে অইন ক্ষেপণাস্ত্ৰৰ দৰেই কাম কৰে৷
এই ড্ৰোণে ৫-১০ কিঃগ্ৰাঃ বিস্ফোৰক বহন কৰিব পাৰে৷ ১০০ কিঃমিঃ দূৰৰ লক্ষ্যবস্তুক বিচাৰি নিঁখুত লক্ষ্যত অবতীৰ্ণ হোৱাত সক্ষম এই ড্ৰোণ৷ কেৱল সেয়াই নহয়, ই নিঃশব্দে আক্ৰমণ চলাব পাৰে৷ এই সুবিধা কামত লগাই ভাৰতে আক্ৰমণ চলাইছে৷ ইজৰাইলী প্ৰযুক্তিৰ এই ড্ৰোণ নিৰ্মাণ কৰা হৈছে বাংগালুৰুত৷ এই ড্ৰোণৰ বিশেষত্ব পৰীক্ষা কৰাৰ পিছত ২০২১ চনত ভাৰত চৰকাৰে ১০০খনতকৈয়ো বেছি ড্ৰোণ নিৰ্মাণ কৰাইছে৷ বালাকোট এয়াৰষ্ট্ৰাইকৰ পাছতেই এই ড্ৰোণ ক্ৰয় কৰিছে ভাৰতৰ প্ৰতিৰক্ষা বিভাগে৷
কম শব্দৰ বাবে গোপন কোনো অভিযানত এই স্কাই ষ্ট্ৰাইকাৰ ড্ৰোণ ব্যৱহৃত হয়৷ কেৱল সেয়াই নহয়, প্ৰতিপক্ষৰ ৰে়ডাৰো ধৰা পৰাৰ ভয় নাই৷ সহজেই সেই নজৰদাৰি এৰাই প্ৰতিপক্ষৰ ঘৰত সোমাই আক্ৰমণ কৰিব পাৰে৷ বিশেষকৈ সন্ত্ৰাসবাদী আক্ৰমণ চলোৱাৰ কামত ড্ৰোণ খুবেই কাৰ্যকৰ প্ৰমাণিত হৈছে৷ এই ধৰণৰ ড্ৰোণ ‘লয়টাৰিং মিউনিছন’ গোত্ৰৰ মাজত পৰে৷ অৰ্থাৎ এই ধৰণৰ ড্ৰোণ আক্ৰমণস্থলত উপৰত ঘূৰি ঘূৰি সঠিক সময়ত আক্ৰমণ কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
