ছুটকেছত উদ্ধাৰ হোৱা কংগ্ৰেছ কৰ্মীৰ ঘটনাৰ শিহৰণকাৰী সত্য উদঘাটন
দেশজুৰি তোলপাৰ লগোৱা ছুটকেচত উদ্ধাৰ হোৱা কংগ্ৰেছ কৰ্মী হিমানী নাৰৱালৰ মৃতদেহ সন্দৰ্ভত পোহৰলৈ আহিছে শিহৰণকাৰী সত্য। দোপাট্টাৰে হাত বান্ধি, মোবাইল চাৰ্জাৰেৰে, ডিঙি চেপি প্ৰাণ কাঢ়ি শেষত ছুটকেচত ভৰাই ঘন জংঘলত পেলাই দিয়ে।
সেই ছুটকেছ উদ্ধাৰ হোৱাৰ পাছতে তোলপাৰ লাগি যায় সকলোফালে। ২৩ বৰ্ষীয় হিমানীৰ শৰীৰত জখমৰ লগতে হাড় ভঙা অৱস্থাত লগতে হাতত মেহেন্দী, উপৰি ডিঙিত দোপাট্টা লাগি থকা অৱস্থাত উদ্ধাৰ হৈছিল। সেই ঘটনাৰেই আৰক্ষীয়ে মূল অভিযুক্তক আটক কৰিছে।
দেওবাৰে নিশা দিল্লীৰ মুণ্ডকাৰ পৰা আৰক্ষীয়ে গ্ৰেপ্তাৰ কৰে কংগ্ৰেছ কৰ্মী হিমানী নাৰৱালক হত্যাৰ অভিযোগত অভিযুক্ত শচীন ওৰফে ধিলিক। ঝজ্জাৰৰ বাসিন্দা আৰু দুটা সন্তানৰ পিতৃ শচীন।
আৰক্ষীৰ মতে, ডেৰ বছৰ পূৰ্বে শচীনে ছচিয়েল মিডিয়াত হিমানীৰ সৈতে বন্ধুত্ব গঢ়ি তুলিছিল। লাহে লাহে সেই বন্ধুত্ব গাঢ় কৰিবলৈ হিমানীৰ ঘৰলৈ আহিবলৈ ধৰিছিল। কিছুদিন ধৰি ধনৰ লেনদেন সন্দৰ্ভতো বিবাদ চলি আছিল দুয়োৰে মাজত।
অতিৰিক্ত আৰক্ষী সঞ্চালক প্ৰধানে সোমবাৰে জনোৱা মতে, ২৮ ফেব্ৰুৱাৰীত বিজয় নগৰৰ হিমানীৰ ঘৰত বিবাদ ইমানেই তীব্ৰতৰ হৈ পৰে যে সন্ধিয়া ৫ বজাত শচীনে হিমানীৰ হাত দুখন দোপাট্টাৰে বান্ধি ম’বাইল চাৰ্জাৰৰ তাঁৰেৰে ডিঙি চেপি হত্যা কৰে।
আৰক্ষীক দিয়া ভাষ্য অনুসৰি, হত্যাকাণ্ডৰ পিছত শচীনে লেপটপ আৰু গহনা লৈ হিমানীৰ স্কুটীত উঠি ঝজ্জাৰৰ কানোন্দা গাঁৱত থকা নিজৰ মোবাইল মেৰামতিৰ দোকানলৈ যায়। ৪ ঘণ্টাৰ পাছত আকৌ একেখন স্কুটীতে হিমানীৰ ঘৰ যায়। সকলো প্ৰমাণ ধ্বংস কৰি পিছত মৃতদেহটো এটা ছুটকেছত ভৰাই নিশা ১০ বজাত অটোৰিক্সাৰে দিল্লী বাইপাছ যায়। তাতেই বাছ ষ্টেণ্ডৰ ওচৰৰ জোপোহাত ছুটকেছটো দলিয়াই দিয়ে।
১ মাৰ্চত মৃতদেহটো উদ্ধাৰ হোৱাৰ পিছৰে পৰা আৰক্ষীয়ে মোবাইল ফোন লকেচনৰ জৰিয়তে শচীনক ধৰা পেলায়। হিমানীৰ ঘৰৰ সমীপত থকা চিচিটিভিৰ ফুটেজটো শচীনে ছুটকেছটো কঢ়িয়াই লৈ ফুৰা দেখা গৈছিল।
এই সকলোবোৰ প্ৰমাণৰ ভিত্তিতে আৰক্ষীয়ে আটক কৰে শচীনক। পাছত আৰক্ষীৰ জেৰাত সকলো স্বীকাৰ কৰে হিমানী হত্যাৰ ঘটনা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
