অসম লাইভ২৪ঃ শিশুৰ প্রসাধন সামগ্ৰী নিৰ্মাতা সংস্থা জনছন এণ্ড জনছনৰ জনপ্ৰিয়তা বিশ্বজুৰি আছে। শিশুৰ নানান প্রসাধনীয়সমূহৰ ভিতৰত আছে জনছন এণ্ড জনছন বেবী পাউডাৰ। কেলিফোৰ্নিয়াৰ এজন ব্যক্তিয়ে এই প্ৰসাধন সামগ্ৰী নিৰ্মাতা কোম্পানীটোৰ বিৰুদ্ধে অভিযোগ আনিছিল যে এই বেবী পাউডাৰৰ পৰাই মেছোথেলিয়ামত আক্ৰান্ত হৈছে ব্যক্তিজন। মঙলবাৰে কেলিফোৰ্ণিয়াৰ একলেণ্ডৰ ষ্টেট কোৰ্টে তেওঁৰ এই অভিযোগনামাৰ ওপৰত দিছে বিশেষ ৰায়দান।
এমৰয় হাৰ্নানডেজ ভালাডেজ নামৰ ব্যক্তিজনক ১ কোটি ৮৮লাখ ডলাৰ ক্ষতিপুৰণ দিব লাগিব জনছন এণ্ড জনছনে। কেৱল সেয়াই নহয় এই ধৰণৰ টেলকম বেছড যিমান অভিযোগ আছিল এই সকলোবোৰৰেই দ্ৰুত নিষ্পত্তিৰো নিৰ্দেশ দিছে আদালতে। আমেৰিকাত ১০ হাজাৰৰো অধিক অভিযোগ আছে এই সংস্থাৰ বিৰুদ্ধে।
অৱশ্যে জনছন এণ্ড জনছনে তেওঁলোকৰ প্ৰডাক্টৰ পৰা কৰ্কট হোৱাৰ কথা সম্পূৰ্ণৰূপে অস্বীকাৰ কৰিছে। সংস্থাটোৰ দাবী, বিশ্বজুৰি অসংখ্য মানুহৰ ওপৰত তেওঁলোকে পৰীক্ষা কৰিছে। এই প্ৰডাক্ট সম্পূৰ্ণ সুৰক্ষিত হোৱাৰ লগতে এছবেষ্ট মুক্ত প্ৰডাক্ট। শুনানিৰ সময়ত তেওঁলোকৰ বিৰুদ্ধে উঠা অভিযোগৰ সপক্ষে দিয়া প্ৰমাণৰ বিৰুদ্ধে আৱেদনো জনোৱাৰ কথা উল্লেখ কৰিছে জনছন এণ্ড জনছন কোম্পানীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
