অসম লাইভ ২৪ঃ ৬৬ বছৰীয়া এজন বৃদ্ধই কৰা দাবীয়ে বিশ্ব সংবাদ মাধ্যমত বিশেষ চৰ্চা লাভ কৰা দেখা গৈছে৷ পেচাত অংকৰ মাষ্টৰ লোকজনে দাবী কৰিছে যে তেওঁ ১২৯ গৰাকী সন্তানৰ পিতৃ৷ ইয়াৰ পিছতে বিশ্ব সংবাদ মাধ্যমৰ চৰ্চাত আছে ব্যক্তিগৰাকী৷
ব্যক্তিগৰাকীৰ নাম হৈছে ক্লাইভ জ’নছ৷ এই জ’নছ পেচাত অংক মাষ্টৰ আছিল যদিও তেওঁ নিয়মিতভাৱে বীৰ্যদান কৰি সংবাদ মাধ্যমৰ চৰ্চালৈ আহিছে ৷
নিজকে বিশ্বৰ আটাইতকৈ শক্তিশালী বীৰ্যদাতা বুলি দাবী কৰা লোকজনে এতিয়ালৈক ১২৯ গৰাকী সন্তানৰ পিতৃত্ব অৰ্জন কৰা বিপৰীতে অতি শীঘ্ৰেই আৰু ৯ টা সন্তানৰো পিতৃ হ’ব৷ ইংলেণ্ডৰ আগশাৰীৰ সংবাদপত্ৰ ডেইলী মেইলত জ’নছে কৰা এই দাবীৰ পাছতে খলকনি লাগিছে।
জ’নছে বীৰ্যদানহে কৰি আহিছে, ধনৰ বিনিময়ত বীৰ্য বিক্ৰী কৰা নাই বুলিও দাবী কৰিছে জ’নছে৷
ডেইলী মেইলত প্ৰকাশ পোৱা মতে, জ’নছে ফেচবুক যোগে যোগাযোগ কৰি বিনামূলীয়াকৈ এই বীৰ্য দান কৰি আহিছে। যোৱা এক দশক ধৰি এই সেৱাত জড়িত হৈ আছে জ’নছ। তেওঁ এই সেৱা আৰু কেইবাবছৰলৈও কৰি যাবলৈ ইচ্ছুক বুলিও জনাইছে।
জন’ছে মুঠ ১৫০ টাকৈ সন্তানৰ পিতৃ হোৱাৰ লক্ষ্য নিৰ্ধাৰণ কৰি লোৱা বুলি প্ৰকাশ কৰিছে৷ প্ৰতি মাহে তেওঁলৈ বিশ্বৰ কেইবাটাও পৰিয়ালে যোগাযোগ কৰে বুলি তেওঁ সাংবাদিকক জনোৱা জ’নছে যোৱা ৯ বছৰ ধৰি মানুহৰ সুখৰ বাবেই এই কাম কৰি যাবলৈ উদ্গনি লাভ কৰিছে।
আনহাতে, বীৰ্য দানেৰে ১২৯ টা সন্তানৰ পিতৃ হোৱা জ’নছৰ নিজৰ পত্নীৰ ফালৰো তিনিটা সন্তান আছে৷
ইফালে বীৰ্য দানেৰে নিজকে সন্তানহীন দম্পতিসকলক সহায় কৰি অহা বুলি দাবী কৰি আহিলেও ইংলেণ্ডৰ চিকিৎসা সংস্থাসমূহৰ ৰোষত পৰিছে জ’নছে। দেশখনৰ Human Fertilisation and Embryology Authorityএ ক্লাইভ জ’নছলৈ এক জাননী জাৰি কৰিছে।
জাননীখনত কোৱা হৈছে যে বীৰ্যদান কৰাৰ সময়ত যাতে তেওঁ এখন অনুজ্ঞাপ্ৰাপ্ত ক্লিনিকত ভালদৰে পৰীক্ষা কৰি লয়। অন্যথা বীৰ্যদান সম্পৰ্কীয় আইনসমূহ ভংগ কৰাৰ সম্ভাৱনাই দেখা দিব পাৰে। আৰু তেনে হ’লে তেওঁৰ বিৰুদ্ধে আইনী ব্যৱস্থাও লোৱা হ’ব পাৰে!
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ