শিৱসাগৰ, চৰাইদেউৰ সংহাৰী বানৰ খবৰ ছচিয়েল মিডিয়া, ৰাষ্ট্ৰীয় সংবাদমাধ্যমত সম্প্ৰচাৰ হোৱাৰ পিছতে দেশৰ বিভিন্ন প্ৰান্তৰ পৰা ছচিয়েল মিডিয়া ইনফ্লুৱেঞ্চাৰৰ পৰা আৰম্ভ কৰি বহু বিশিষ্ট ব্যক্তিয়ে অসমৰ বন্যাৰ্তলৈ বিভিন্ন ধৰণৰ সাহায্য আগবঢ়াইছে। ইয়াৰ ভিতৰত দেশৰ বিশিষ্ট উদ্যোগপতিও আছে। দেশৰ বিশিষ্ট জিন্দাল গ্ৰুপেও অসমৰ বন্যাৰ্তলৈ বুজন পৰিমাণৰ ধনৰাশি আগবঢ়াইছে। উল্লেখ্য যে অ পি জিন্দাল গ্ৰুপৰ মূল অধ্যক্ষ সাৱিত্ৰী জিন্দাল। সাৱিত্ৰী জিন্দাল অসমৰে জীয়ৰী, তেওঁৰ জন্ম হৈছিল তিনিচুকীয়াত। মুখ্যমন্ত্ৰীৰ সাহায্য পুঁজিলৈ আজি পুৱাই জিন্দাল গ্ৰুপৰ পৰা আগবঢ়োৱা হয় ৫ কোটি টকাৰ এই আৰ্থিক সাহায্য।
জিন্দাল গ্ৰুপৰ এই সাহায্যৰ পিছতে মুখ্যমন্ত্ৰী হিমন্ত বিশ্ব শৰ্মাই প্ৰাপ্তি স্বীকাৰ কৰি ছচিয়েল মিডিয়াত এইদৰে মন্তব্য প্ৰকাশ কৰে- ‘আজি পুৱাতে অসমৰ সংকটময় এই সময়ত এক মানৱীয় পদক্ষেপৰ বিষয়ে জানিবলৈ পাই ভাল লাগিল। জে এছ ডব্লিউৰ অধ্যক্ষ শ্ৰীসজ্জন জিন্দাল ডাঙৰীয়াই অসমত শেহতীয়া বানপীড়িত লোকসকলৰ সহায়ৰ উদ্দেশ্যে মুখ্যমন্ত্ৰীৰ সাহায্য পুঁজিলৈ ৫ কোটি টকাৰ অনুদান আগবঢ়াইছে। এই মহানুভৱী পদক্ষেপৰ বিষয়ে আমি কোনো আগতীয়া তথ্য পোৱা নাছিলোঁ। আজি পুৱা মুখ্যমন্ত্ৰীৰ সাহায্য পুঁজিৰ বেংক হিচাপ পৰ্যালোচনা কৰাৰ সময়তহে এই অনুদানৰ বিষয়ে অৱগত হওঁ। আমি জানো যে শ্ৰীসজ্জন জিন্দাল ডাঙৰীয়াৰ মাতৃ অ’ পি জিন্দাল গোটৰ মূল অধ্যক্ষ শ্ৰীমতী সাৱিত্ৰী জিন্দাল অসমৰে জীয়ৰী। অসমক প্রয়োজনৰ সময়ত এনে সহায়ৰ বাবে অসমৰ জনসাধাৰণৰ হৈ শ্ৰীসজ্জন জিন্দাল ডাঙৰীয়ালৈ আন্তৰিক কৃতজ্ঞতা জ্ঞাপন কৰিছোঁ। এই অনুদানৰ প্ৰতিটো টকাই বানপীড়িত লোকসকলৰ পুনৰ্বাসন আৰু জীৱন পুনৰ গঢ়ি তোলাৰ কামত ব্যয় কৰা হ’ব।’
ছচিয়েল মিডিয়াত মুখ্যমন্ত্ৰীৰ এই প্ৰাপ্তি স্বীকাৰৰ পিছতে অসমৰ বিভিন্ন প্ৰান্তৰ পৰা অসমবাসী ৰাইজে এই সাহায্যৰ বাবে জিন্দাল গ্ৰুপৰ লগতে সাৱিত্ৰী জিন্দালকো অশেষ ধন্যবাদ জ্ঞাপন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
