হিন্দু ধৰ্মত মা লক্ষ্মীক ধন-সম্পদ, ঐশ্বৰ্য আৰু সৌভাগ্যৰ দেৱী হিচাপে পূজা কৰা হয় । আমি যেতিয়াই মা লক্ষ্মীৰ ছবি বা মূৰ্তি দেখা পাওঁ, তেতিয়াই এটা কথা লক্ষ্য কৰোঁ যে-তেওঁ এটা সুন্দৰ, পূৰ্ণ বিকশিত পদুম ফুলৰ ওপৰত বহি থাকে আৰু মা লক্ষ্মী দেৱীৰ হাততো এটা পদুম ফুল থাকে। বহু ভক্তৰ মনত প্ৰশ্ন উঠিব পাৰে যে, মা লক্ষ্মী দেৱীয়ে পদুম ফুলকেই নিজৰ আসন হিচাপে কিয় বাছি ল’লে? ইয়াৰ আঁৰত কেৱল ধৰ্মীয় পৰম্পৰাই নহয়, গভীৰ আধ্যাত্মিক অৰ্থও লুকাই আছে। পৌৰাণিক কাহিনী অনুসৰি, দেৱতা আৰু অসুৰসকলে যেতিয়া সমুদ্ৰ মন্থন কৰিছিল, তেতিয়া বহু দিব্যৰত্নৰ লগতে মা লক্ষ্মীৰো আবিৰ্ভাৱ ঘটিছিল। বিশ্বাস কৰা হয় যে তেওঁৰ আবিৰ্ভাৱৰ সময়ত পদুম ফুলৰো বিশেষ ভূমিকা আছিল। সেইবাবেই পদুমক মা লক্ষ্মীৰ অতি প্ৰিয় ফুল বুলি গণ্য কৰা হয়। ধৰ্মীয় বিশ্বাস অনুসৰি, য’ত পদুম থাকে, তাত পৱিত্ৰতা, সৌন্দৰ্য আৰু সমৃদ্ধিৰে ভৰি থাকে।
পদুম ফুলে দিয়ে পৱিত্ৰতাৰ বাৰ্তা
পদুম ফুল বোকাত জন্মে, কিন্তু বোকাই কেতিয়াও ইয়াক অপৱিত্ৰ কৰিব নোৱাৰে। পদুম ফুল সদায় পৰিষ্কাৰ, সুন্দৰ আৰু সুগন্ধিত হৈ থাকে। সেইবাবে পদুমক পৱিত্ৰতা, নিৰ্মলতা আৰু আধ্যাত্মিক উন্নতিৰ প্ৰতীক হিচাপে ধৰা হয়। মা লক্ষ্মী দেৱীয়ে পদুমক আসন হিচাপে লোৱাৰ অৰ্থ হ’ল, মানুহে সংসাৰৰ বিভিন্ন বাধা-বিপত্তি আৰু কঠিন পৰিস্থিতিৰ মাজতো নিজৰ চিন্তা-চেতনা আৰু কৰ্মক শুদ্ধ আৰু সৎ কৰি ৰাখিব লাগে।
সমৃদ্ধি আৰু সৌভাগ্যৰ প্ৰতীক পদুম ফুল
বাস্তু শাস্ত্ৰ আৰু ধৰ্মীয় বিশ্বাসত পদুমক ধন-সম্পদ আৰু সমৃদ্ধিৰ প্ৰতীক বুলি গণ্য কৰা হয়। যেনেকৈ পদুম ফুল ধীৰে ধীৰে মুকলি হৈ নিজৰ সৌন্দৰ্য বিকশিত কৰে, তেনেকৈ মানুহৰ জীৱনতো ধন, সফলতা আৰু সুখ-শান্তি ক্ৰমাগতভাৱে বৃদ্ধি পায়। এই কাৰণেই দীপাৱলী, লক্ষ্মী পূজা আৰু আন বহু ধৰ্মীয় অনুষ্ঠানত পদুম ফুলৰ বিশেষ ব্যৱহাৰ দেখা যায়। মা লক্ষ্মী দেৱীৰ অধিকাংশ মূৰ্তি আৰু ছবিত তেওঁৰ দুয়োখন হাতত পদুম ফুল দেখা যায়। ধৰ্মীয় বিশ্বাস অনুসৰি, ই কেৱল সৌন্দৰ্যৰ প্ৰতীক নহয়; বৰঞ্চ আধ্যাত্মিক আৰু ভৌতিক সমৃদ্ধিৰ মাজৰ সুষমাৰো প্ৰতীক। পদুমে এই বাৰ্তা দিয়ে যে ধন-সম্পদ লাভ কৰাৰ পিছতো মানুহে নম্ৰ, সৎ আৰু সদাচাৰী হৈ থাকিব লাগে। কেৱল ধনী হোৱাটোৱেই যথেষ্ট নহয়; ভাল সংস্কাৰ আৰু সৎ কৰ্মও সমানেই প্ৰয়োজনীয়।
পদুম ফুলৰ ধৰ্মীয় গুৰুত্ব
হিন্দু ধৰ্মত পদুম ফুলৰ সম্পৰ্ক কেৱল মা লক্ষ্মী দেৱীৰ লগতেই সীমাবদ্ধ নহয়। ভগৱান বিষ্ণু, ব্ৰহ্মা দেৱ আৰু আন বহু দেৱ-দেৱীৰ সৈতেও পদুম ফুলৰ বিশেষ সম্পৰ্কৰ উল্লেখ পোৱা যায়। পদুমক সৃষ্টি, জ্ঞান, আধ্যাত্মিক জাগৰণ আৰু দিব্যতাৰ প্ৰতীক হিচাপে মানা হয়। সেইবাবেই পূজা-পাঠ, যজ্ঞ আৰু বিভিন্ন ধৰ্মীয় অনুষ্ঠানত পদুম ফুলক অতি শুভ আৰু পৱিত্ৰ বুলি গণ্য কৰা হয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
