এদিনৰ ভিতৰতেই সলনি হৈ পৰিছে ডোনাল্ড ট্ৰাম্পৰ জীৱন৷ চাৰি বছৰ পূৰ্বে হোৱাইট হাউছ এৰাৰ পাছত স্বাভাৱিক নিয়মতেই গুৰুত্ব কমিছিল ড’নাল্ড ট্ৰাম্পৰ৷ বিভিন্ন গোচৰত অভিযুক্ত হোৱাৰ পাছত অকলশলীয়া হৈ পৰিছিল ট্ৰাম্প৷ বুধবাৰে ভোটগণনাৰ ফলাফল ঘোষণাৰ পাছতেই সলনি হৈছে ট্ৰাম্পৰ ছবি৷ বিভিন্ন ৰাষ্ট্ৰপ্ৰধানৰ ফোন ধৰি ধৰি ভাগৰি পৰিছে ট্ৰাম্প৷ বুধবাৰে গণনা শেষৰ পাছত ৰিপাবলিকান পাৰ্টীৰ প্ৰাৰ্থী ড’নাল্ড ট্ৰাম্পে দ্বিতীয় বাৰৰ বাবে হোৱাইট হাউছত প্ৰৱেশৰ বন্দোবস্ত পাক্কা কৰি পেলাইছে৷
ট্ৰাম্পক দ্বিতীয়বাৰ প্ৰেছিডেণ্ট হোৱাৰ বাবে শুভেচ্ছা জনাইছে ভাৰতৰ প্ৰধানমন্ত্ৰী নৰেন্দ্ৰ মোদী, ইজৰাইলৰ প্ৰধানমন্ত্ৰী বেঞ্জামিন নেতানিয়াহু, ব্ৰিটেইনৰ প্ৰধানমন্ত্ৰী কিয়েভ ষ্টাৰ্মাৰ, ফৰাচি প্ৰেছিডেণ্ট ইমানুৱেল মেক্ৰণকে ধৰি কেইবাগৰাকীও ৰাষ্ট্ৰনেতাই৷ শুভেচ্ছা জনাই ট্ৰাম্পক ফোন কৰিছে আমেৰিকাৰ বিদায়ী প্ৰেছিডেণ্ট জ’ বাইডেন আৰু ডেমোক্ৰেট প্ৰতিদ্বন্দী কমলা হেৰিছেও৷
সংবাদ সংস্থা এপিয়ে জনাইছে যে, ভোটৰ প্ৰাথমিক ফলাফলত জয়ৰ গোন্ধ পায়েই বিজয় ভাষণ দিয়াৰ সিদ্ধান্ত লয় ট্ৰাম্পে৷ সেই মতে ভাৰতীয় সময় দুপৰীয়া ১ বজাত ফ্লৰিডাত বিজয় ভাষণ দিয়ে তেওঁ৷ পুৰণি শ্লোগান আওৰাই তেওঁ কয়, তেওঁৰ আমোলত জগৎসভাত আমেৰিকাই শ্ৰেষ্ঠ আসন ল’ব৷ তাৰপাছতেই অৱশ্যে ট্ৰাম্পক আৰু প্ৰকাশ্যে দেখা যোৱা নাই৷ বৰং যুক্তৰাষ্ট্ৰৰ বিভিন্ন ৰাজনীতিকতো বাদেই একাধিক ৰাষ্ট্ৰপ্ৰধানৰ ফোন ধৰোতেই ব্যস্ত থাকে তেওঁ৷ সমৰ্থক আৰু অনুদানদাতাসকলৰো কেইবাগৰাকীৰ সৈতে ট্ৰাম্পে কথা পাতিছে বুলি জনাইছে সংবাদ সংস্থাটোৱে৷
প্ৰেছিডেণ্ট বাইডেনৰ টিমে ট্ৰাম্পৰ টিমক কেইবাখনো বুজাপৰা পত্ৰত স্বাক্ষৰ কৰাৰ অনুৰোধ জনাইছে৷ সময় মতে এই স্বাক্ষৰসমূহ নকৰিলে ভৱিষ্যতে প্ৰশাসনিক কাম চলাবলৈ ট্ৰাম্প অসুবিধাৰ সন্মুখীন হ’ব৷ কেনকৈ ক্ষমতাৰ হস্তান্তৰৰ প্ৰক্ৰিয়া কৰা হয় সেই বিষয়টোক লৈয়ো ট্ৰাম্পৰ টিমৰ সৈতে কথা পাতিছে বাইডেনৰ টিমে৷ জয়ৰ পাছতেই ট্ৰাম্পে বিদায়ী ভাইছ প্ৰেছিডেণ্ট কমলা হেৰিছকো প্ৰশংসা কৰিছে৷ ট্ৰাম্পে কয় যে, কমলাৰ পেছাদাৰিত্ব আৰু ধৈৰ্য দেখি তেওঁ মুগ্ধ৷ তাৰপাছতেই দুজনেই যুক্তৰাষ্ট্ৰক ঐক্যবদ্ধ ৰখাৰ বিষয়ত নিজৰ প্ৰতিজ্ঞাৰ কথাও জনায়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
