মাত্ৰ ২৬ বছৰ বয়সতে কোটি কোটি টকাৰ ব্যৱসায় গঢ়ি তোলা ভাৰতীয় যুৱ উদ্যোগপতিসকলৰ তালিকাত এতিয়া জিলিকিছে সিদ্ধাৰ্থ সাক্সেনা নামৰ এজন যুৱক। IIT কানপুৰৰ এইগৰাকী প্ৰাক্তন শিক্ষাৰ্থীয়ে মাত্ৰ এদিনতেই প্ৰায় ৮ মিলিয়ন আমেৰিকান ডলাৰ (প্ৰায় ৭৭ কোটি টকা) উপাৰ্জন কৰি দেশজুৰি চৰ্চাৰ কেন্দ্ৰবিন্দু হৈ পৰিছে।
মাত্ৰ ২৬ বছৰ বয়সতে কৃত্ৰিম বুদ্ধিমত্তা (AI)ৰ ক্ষেত্ৰত এক সুকীয়া পৰিচয় গঢ়ি তোলা সিদ্ধাৰ্থৰ এই সাফল্যই বহু যুৱক-যুৱতীক নতুন অনুপ্ৰেৰণা যোগাইছে।
ৰাজস্থানৰ আলৱৰৰ পৰা IIT কানপুৰলৈ
সিদ্ধাৰ্থ ছাক্সেনাৰ ঘৰ ৰাজস্থানৰ আলৱৰত। তেওঁ IIT কানপুৰৰ পৰা কম্পিউটাৰ ছায়েন্স এণ্ড ইঞ্জিনিয়াৰিঙত বি.টেক ডিগ্ৰী লাভ কৰে। অধ্যয়ন সমাপ্ত কৰাৰ পাছত তেওঁ বিভিন্ন আন্তঃৰাষ্ট্ৰীয় প্ৰযুক্তি প্ৰতিষ্ঠানত গৱেষণা আৰু উন্নয়ন (R&D) বিভাগত কাম কৰি মূল্যৱান অভিজ্ঞতা অৰ্জন কৰে। IITত অধ্যয়ন কালতেই তেওঁৰ কৃত্ৰিম বুদ্ধিমত্তা (AI) আৰু মেচিন লাৰ্নিঙৰ প্ৰতি গভীৰ আগ্ৰহ জন্মে, যিয়ে পিছলৈ তেওঁৰ কেৰিয়াৰৰ দিশ সলনি কৰি দিয়ে।
দুজন বন্ধুৰ সৈতে আৰম্ভ কৰিলে ‘Merlin’
২০২২ চনত সিদ্ধাৰ্থে IIT কানপুৰৰ সহপাঠী প্ৰত্যুষ ৰায় আৰু চিৰসেন্দু সৰকাৰৰ সৈতে মিলি ‘Merlin’ নামৰ এটা AIভিত্তিক ষ্টাৰ্টআপ আৰম্ভ কৰে। Merlin হৈছে এটা AI-পাৱাৰ্ড Chrome Extension, যিয়ে ব্যৱহাৰকাৰীৰ উৎপাদনশীলতা (Productivity) বহুগুণ বৃদ্ধি কৰাত সহায় কৰে। বৰ্তমান এই AI টুলটো ৱেব, ডেস্কটপ আৰু মোবাইল—তিনিওটা প্লেটফৰ্মতেই ব্যৱহাৰ কৰিব পাৰি। বিশেষকৈ শিক্ষাৰ্থী, কণ্টেণ্ট ক্ৰিয়েটৰ, মাৰ্কেটাৰ আৰু বিভিন্ন পেছাদাৰী লোকৰ মাজত Merlin যথেষ্ট জনপ্ৰিয়। বৰ্তমান এই ষ্টাৰ্টআপটোৰ মূল্য প্ৰায় ৪১৫ কোটি টকা বুলি অনুমান কৰা হৈছে। Merlinৰ সফলতাৰ পাছত সিদ্ধাৰ্থে ‘Thine’ নামৰ আন এটা AI ষ্টাৰ্টআপো আৰম্ভ কৰে। এই প্ৰতিষ্ঠানটোৰ মুখ্য কাৰ্যালয় পেলো অল্টো, কেলিফৰ্ণিয়াত অৱস্থিত।
Forbes 30 Under 30 Asiaত স্থান
সিদ্ধাৰ্থ ছাক্সেনা, প্ৰত্যুষ ৰায় আৰু চিৰসেন্দু সৰকাৰ—Merlinৰ এই তিনিওজন সহ-প্ৰতিষ্ঠাপকক Forbes Asia-ৰ ’30 Under 30 Asia 2024′ তালিকাত অন্তৰ্ভুক্ত কৰা হৈছিল। এই সন্মানে তেওঁলোকৰ উদ্ভাৱনীমূলক কামক আন্তঃৰাষ্ট্ৰীয় স্বীকৃতি প্ৰদান কৰে। সিদ্ধাৰ্থৰ মতে, IIT কানপুৰৰ কম্পিউটাৰ ছায়েন্স বিভাগত ভৰ্তি লাভ কৰাটো অত্যন্ত কঠিন। তেওঁ দাবী কৰে যে এই পাঠ্যক্ৰমত ভৰ্তি হোৱাটো Harvard বিশ্ববিদ্যালয়ত ভৰ্তি পোৱাতকৈও প্ৰায় ২০ গুণ কঠিন। সেইবাবে ইয়াত সফল হ’বলৈ কঠোৰ পৰিশ্ৰম আৰু একাগ্ৰতা অতি প্ৰয়োজন।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
