সপ্তম দিনাও ইউক্ৰেইনৰ ওপৰত আক্ৰমণ অব্যাহত ৰাখিছে যুদ্ধবাজ ৰাছিয়াই৷ বিশ্ব সম্প্ৰদায়ৰ আহ্বান, ভাবুকি, অৰ্থনৈতিক প্ৰতিবন্ধকতা আদি সকলোবোৰ কেৰেপ নকৰি ৰাছিয়াই ইউক্ৰেইনৰ ওপৰত আক্ৰমণ অব্যাহত ৰাখিছে৷
ইয়াৰ মাজতে দুয়োপক্ষৰ মাজত আলোচনাও আৰম্ভ কৰা হৈছে৷ ইতিমধ্যে দুয়ো দেশৰ প্ৰতিনিধিৰ মাজত অনুষ্ঠিত হোৱা আলোচনা ব্যৰ্থ হৈছে৷ পুনৰ আক্ৰমণকাৰী ৰাছিয়াৰ পৰা আলোচনাৰ প্ৰসংগ উত্থাপন কৰা হৈছে৷ কিন্তু আলোচনাৰ পূৰ্বে ইউক্ৰেইনৰ ৰাষ্ট্ৰপতি ভ’ল’দিমিৰ জেনেলস্কিয়ে কিছু চৰ্ত আৰোপ কৰিছে৷
লগতে পঢ়ক ইউক্ৰেইনত সংকটত ভাৰতীয় শিক্ষাৰ্থী : যুদ্ধবিধ্বস্ত ৰাজধানী কীয়েভ ত্যাগৰ নিৰ্দেশ
যুদ্ধ বিধ্বস্ত ৰাষ্ট্ৰখনৰ ৰাষ্ট্ৰপতি জেলেনস্কিয়ে দাবী কৰিছে যে বোমাবৰ্ষণ বন্ধ হ’লেহে আলোচনা সম্ভৱ হ’ব৷ মংগলবাৰে ৰয়টাৰ আৰু চিএনএনক দিয়া এক যুটীয়া সাক্ষাৎকাৰত ৰাষ্ট্ৰপতি জেলেনস্কিয়ে কয় যে ৰাছিয়াই জনসাধাৰণৰ ওপৰত বোমা বৰ্ষণ বন্ধ কৰিলেহে তেওঁলোকে আলোচনাত বহিব পাৰিব৷
‘‘জনসাধাৰণৰ ওপৰত বোমাবৰ্ষণ বন্ধ কৰক৷ বোমাবৰ্ষণ বন্ধ কৰক তাৰ পিছতহে আলোচনাৰ টেবুলত বহিম৷’’ সাক্ষাৎকাৰটোত ৰাষ্ট্ৰপতি জেলেনস্কিয়ে স্পষ্টভাৱে কয়৷
লগতে পঢ়ক ৰাছিয়া-ইউক্ৰেইনৰ যুদ্ধ : আকৌ ‘ন যযৌ ন তস্থৌ’ অৱস্থা ভাৰতৰ!
ইউক্ৰেনে যোৱা সপ্তাহত ৰাছিয়াৰ সামৰিক আক্ৰমণক প্ৰতিৰোধ কৰাত সহায় কৰিবলৈ NATO সদস্যসকলৰ পৰা অস্ত্ৰ-শস্ত্ৰ লাভ কৰিছে, আনহাতে পশ্চিমীয়া দেশসমূহে ৰাছিয়াৰ অৰ্থনীতিৰ ওপৰত নিষেধাজ্ঞা প্ৰৱৰ্তন কৰিছে।
কিন্তু জেলেনস্কিয়ে আন্তৰ্জাতিক সম্প্ৰদায়ক আৰু অধিক সক্ৰিয়তাৰে ৰাছিয়াৰ বিৰুদ্ধাচৰণ কৰিবলৈ আহ্বান জনাইছে।
‘‘এয়া NATOৰ দেশসমূহক যুদ্ধত চামিল কৰাৰ বিষয়ে নহয়, সঁচা কথাটো হ’ল ৰাছিয়াই দীৰ্ঘদিনীয়া যুদ্ধত সকলোকে চামিল কৰিবলৈ চেষ্টা কৰিছে৷ অৰ্থাৎ এক বৃহৎ যুদ্ধৰ প্ৰস্তুতি চলি আছে’’, জেলেনস্কিয়ে আৰু কয়।
লগতে পঢ়ক ৰাছিয়া-ইউক্ৰেইন যুদ্ধ : আমেৰিকা-ব্ৰিটেইন আদিৰ তুলনাত ৰাছিয়াৰ পাৰমাণৱিক অস্ত্ৰ কিমান?
ৰাছিয়াৰ সৈন্যই ইউক্ৰেইনৰ দখল কৰাৰ পূৰ্বে ৰাজধানী কীয়েভ এৰি যোৱাৰ প্ৰস্তাৱ অস্বীকাৰ কৰা জেলেনস্কিয়ে লগতে কয় যে যদি NATOএ ইউক্ৰেইনৰ সদস্যপদৰ সম্ভাৱনাৰ দুৱাৰ বন্ধ কৰে তেন্তে ইউক্ৰেইনে আইনীভাৱে বাধ্যতামূলক নিৰাপত্তা নিশ্চিতি দাবী কৰিব।
ইফালে NATOসহ পশ্চিমীয়া দেশসমূহক ‘ন’ ফ্লাই জ’ন’ ঘোষণা কৰি ৰাছিয়াৰ যুদ্ধ বিমান উৰণ বন্ধ কৰিবলৈ আহ্বান জনাইছে ৰাষ্ট্ৰপতি জেনেলস্কিয়ে৷ জেলেনস্কিয়ে ৰাছিয়াৰ যুদ্ধ বিমানক প্ৰতিৰোধ কৰাৰ বাবে ই এক কাৰ্যকৰী পদক্ষেপ হ’ব বুলিও মন্তব্য কৰিছে৷
লগতে পঢ়ক যুদ্ধপিপাসু ৰাছিয়াক শিক্ষা ইউক্ৰেইনৰ : ৪.৫ হাজাৰ ৰুছ সৈন্যক হত্যা, শতাধিক টেংক ধ্বংস
উল্লেখ্য যে ৰাছিয়াৰে হোৱা প্ৰথমলানি আলোচনাত ইউক্ৰেইনে তাৎক্ষণিক যুদ্ধ বিৰতিৰ লগতে ৰাছিয়ান সেনাৰ প্ৰত্যাহাৰৰ দাবী কৰিছিল৷ কিন্তু আক্ৰমণকাৰী ৰাছিয়াই দুয়োটা দাবীকেই নস্যাৎ কৰিছে৷
আনহাতে, মংগলবাৰে ৰাছিয়া সংবাদ সংস্থা TAASSএ কয় যে ৰাছিয়াই পৰৱৰ্তী আলোচনাৰ বাবে পৰিকল্পনা কৰিছে৷ অৱশ্যে এই আলোচনা ক’ত আৰু কেতিয়া অনুষ্ঠিত কৰাৰ পৰিকল্পনা কৰা হৈছে সেই বিষয়ে এতিয়াও সবিশেষ প্ৰকাশ হোৱা নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
