বাহনত নম্বৰ প্লেট ব্যৱহাৰৰ প্ৰচলন কেতিয়াৰ পৰা হৈছিল?

বাহনৰ ৰেজিষ্ট্ৰেচন বা পঞ্জীয়ন নম্বৰ হৈছে পৰিবহণ বিভাগে (RTO) দেশত চলাচল কৰা প্ৰতিখন বাহনক দিয়া এক বিশেষ পৰিচয় সংখ্যা। এই নম্বৰৰ জৰিয়তেই বাহনখনৰ বৈধ পৰিচয় নিশ্চিত কৰা হয়। মটৰ-যান আইনৰ অধীনত বাহনৰ আগফাল আৰু পিছফালত নম্বৰ প্লেট স্পষ্টকৈ লগোৱাটো বাধ্যতামূলক। আইন অনুসৰি বৈধ ৰেজিষ্ট্ৰেচন নম্বৰ নথকা কোনো মটৰ-যান ৰাজহুৱা পথত চলোৱাটো অপৰাধ হিচাপে গণ্য হয়।

নম্বৰ প্লেটৰ পৰা কি কি তথ্য পোৱা যায়?

গাড়ীৰ নম্বৰ প্লেটত থকা আখৰ আৰু সংখ্যাবোৰ এক নিৰ্দিষ্ট নিয়ম অনুসৰি সজোৱা হয়। উদাহৰণস্বৰূপে আমাৰ অসমত পঞ্জীয়ন কৰা বাহনসমূহৰ নম্বৰ আৰম্ভ হয় ‘AS’ৰে। AS অসমৰ ৰাজ্যিক কোড। ইয়াৰ উপৰিও প্ৰতিটো DTOৰো কোড নম্বৰ থাকে। AS 01ৰ অৰ্থ হৈছে বাহনখন কামৰূপ মেট্ৰত পঞ্জীয়ন বা ৰেজিষ্ট্ৰেশ্যন কৰা হৈছে। 01 হৈছে কামৰূপ মেট্ৰ DTOৰ কোড নম্বৰ।
বিশ্বত প্ৰথমবাৰৰ বাবে কেতিয়া বাহনৰ নম্বৰ প্লেটৰ আৰম্ভণি ঘটিছিল?
বাহনৰ বাবে নম্বৰ প্লেট বাধ্যতামূলক কৰা বিশ্বৰ প্ৰথমখন দেশ আছিল ফ্ৰান্স। ১৮৯৩ৰ ১৪ আগষ্টত পেৰিছ আৰক্ষীয়ে এখন বিশেষ আদেশ জাৰি কৰি সকলো বাহনত পৰিচয় প্লেট লগোৱাটো বাধ্যতামূলক কৰে। ইয়াৰ মূল উদ্দেশ্য আছিল দুৰ্ঘটনা সংঘটিত কৰি পলাই যোৱা চালকসকলক চিনাক্ত কৰা। সেই আদেশ অনুসৰি তেতিয়া নম্বৰ প্লেটত বাহনৰ নম্বৰ, মালিকৰ নাম আৰু ঠিকনা উল্লেখ থাকিব লাগিছিল। ফ্ৰান্সৰ পিছত জাৰ্মানীয়ে ১৮৯৬ত সমগ্ৰ দেশজুৰি নম্বৰ প্লেটৰ ব্যৱস্থা আৰম্ভ কৰে। নেদাৰলেণ্ডছে ১৮৯৮ত নম্বৰ প্লেটৰ ব্যৱস্থা আৰম্ভ কৰে। আমেৰিকাৰ নিউয়ৰ্কত ১৯০১ চনত প্ৰথমবাৰৰ বাবে বাহনৰ নম্বৰ প্লেট বাধ্যতামূলক কৰা হয়।

ভাৰতত নম্বৰ প্লেটৰ ব্যৱহাৰ কেতিয়াৰ পৰা হৈছিল?

ভাৰতত বাহনৰ নম্বৰ প্লেট ব্যৱস্থাৰ আনুষ্ঠানিক আৰম্ভণি হয় ১৯১৪ চনত, যেতিয়া ব্ৰিটিছ শাসনে Indian Motor Vehicles Act, 1914 প্ৰৱৰ্তন কৰে। অৱশ্যে ইয়াৰ আগতেই বিভিন্ন প্ৰদেশত বাহন সন্দৰ্ভত নিজা নিজা আইন আছিল। উদাহৰণস্বৰূপে মুম্বাইত (তেতিয়াৰ বোম্বে) ১৯০১ত, বংগত ১৯০৩, মাদ্ৰাজত ১৯০৭, পঞ্জাবত ১৯০৭ত বাহন সন্দৰ্ভত এই ব্যৱস্থা কৰা হয়। এই সকলো আঞ্চলিক আইনক ১৯১৪ চনত একক ৰাষ্ট্ৰীয় আইনৰ অধীনলৈ অনা হয়।

১৯৩৯ চনৰ মটৰ-যান আইন

বাহনৰ সংখ্যা বৃদ্ধি পোৱাৰ লগে লগে ১৯১৪ চনৰ আইনৰ সংশোধনী ঘটাই ১৯৩৯ চনত নতুন Motor Vehicles Act প্ৰৱৰ্তন কৰা হয়। এই আইন অনুসৰি ভাৰতত নম্বৰ প্লেটৰ এক নতুন বিন্যাস আৰম্ভ হয়। সুদীৰ্ঘ সময়ৰ পিছত ১৯৮৮ চনত মটৰ-যান আইন অনুসৰি আধুনিক নম্বৰ প্লেট ব্যৱহাৰৰ ব্যৱস্থা কৰা হয়। বৰ্তমান ভাৰতত ব্যৱহৃত নম্বৰ প্লেটৰ ধৰণ Motor Vehicles Act, 1988 আৰু Central Motor Vehicles Rules, 1989-ৰ অধীনত প্ৰৱৰ্তন কৰা হয়। এই আইনৰ অধীনত নম্বৰ প্লেটত ৰাজ্যিক কোড ব্যৱহাৰৰ প্ৰচলন আৰম্ভ হয়। আনহাতে ২০২১ত কেন্দ্ৰীয় চৰকাৰে BH Series (Bharat Series) নম্বৰ প্লেট আৰম্ভ কৰে। BH Seriesৰ সুবিধাসমূহ হৈছে-সমগ্ৰ ভাৰততে বৈধ,আন ৰাজ্যলৈ গ’লে পুনৰ গাড়ী পঞ্জীয়ন কৰাৰ প্ৰয়োজন নহয়, বাহন বিক্ৰী কৰাটো সহজ, আন্তঃৰাজ্যিক স্থানান্তৰত সময় আৰু খৰচ কমকৈ হয়।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ