নতুন মুখ্যমন্ত্ৰী হিমন্ত বিশ্ব শৰ্মাঃ জীৱন পৰিক্ৰমা

অসম লাইভ ২৪ঃ এক দুই তিনি চাৰি (ককা দেউতা নাতি হাতী) গীতটিত অভিনয় কৰা, তাহানিৰ এই ল’ৰাজনেই আজি মুখমন্ত্ৰী। সপ্তাহ জোৰা উৎকণ্ঠাৰ অন্ত পেলাই দেওবাৰে বিজেপি বিধায়িনী দলে হিমন্ত বিশ্ব শর্মাক বিধায়িনী দলৰ নেতা ৰূপে বাছনি কৰে। ৫২ বছৰ তিনিমাহ আঠ দিন বয়সৰ হিমন্তবিশ্ব শর্মাৰ জন্ম ১৯৬৯ চনৰ ১ ফেব্ৰুৱাৰীত।যোৰহাটত জন্ম হিমন্ত বিশ্ব শর্মাৰ। প্ৰয়াত কৈলাস নাথ শর্মা আৰু মৃণালিনী দেৱীৰ সন্তান হিমন্ত বিশ্ব শর্মা। নতুন শৰণীয়া প্ৰাথমিক বিদ্যালয়, কামৰূপ একাডেমী, কটন কলেজত শিক্ষাগ্ৰহণ কৰা হিমন্ত বিশ্ব শর্মা ৰাজনীতি বিজ্ঞানৰ স্নাতকোত্তৰ। তদুপৰি আইনৰ স্নাতক আৰু গুৱাহাটী বিশ্ববিদ্যালয়ৰ পি এইছ ডি ডিগ্ৰীধাৰী ৰাজ্যৰ পঞ্চদশ মুখ্যমন্ত্ৰী গৰাকী। কামৰূপ একাডেমীৰ সহকাৰী সাধাৰণ সম্পাদকৰূপে ১৯৮২-৮৩ চনত নির্বাচিত হয়। কটন কলেজ ছাত্ৰ একতা সভাৰ সাধাৰণ সম্পাদকৰূপেও নির্বাচিত হয় হিমন্ত বিশ্ব শর্মাই। লগতে সদৌ অসম ছাত্ৰ সন্থাৰেও জড়িত আছিল ডঃ শর্মা। এনেদৰেই মুকলি হৈছিল হিমন্ত বিশ্ব শর্মাৰ ৰাজনৈতিক জীৱনৰ দুৱাৰ। ১৯৯৪ চনত কংগ্ৰেছত যোগদান কৰে হিমন্ত বিশ্ব শর্মাই। ১৯৯৬ চনত প্ৰথমবাৰৰ বাবে সংসদীয় ৰাজনীতিত প্ৰৱেশ কৰি জালুকবাৰী সমষ্টিৰ পৰা প্ৰতিদ্বন্দিতা কৰি ভৃগুকুমাৰ ফুকনৰ হাতত পৰাজিত হয়। ২০০১ চন, কংগ্ৰেছৰ প্ৰার্থীৰূপে জালুকবাৰী সমষ্টিৰ পৰা প্ৰথমবাৰলৈ দিছপুৰলৈ নির্বাচিত হয় হিমন্ত বিশ্ব শর্মা। সেইবাৰ অগপৰ তৎকালীন প্ৰতাপী নেতা তথা প্ৰাক্তন মন্ত্ৰী ভৃগু কুমাৰ ফুকনক পৰাজিত কৰিছিল এইগৰাকী ন-ৰাজনীতিকে। সেয়াই আৰম্ভণি, তাৰপাছত পিছলৈ উভতি চাব লগা হোৱা নাই হিমন্তবিশ্ব শর্মাই। ইয়াৰ মাজতে ২০০১ চনতেই ৰিণিকি ভূঞাৰ সৈতে বিবাহ পাশত আবদ্ধ হৈছিল হিমন্ত বিশ্ব শর্মা। আনহাতে, প্ৰাক্তন মুখ্যমন্ত্ৰী প্ৰয়াত তৰুণ গগৈৰ ব্লু আইড বয়লৈ ৰূপান্তৰিত হয় হিমন্ত বিশ্ব শর্মা। তৰুণ গগৈৰ তিনিটা শাসনকালত কৃষি, শিক্ষা, স্বাস্থ্য, অসমচুক্তি ৰূপায়ণ, বিত্ত আদি গুৰুত্বপূর্ণ বিভাগৰ দায়িত্ব লৈ ৰাজ্যিক আৰু কেবিনেট মন্ত্ৰীৰূপে কার্যনির্বাহ কৰিছিল তেওঁ। কংগ্ৰেছৰ ধাৰাবাহিক তৃতীয়টো শাসন কালত তৎকালীন মুখ্যমন্ত্ৰী তৰুণ গগৈৰ সৈতে হিমন্ত বিশ্ব শর্মাৰ ৰাজনৈতিক মনোমালিন্যৰ কথা ৰাজনীতিৰ খবৰ ৰখা সকলোৱে জানে। পৰিণতিত ২০১৫ চনৰ ২৩ আগষ্টত কংগ্ৰেছ ত্যাগ কৰি বিজেপিত যোগদান কৰে হিমন্ত বিশ্ব শর্মাই। কংগ্ৰেছত থকা কালতেই হওক বা বিজেপিতে হওক নির্বাচনী ৰণৰ প্ৰধান সেনাপতি ৰূপে অৱতীর্ণ হৈ আহিছে হিমন্ত বিশ্ব শর্মা। মন্ত্ৰীৰূপে ডঃ শর্মাৰ দক্ষতা সর্বজনবিদিত। ক’ৰোনা কালত ৰাজ্যবাসীক অভয় প্ৰদান কৰা এইগৰাকী মন্ত্ৰীৰ দক্ষতাক নস্যাৎ কৰা সহজ নহয়। বিজেপিত যোগদানৰ পাছত উত্তৰ পূবত দলৰ সাংগঠনিক ভেটি সবল কৰাৰ বাবে যথেষ্ট সক্ৰিয় ভূমিকা পালন কৰে হিমন্তবিশ্ব শর্মাই। নেডাৰ আহ্বায়ক ৰূপে বিজেপিক উত্তৰ পূবত সবল স্থিতি প্ৰদান কৰা, ৰাজ্যত দ্বিতীয়বাৰৰ বাবে দলক শাসনলৈ অনা হিমন্ত বিশ্ব শর্মাক আজি দলে পুৰস্কৃত কৰিলে মুখ্যমন্ত্ৰীৰ আসনত বহুৱাই। ডঃ শর্মাৰো দীর্ঘদিনীয়া সপোন পূৰণ হ’ল। ২০১৬ চনত বিজেপি চৰকাৰ গঠন হোৱাৰ পাছত সর্বানন্দ সোণোৱাল মন্ত্ৰীসভাৰ শিক্ষা, স্বাস্থ্য, বিত্ত আদি গুৰুত্বপুর্ণ পদবীত কার্যনির্বাহ কৰা হিমন্ত বিশ্ব শর্মাক দেশৰ যি কোনো ৰাজ্যৰ নির্বাচনকালীন পৰিৱেশত বিজেপিয়ে আমন্ত্ৰিত প্ৰচাৰকৰূপে নিয়োজিত কৰি আহিছে। মণিপুৰ, মেঘালয়, ত্ৰিপুৰা আদিত এন ডি এৰ চৰকাৰ গঠনত শর্মাৰ ভূমিকা সকলোৱে জানে। ৰাজনৈতিক জগতখনৰ উপৰি খেল জগতৰ সৈতেও জড়িত হিমন্ত বিশ্ব শর্মা। দেশৰ বেডমিণ্টন সংস্থাৰ সভাপতি, অসম বেডমিণ্টন সংস্থাৰ সভাপতি, অসম ক্ৰিকেট এছ’চিয়েশ্যনৰ সভাপতি আদি পদত কার্য নির্বাহক কৰিছে এই গৰাকী দক্ষ ৰাজনীতিকে। ৰাজ্যৰ সংকট কালত গুৰুত্বপূর্ণ সিদ্ধান্ত গ্ৰহণত তৰুণ গগৈয়ে হওক বা সর্বনন্দ সোণোৱালেই হওক কোনোগৰাকী মুখ্যমন্ত্ৰীয়ে উপেক্ষা কৰিব পৰা নাছিল হিমন্ত বিশ্ব শর্মাক। অভিজ্ঞতাপুষ্ট এইগৰাকী দক্ষৰাজনীতিকৰ নাম বিদায়ী মুখ্যমন্ত্ৰী সর্বানন্দ সোণোৱালে বিধায়িনী দলৰ বৈঠকত নিজেই বিধায়িনী দলৰ নেতাৰূপে প্ৰস্তাৱ কৰে। সোণোৱালৰ প্ৰস্তাৱক সমর্থন জনায় বিধায়ক ৰঞ্জিৎ কুমাৰ দাস আৰু নন্দিতা গালোর্ছাই, লগে লগে ৰাজ্যবাসীয়ে বিচাৰি থকা সেই গতিশীল মুখ্যমন্ত্ৰীগৰাকী সর্বানন্দ সোণোৱালৰ স্থলাভিষিক্ত হোৱাতো নিশ্চিত হ’ল। গামোছা পিন্ধাই নতুন মুখ্যমন্ত্ৰীক আদৰিলে বিদায়িয়ে। সোমবাৰে কলাক্ষেত্ৰত মুখ্যমন্ত্ৰীৰূপে শপত লৈ নতুন চৰকাৰ গঠন কৰিব হিমন্ত বিশ্ব শর্মাই। পাৰিবাৰিক জীৱনতো সফল স্বামী আৰু সফল অভিভাৱক হিমন্ত বিশ্ব শর্মা।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ