চন্দ্ৰ অভিযানেই হওক বা মহাকাশ ষ্টেচনত মাহৰ পাছত মাহ কটোৱাই হওক৷ পৃথিৱীৰ বাহিৰলৈ গৈ মহাশূন্যৰ অনন্ত ৰহস্যৰ সন্ধান কৰে নভোশ্চৰসকলে৷ এই পেছাত পদে পদেই আছে বিপদ৷ কিন্তু এডভেঞ্চাৰৰ নিচা আৰু মহাকাশ গৱেষণাৰ নতুন দীগন্ত খুলিবলৈকে বাৰে বাৰে পৃথিৱীৰ বাহিৰত ভৰি ৰাখে নভোশ্চৰসকলে৷
মহাকাশচাৰীৰ পেছা বাচি লোৱা কিন্তু মুঠেও সহজ নহয়৷ উচ্চশিক্ষিত নহ’লে বিশেষকৈ মহাকাশ বিজ্ঞান সম্পৰ্কে সম্যক জ্ঞান নাথাকিলে এই কাম কৰিব নোৱাৰি৷ ইয়াৰোপৰি মহাকাশচাৰী হ’বলৈ গ’লে ল’ব লাগে বিশেষ প্ৰশিক্ষণ৷ কিন্তু এই নভোশ্চৰসকলৰ বেতন কিমান? এই বিষয়টোক লৈ সাধাৰণ জনতাৰ মাজত কৌতূহলৰ শেষ নাই৷ বিশ্বৰ পৃথক পৃথক মহাকাশ গৱেষণাকেন্দ্ৰই এই পেছাত যুক্তসকলৰবাবে পৃথক পৃথক বেতনৰ কাঠামো ঠিক কৰিছে৷ এইয়া পৰিবৰ্তনশীলো৷
কি মিছনৰ নভোশ্চৰসকল গৈছে তাৰ ওপৰত নিৰ্ভৰ কৰে এজন মহাকাশচাৰীৰ দৰমহা৷ ইয়াৰোপৰি নভোশ্চৰসকলৰ অভিজ্ঞতাও এই ক্ষেত্ৰত গুৰুত্বপূৰ্ণ৷ অভিজ্ঞতাসম্পন্নসকলৰ দৰমহা বহু বেছি৷ এই তুলনাত নতুন নভোশ্চৰসকলৰ দৰমহা তেওঁলোকতকৈ কম৷
মহাশূন্যত নভোশ্চৰ পঠিওৱাৰ ক্ষেত্ৰত প্ৰথম স্থানত আছে আমেৰিকাৰ মহাকাশ গৱেষণা কেন্দ্ৰ নাছা৷ ইয়াৰ মহাকাশচাৰীসকলৰ দৰমহাৰ সবিশেষ তথ্য তেওঁলোকৰ ৱেবচাইটতেই উল্লেখ আছে৷ আমেৰিকাৰ আইন অনুসৰি অসামৰিক চৰকাৰী কৰ্মীৰ জেনেৰেল ছিডিউলৰ ফেডাৰেল কাঠামো অনুসৰি তেওঁলোকে দৰমহা লাভ কৰে৷
সংবাদ সংস্থা স্পেছ ইমপালছে প্ৰকাশ কৰা খবৰ অনুসৰি জিএছৰ ১২ আৰু ১৩ ৰেংক অনুসৰি আমেৰিকাৰ মহাকাশচাৰীয়ে দৰমহা লাভ কৰে৷ অৰ্থাৎ এবছৰত এজন নভোশ্চৰে প্ৰায় ৮৪হাজাৰ ডলাৰৰ পৰা ১ লাখ ১৫ হাজাৰ ডলাৰ দৰমহা লাভ কৰে৷ ভাৰতীয় মুদ্ৰাত এই ধন প্ৰায় ৭১লাখৰ পৰা ৯৭লাখ টকা৷ নাছাৰ ৱেবচাইটত লগতে উল্লেখ আছে যে ২০২৪ চনত মহাকাশচাৰীয়ে ১লাখ ৫২ হাজাৰ ২৫৮ ডলাৰ দৰমহা পাইছে৷ ভাৰতীয় মুদ্ৰাত এই ধনৰ পৰিমান প্ৰায় ১ কোটি ২৮লাখ টকা৷
নাছাৰ সামৰিক বাহিনী আৰু নভোশ্চৰসকলৰ দৰমহাৰ কাঠামো প্ৰায় একেই৷ কাৰণ সামৰিক বাহিনীত চাকৰি বজায় ৰাখিয়েই মহাকাশচাৰী হিচাপে তেওঁলোকে কাম কৰিব পাৰে৷ আমেৰিকাৰ মহাকাশ গৱেষণা সংস্থাই জনাইছে যে সামৰিক বাহিনীৰ পৰা নভোশ্চৰসকলৰ দৰমহা, ছুটিসহ অন্যান্য যাৱতীয় সুযোগ সুবিধাৰ বাবে তেওঁলোকে জনছন স্পেছ চেণ্টাৰলৈ যাব লাগে৷
সামৰিক বাহিনীৰ পৰা অহা নভোশ্চৰসকলে সাধাৰণতে নাছাত অফিচাৰ ৰেংকৰ চাকৰি পায়৷ নিয়োগৰ পূৰ্বে তেওঁলোকৰ কামৰ অভিজ্ঞতা বা কিমান ঘণ্টা বিমান বা হেলিকপ্টাৰ উৰুৱাইছে সেই পৰীক্ষা কৰি লয় আমেৰিকাৰ মহাকাশ গৱেষণা সংস্থাই৷ স্পেছ ইমপালছৰ প্ৰতিবেদন অনুসৰি মহাকাশচাৰী মেথু ডেমিনিকে ফেডাৰেলৰ দৰমহাৰ নিৰিখ অনুসৰি প্ৰতিমাহে ৮,১৯৯ ডলাৰ লাভ কৰে৷ ২০২০ চনৰ আমেৰিকাৰ নৌসেনাৰ কমাণ্ডাৰ পদত আছিল মেথু৷
অন্যহাতে মহাকাশচাৰী ৰাজা চেৰিয়ে প্ৰতিমাহে দৰমহা পায় ১০, ৬৩৮.৯০ ডলাৰ৷ যাৰ মাজত আছে বীমা আৰু পেনচনৰো সুবিধা৷ ২০২৩ চনত আমেৰিকাৰ বিমানবাহিনীৰ উচ্চপদৰ বিষয়া আছিল ৰাজা চেৰি৷ নাছাৰ ভাৰতীয় বংশোদ্ভূত মহাকাশচাৰী সুনীতা উইলিয়ামচ৷ আমেৰিকাৰ নৌবাহিনীৰ তেওঁ অৱসৰপ্ৰাপ্ত কেপ্টেইন৷ নাছাৰ ২০২৪ চনৰ দৰমহা নিৰিখ অনুসৰি তেওঁ দৰমহা লাভ কৰে৷ দৰমহাৰ ওপৰিও তেওঁলোকৰ থাকে প্ৰতিকী ভ্ৰমণ ভাট্টা৷ সেই ধনৰ পৰিমান এতিয়াও অৱশ্যে জানিব পৰা হোৱা নাই৷ মহাকাশ মিছনৰ বাবে তেওঁলোকে পৃথককৈ কোনো বোনাছ নাপায়৷
ইউৰোপিয়ান স্পেছ এজেন্সি বা ইএছএ মহাকাশচাৰীসকলৰ দৰমহাৰ নিৰিখ কিন্তু নাছাৰ দৰে নহয়৷ ইয়াৰ নভোশ্চৰসকলে আমেৰিকাৰ নাছাতকৈ কম দৰমহা লাভ কৰে৷ স্পেছ ইমপালছৰ প্ৰতিবেদন মতে ইএছঅৰ নতুন মহাকাশচাৰীসকলে মাহে ৫,০১৯.৪৫ পাউণ্ড দৰমহা লাভ কৰে৷ ফ্ৰান্সৰ বিজ্ঞানীৰ বাবে এই দৰমহাৰ পৰিমান কিছু বেছি৷ ফ্ৰান্সৰ নভোশ্চৰসকলে পায় ৬,২৫১.৫১ ইউৰো৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
