মধ্যপ্ৰদেশৰ ছাতনা চেন্ট্ৰেল জে’লৰ ভিতৰত আৰম্ভ হোৱা এক প্ৰেমকাহিনী৷ শেষ পৰ্যন্ত বিবাহলৈকে উন্নীত হ’ল এই প্ৰেম৷ এই বিবাহ কোনো সাধাৰণ বিবাহ নহয়৷ আইন ধৰ্ম আৰু সামাজিক প্ৰথাৰ ঊৰ্ধত এই বিবাহ৷ সেয়ে চৰ্চাত আছে বিশেষ বিয়াখন৷ এজন যাৱজ্জীৱন কাৰাদণ্ডৰে দণ্ডিত অপৰাধীৰ সৈতে সেই জে’লৰেই মহিলা জে’ল কৰ্মকৰ্তাৰ আন্তঃধৰ্মীয় বিবাহে এতিয়া দৃষ্টিকাঢ়িছে দেশবাসীৰ৷
ছাতনা চেন্ট্ৰেল জে’লৰ সহকাৰী ছুপাৰিণ্টেন্ডেণ্ট ফিৰোজা খাতুনৰ সৈতে কাৰাগাৰতে পৰিচয় হৈছিল ধৰ্মেন্দ্ৰ নামৰ এজন কয়দীৰ৷ ২০০৭ চনত এজন কাউন্সিলাৰক হত্যা কৰি দেহ পুঁতি পেলোৱাৰ অপৰাধত ধৰ্মেন্দ্ৰই যাৱজ্জীৱন কাৰাদণ্ড ভোগ কৰিছে৷ ফিৰোজাই যেতিয়া জে’লৰ ৱাৰেণ্ট ইনচাৰ্জ হিচাপে সেই জে’লত কৰ্মৰত হৈ আছিল তেতিয়া জে’লৰ বিভিন্ন দপ্তৰৰ কামত তেওঁক সহায় কৰিছিল কয়দী ধৰ্মেন্দ্রই৷ সেই পেছাদাৰী যোগাযোগৰ পৰাই তেওঁলোকৰ মাজত বন্ধুত্ব গঢ়ি উঠে৷ যি সময়ৰ লগে লগে প্ৰেমলৈ ৰূপান্তৰিত হয়৷ জে’লৰ চাৰি দেৱালৰ ভিতৰতে আৰম্ভ হোৱা সেই সম্পৰ্কৰ কথা অৱশ্যে কোনোৱে ঘূণাক্ষৰেও জানিব পৰা নাছিল৷
প্ৰায় ১৪ বছৰ জে’ল খটাৰ পাছত চাৰি বছৰ পূৰ্বে ভাল আচৰণৰ ভিত্তিত মুক্তিলাভ কৰিছে ধৰ্মেন্দ্রই৷ জে’লৰ পৰা বাহিৰলৈ অহাৰ পাছতেই তেওঁলোক দুজনেই সিদ্ধান্ত লয় যে এই সম্পৰ্কক তেওঁলোকে সামাজিক স্বীকৃতি দিব৷ অৱশেষত বিগত ৫ মে’ত ছতৰপুৰ জিলাত বৈদিক ৰীতিনীতি মানি তেওঁলোকৰ বিবাহ সম্পন্ন হয়৷ সামাজিক বিতৰ্ক এৰাবলৈ ধৰ্মেন্দ্ৰই বিবাহৰ নিমন্ত্ৰণপত্ৰত নিজৰ নাম কিছু পৰিবৰ্তনো কৰিছে৷
এই বিবাহক অৱশ্যে ফিৰোজাৰ পৰিয়ালৰ পৰা মানি লোৱা হোৱা নাই৷ মুছলমান পৰিয়ালৰ কোনোৱে এই অনুষ্ঠানত যোগদানো কৰা নাই৷ পৰিয়ালৰ অনুপস্থিতিতেই এক অনন্য মানৱিক দৃষ্টান্ত স্থাপন কৰে বিশ্ব হিন্দু পৰিষদৰ জিলা সহসভাপতি ৰাজবাহাদুৰ মিশ্ৰ আৰু তেওঁৰ পত্নীয়ে৷ তেওঁলোকেই কন্যাদান কৰি বিবাহৰ আনুষ্ঠানিকতা সম্পন্ন কৰে৷ অনুষ্ঠানত বজৰং দলৰ সদস্যসকলো উপস্থিত আছিল৷
ছাতনা চেন্ট্ৰেল জে’লৰ সহকৰ্মী আৰু কাৰাবন্দীসকলেও এই নৱদম্পত্তিক শুভেচ্ছা জনাইছে৷ এসময়ৰ দণ্ডপ্ৰাপ্ত আছামী আৰু জে’লৰ শৃঙ্খলাৰক্ষাকাৰী কৰ্মকৰ্তাৰ এই মিলন সামাজিক আৰু ধৰ্মীয় বিভেদৰ ঊৰ্ধ্বত এক নতুন আখ্যান বুলিও সৰ্বত্ৰতে চৰ্চিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
