এক চাঞ্চল্যকৰ খবৰে সংবাদ মাধ্যমৰ শিৰোমান দখল কৰিছে৷ এগৰাকী মহিলাক হত্যা কৰাৰ অপৰাধত স্বামীয়ে ১০ বছৰৰ কাৰাবাসৰ ৰায় প্ৰদান কৰাৰ পাছতে মহিলাগৰাকী জীৱন্ত অৱস্থাত উদ্ধাৰ হৈছে৷ ইয়াৰ পিছতে স্তম্ভিত হৈ পৰিছে স্থানীয় ৰাইজৰ লগতে আৰক্ষী প্ৰশাসনো৷
ঘটনাটো উত্তৰ প্ৰদেশৰ বহৰইশৰ জামাপুৰৰ৷ ঘটনাৰ বিৱৰণীৰ মতে জামাপুৰৰ নিৱাসী কান্ধাইৰ নামৰ লোকজনৰ সৈতে ৰামৱতী নামৰ মহিলাগৰাকীৰ বিবাহ সম্পন্ন হৈছিল৷ বিয়াৰ পাছত সংসাৰ ঠিকে চলি থাকিলেও ২০০৯ চনত হঠাতে পত্নী ৰামৱতী ৰহস্যজনকভাৱে নিৰুদ্দেশ হয়৷
ৰামৱতীয়ে নিৰুদ্দেশ হোৱাৰ পাছতে পৰিয়ালৰ লোকে পত্নীৰ নিৰুদ্দেশৰ বাবে স্বামী কান্ধাইৰ বিৰুদ্ধে আৰক্ষীৰ ওচৰত অপহৰণৰ গোচৰ ৰুজু কৰে৷ উক্ত গোচৰটো আদালতত বিচাৰ চলে আৰু আদালতে কান্ধাইয়ে পত্নীক হত্যা কৰা বুলি ৰায় দি ২০১৭ চনত ১০ বছৰৰ কাৰাদণ্ড বিহে৷
লগতে পঢ়ক ৰাজ্যবাসীৰ বাবে প্ৰেৰণাদায়ক খবৰ! কমনৱেলথত স্বৰ্ণ জয়ী নয়নমণি শইকীয়াৰ পদন্নোতি
নিম্ন আদালতৰ শাস্তি ৰায় প্ৰদানৰ পিছতে কান্ধাইক জে’ললৈ প্ৰেৰণ কৰা হয়৷ ইয়াৰ পিছতে নিম্ন আদালতৰ উক্ত ৰায়ৰ বিৰুদ্ধে কান্ধাইয়ে উচ্চ ন্যায়ালয়ত আবেদন দাখিল কৰি প্ৰায় ৬ মাহৰ পাছতে জামিন লাভ কৰে৷
ইফালে যোৱা শনিবাৰে হঠাতে কান্ধাইৰ পত্নী ৰামৱতীক সুশৰীৰেৰে প্ৰত্যক্ষ কৰাৰ পাছতে সমগ্ৰ অঞ্চলজুৰি চাঞ্চল্যৰ সৃষ্টি হয়৷ জানিব পৰা মতে কান্ধাইৰ এজন আত্মীয়ই ৰামৱতীক ভগ্নীৰ ঘৰত প্ৰত্যক্ষ কৰে৷ লোকজনে ৰামৱতীক প্ৰত্যক্ষ কৰাৰ লগে লগে কান্ধাইক এই বিষয়ে অৱগত কৰে৷
লগতে পঢ়ক মক্কাত প্ৰৱেশ ভাৰতীয় অমুছলমান ইউটিউবাৰ! মৃত্যুদণ্ড দিয়াৰ দাবী ইউটিউবাৰগৰাকীক?
ইয়াৰ পাছতে কান্ধাইয়ে ততাতৈয়াকৈ আত্মীয়ৰ সৈতে আৰক্ষীক এই বিষয়ে অৱগত কৰে আৰু পিছত ৰামগাঁৱৰ SHO সঞ্জয় সিঙৰ নেতৃত্বত মহিলা আৰক্ষীসহ এটা আৰক্ষী দলে ৰামৱতীক প্ৰত্যক্ষ কৰা স্থানত উপস্থিত হয়৷
আৰক্ষী বিষয়াগৰাকীয়ে জানিবলৈ দিয়ে যে ৰামৱতীক ৱান ষ্টপ চেণ্টাৰত ৰখা হৈছে য’ত হিংসাত্মক পৰিস্থিতিত আক্ৰান্ত মহিলাসকলক আশ্ৰয় দিয়া হয়। আৰক্ষীয়ে ৰামৱতীক আদালতত হাজিৰ কৰোৱায়৷
এই ঘটনাটোৱে প্ৰমাণ কৰিছে যে দেশত বহু নিৰপৰাধী লোকে ভুৱা গোচৰত অভিযুক্ত হৈ ন্যায়ৰ নামত অন্যায়ৰহে বলি হৈছে৷ অৰ্থাৎ নিৰপৰাধী লোকে ভুৱা গোচৰত শাস্তি ভুগি অহাটোকে যেন প্ৰমাণ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
