ইউক্ৰেইন আক্ৰমণ কৰি যুদ্ধবাজ ৰাছিয়াই যেন নিজৰেই বিপদ মাতি আনিছে৷ আক্ৰমণ আৰম্ভ কৰি ৰাছিয়া বিশ্ব সম্প্ৰদায়ৰ পৰা বাণিজ্যিক আৰু অৰ্থনৈতিক নিষেধাজ্ঞাৰ সন্মুখীন হোৱাই নহয় ভবামতে নিৰ্দিষ্ট সময়ত ইউক্ৰেইনৰ ৰাজধানী কীয়েভো দখল কৰিবলৈ সক্ষম হোৱা নাই৷
ইউক্ৰেইনৰ প্ৰৱল প্ৰত্যাক্ৰমণ তথা প্ৰতিৰোধৰ সন্মুখীন হোৱা ৰাছিয়াই মাজে সময়ে যেন উৱাদিহ হেৰুওৱাই পেলাইছে৷ যাৰফলত ইউক্ৰেইনৰ বহু চহৰক ধ্বংসস্তূপত পৰিণত কৰিলেও ৪০ টাৰো অধিক দিন আতিক্ৰম কৰিও যুদ্ধ সমাপ্ত কৰিব পৰা নাই ৰাছিয়াই৷
ইফালে ইয়াৰ মাজতে ইউক্ৰেইনে দাবী কৰিছে যে তেওঁলোকৰ প্ৰত্যাক্ৰমণত আক্ৰমণকাৰী ৰাছিয়াৰ অতি কমেও ১৯ হাজাৰ সেনাৰ মৃত্যু হৈছে৷
লগতে পঢ়ক ভাৰতৰ প্ৰশংসাত গদগদ হৈ কি ক’লে পাক প্ৰধানমন্ত্ৰী ইমৰাণ খানে?
‘যুদ্ধত কাৰো বিজয় নহয়, কেৱল মানুহৰ মৃত্যু’ হয় বুলি যুদ্ধৰ আৰম্ভণিৰে পৰা কৈ অহা ইউক্ৰেইনে শনিবাৰে ঘোষণা কৰিছে যে এই পৰ্যন্ত ৰাছিয়াৰ ১৯ হাজাৰ সৈন্যৰ মৃত্যু হৈছে৷ ইউক্ৰেইনৰ মতে প্ৰায় ৭ হাজাৰো অধিক ৰুছ সেনাৰ মৃতদেহ ইউক্ৰেইনৰ মৰ্গতে আছে৷
ইফালে ক্ৰেমলিনেই এই যুদ্ধত ৰাছিয়াৰ বিস্তৰ ক্ষতি হোৱা বুলি স্বীকাৰো কৰিছে৷ শনিবাৰে ক্ৰেমলিনৰ মুখপাত্ৰ দিমিত্ৰি পেছক’ভে ইউক্ৰেইনৰ দাবী অস্বীকাৰ নকৰি কয় যে এই যুদ্ধত তেওঁৰ দেশৰ সেনাৰ বিপুল ক্ষতি হৈছে৷
ইফালে এই যুদ্ধত কিমান ইউক্ৰেইনৰ সাধাৰণ লোকে মৃত্যু মুখত পৰিছে সেয়া এতিয়াও স্পষ্ট হোৱা নাই৷ ৰাষ্ট্ৰসংঘই প্ৰকাশ কৰা মতে ৰাছিয়াৰ আক্ৰমণৰ ফলত ইউক্ৰেইনত অতি কমেও ২ হাজাৰ সাধাৰণ লোকৰ মৃত্যু হৈছে৷ ইয়াৰ মাজত বহু শিশুও আছে৷
লগতে পঢ়ক গুৱাহাটীৰ ‘ৰঙালী’ত প্ৰাক-বিহু উদযাপন কৰিব বলিউদৰ অভিনেত্ৰী শ্ৰুতি হাছানে
ইফালে ইউক্ৰেইনৰ ৰাষ্ট্ৰপতি ভ’ল’দিমিৰ জেলেনস্কিয়ে ৰাষ্ট্ৰসংঘৰ এই তথ্যতকৈও অধিক ইউক্ৰেইনৰ সাধাৰণ লোক ৰাছিয়াৰ আক্ৰমণত নিহত হোৱা বুলি দাবী কৰিছে৷
ইফালে বুচাৰত ৰাছিয়াই গণহত্যা সংঘটিত কৰা বুলিও বিশ্ব সংবাদ মাধ্যমত প্ৰকাশ পাইছে৷ ইয়াৰ পিছতে যোৱা শুকুৰবাৰে ৰাষ্ট্ৰসংঘই ৰাছিয়াক ৰাষ্ট্ৰসংঘৰ মানৱ অধিকাৰ পৰিষদৰ পৰা নিলম্বন কৰিছে৷
ইউক্ৰেইনৰ ৰাষ্ট্ৰপতি দপ্তৰৰ উপদেষ্টা অ’লেক্সি আৰিষ্টোভিচেও শনিবাৰে প্ৰকাশ কৰিছে যে ৰাছিয়াৰ ১৯ হাজাৰ সেনাৰ মৃত্যু হৈছে আৰু তিনি হাজাৰ সেনাৰ মৃতদেহ ৰাছিয়ালৈ প্ৰেৰণ কৰাৰ বাবে চেষ্টা কৰি থকা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
