আন্তঃৰাষ্ট্ৰীয় যোগ দিৱসঃ সমগ্ৰ বিশ্বৰ ১৭৭খন দেশে পালন কৰিলে যোগ দিৱস 

আন্তঃৰাষ্ট্ৰীয় যোগ দিৱসঃ সমগ্ৰ বিশ্বৰ ১৭৭খন দেশে পালন কৰিলে যোগ দিৱস

আজি দশম আন্তঃৰাষ্ট্ৰীয় যোগ দিৱস (International Yoga Day)। সমগ্ৰ বিশ্বৰ ১৭৭খন দেশে আজি ২১ জুনৰ দিনটো আন্তঃৰাষ্ট্ৰীয় যোগ দিৱস হিচাপে পালন কৰিছে। আজিৰ এই দশম আন্তঃৰাষ্ট্ৰীয় যোগ দিৱসত প্ৰধানমন্ত্ৰী নৰেন্দ্ৰ মোদীয়ে জম্মু-কাশ্মীৰৰ শ্ৰীনগৰত যোগ কাৰ্যসূচীত অংশগ্ৰহণ কৰে। শ্ৰীনগৰৰস্থিত শ্বেৰ-এ-কাশ্মীৰ আন্তঃৰাষ্ট্ৰীয় সন্মিলন কেন্দ্ৰত যোগাভ্যাস কৰে প্ৰধানমন্ত্ৰী গৰাকীয়ে।

এই বছৰ যোগ দিৱসৰ থীম তথা শীৰ্ষক বিষয়বস্তু হৈছে- ‘নিজৰ আৰু সমাজৰ বাবে যোগ’(Yoga for Self and Society)। যোগৰ লাভালাভৰ বিষয়ে মানুহক সজাগ তথা অনুপ্ৰাণিত কৰাটোয়েই হৈছে এইবছৰৰ যোগ দিৱস উদযাপনৰ উদ্দেশ্য।

শ্ৰীনগৰৰ SKICC হলত যোগৰ কাৰ্যসূচীৰ নেতৃত্ব লয় প্ৰধানমন্ত্ৰীয়ে। ৰাষ্ট্ৰীয় যোগ দিৱস উপলক্ষে প্ৰধানমন্ত্ৰী মোডীয়ে কয়, “আমি শ্ৰীনগৰত এই শক্তি অনুভৱ কৰিব পাৰো, যিটো আমি যোগৰ পৰা লাভ কৰো। মই দেশৰ জনতা আৰু বিশ্বৰ প্ৰতিটো কোণত যোগ কৰা লোকসকলক যোগ দিৱসৰ শুভকামনা জ্ঞাপন কৰিছো।’’

লগতে প্ৰধানমন্ত্ৰী মোডীয়ে ইয়াকো কয় যে, ‘‘আন্তঃৰাষ্ট্ৰীয় যোগ দিৱসে ১০ বছৰৰ ঐতিহাসিক যাত্ৰা সম্পূৰ্ণ কৰিলে। ২০১৪ চনত মই ৰাষ্ট্ৰসংঘত আন্তঃৰাষ্ট্ৰীয় যোগ দিৱসৰ প্ৰস্তাৱ ৰাখিছিলো। ভাৰতৰ এই প্ৰস্তাৱক ১৭৭খন দেশে সমৰ্থন কৰিছিল আৰু এয়া এক অভিলেখ আছিল। তেতিয়াৰে পৰা এতিয়ালৈ যোগ দিৱসে নতুন নতুন অভিলেখ সৃষ্টি কৰি আহিছে।’’

https://x.com/narendramodi/status/1803975853115912203

অসমতো আজি পালন কৰা হৈছে আন্তঃৰাষ্ট্ৰীয় যোগ দিৱস। গুৱাহাটী নেহৰু ষ্টেডিয়ামস্থিত দেশভক্ত তৰুণ ৰাম ফুকন ইনড’ৰ ষ্টেডিয়ামত দশম আন্তঃৰাষ্ট্ৰীয় যোগ দিৱস উদযাপন কৰা হৈছে। জিলা প্ৰশাসন, ক্ৰীড়া আৰু যুৱ কল্যাণ সঞ্চালকালয়ৰ সহযোগত ৰাষ্ট্ৰীয় আয়ুস মিছনে আয়োজন কৰিছে এই অনুষ্ঠান। অনুষ্ঠানত মহানগৰীৰ বিভিন্ন প্ৰান্তৰ প্ৰায় দুশ গৰাকী লোকে অংশগ্ৰহণ কৰে। অনুষ্ঠানত মুখ্য অতিথি হিচাপে উপস্থিত থাকে ৰাজ্যপাল গুলাব চান্দ কাটাৰিয়া, বিত্ত মন্ত্ৰী অজন্তা নেওগ আৰু মেয়ৰ মৃগেন শৰণীয়াও।

https://x.com/himantabiswa/status/1803986098395451900

মুখ্যমন্ত্ৰী হিমন্ত বিশ্ব শৰ্মাই আজিৰ এই যোগ দিৱসত তেজপুৰত অনুষ্ঠিত যোগ কাৰ্যসূচীত অংশগ্ৰহণ কৰে। ছচিয়েল মিডিয়াত প্লেটফৰ্মত মুখ্যমন্ত্ৰীগৰাকীয়ে লিখিছে, ‘সুস্থ আৰু স্বাস্থ্যৱান হৈ থকাৰ দিশত ভাৰতৰ যোগ দিৱস পালন সমগ্ৰ বিশ্বৰ বাবে এক অনন্য উপহাৰ।’’

উল্লেখ্য যে, প্ৰথম আন্তৰ্জাতিক যোগ দিৱস ২১ জুন, ২০১৫ চনত পালন কৰা হৈছিল। সমগ্ৰ বিশ্বৰ লোকসকলক এই বিষয়ে সজাগ কৰাৰ বাবে ৰাষ্ট্ৰসংঘত ভাৰতৰ উদ্যোগত এই দিৱস উদযাপন কৰা হয়। দৰাচলতে, ভাৰতৰ প্ৰধানমন্ত্ৰী নৰেন্দ্ৰ মোডীয়ে ২৭ ছেপ্টেম্বৰ, ২০১৪ চনত যোগ দিৱসৰ পদক্ষেপ গ্ৰহণ কৰিছিল। যাৰ পিছত ১৭৭ খন দেশে ২১ জুন,২০১৪ চনত ৰাষ্ট্ৰসংঘত আন্তৰ্জাতিক যোগ দিৱস উদযাপনৰ প্ৰস্তাৱত অনুমোদন জনাইছিল।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ