ৰাছিয়া-ইউক্ৰেইন যুদ্ধত ভাৰতে এতিয়াও ‘ন যযৌ ন তস্থৌ‘ অৱস্থাতে আছে৷ কাৰ পক্ষ ল’ব আৰু কাৰ বিপক্ষে থাকিব তাক স্পষ্টকৈ প্ৰকাশ কৰিব পৰা নাই ভাৰতে৷ আন্তঃৰাষ্ট্ৰীয় নীতি, কূটনৈতিক সম্পৰ্ক আদি সকলোবোৰ দিশৰ প্ৰতি লক্ষ্য ৰাখি ভাৰতে নিপৰেক্ষ স্থিতি গ্ৰহণ কৰিবলৈ বাধ্য হোৱা বুলি প্ৰকাশ কৰিছে৷
ৰাছিয়া-ইউক্ৰেইন যুদ্ধৰ পিছতে ৰাষ্ট্ৰ সংঘৰ সাধাৰণ পৰিষদৰ প্ৰথমখন জৰুৰী বৈঠকত প্ৰথমতে অংশগ্ৰহণ কৰিও ভাৰতে যুদ্ধৰ বিৰুদ্ধে ভোটদান কৰা নাছিল৷
ৰাছিয়াই আক্ৰমণ তীব্ৰতৰ কৰাৰ পিছতে সোমবাৰে পুনৰ ৰাষ্ট্ৰ সংঘৰ সাধাৰণ পৰিষদৰ জৰুৰী বৈঠকৰ আয়োজন কৰা হয়৷
উক্ত বৈঠকৰ পূৰ্বে ইউক্ৰেইনৰ ৰাষ্ট্ৰপতি ভ’ল’দিমিৰ জেলেনস্কিয়ে বিশ্ব সম্প্ৰদায়ৰ লগতে ভাৰতকো শান্তি স্থাপনৰ স্বাৰ্থতে ভাৰতে যুদ্ধৰ বিৰুদ্ধে ভোটদান কৰা উচিত বুলি আহ্বান জনাইছিল৷
কিন্তু ভাৰতে ইউক্ৰেইনৰ ৰাষ্ট্ৰপতিৰ আহ্বানৰ বিপৰীতে প্ৰথমবাৰৰ দৰে এইবাৰো ভোটদানৰ পৰা বিৰত থাকে৷
আমেৰিকা যুক্তৰাষ্ট্ৰৰ পৃষ্ঠপোষকতাত ৰাষ্ট্ৰসংঘৰ নিৰাপত্তা পৰিষদৰ মজিয়াত ৰাছিয়াক গৰিহণা দি প্ৰস্তাৱ উত্থাপন কৰা হৈছিল। উল্লেখ্য যে ইয়াৰ পূৰ্বে ভাৰতে চীন আৰু সংযুক্ত আৰৱ এমিৰেটৰ সৈতে ভোটদানৰ পৰা বিৰত আছিল৷
প্ৰস্তাৱটোত আমেৰিকাই ইউক্ৰেইনৰ বিৰুদ্ধে ৰাছিয়াৰ ‘আক্ৰমণ’ক কঠোৰ ভাষাৰে গৰিহণা দিয়ে। এই প্ৰস্তাৱ গৃহীত কৰাৰ বাবে নিৰাপত্তা পৰিষদৰ মজিয়াত ভোট অনুষ্ঠিত হয় যদিও ভাৰত আৰু চীনে ভোটদানৰ পৰা বিৰত থাকে।
ভোটদানৰ পৰা বিৰত থাকি ভাৰতে কয় যে আলোচনাত বহাই হৈছে বিবাদ নিষ্পত্তি কৰাৰ একমাত্ৰ উপায়।
ইফালে আমেৰিকা যুক্তৰাজ্য, ব্ৰিটেইন আৰু ফ্ৰান্সকে ধৰি নিৰাপত্তা পৰিষদৰ বাকী ১১ খন সদস্য ৰাষ্ট্ৰই এই প্ৰস্তাৱৰ সপক্ষে ভোট দিছিল যদিও ৰাছিয়াই ভেটো দিয়াৰ বাবে প্ৰস্তাৱটো গৃহীত হোৱা নাছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
