অসম লাইভ২৪ঃ তেওঁ কৰ্মঠ মানুহ। এগৰাকী স্পষ্টবাদী নাৰী। অভিনেত্ৰীৰ লগতে এইকেইটা পৰিচয়ো সংপৃক্ত হৈ আছে অভিনেত্ৰী কংগনা ৰাণাৱটৰ সৈতে। প্ৰত্যেক সময়তে কিবা নহয় কিবা এটা বিতৰ্কই খেদিয়েই ফুৰে কংগনাক।
বিগত কেইবাদিন বলীউডত বিশেষভাৱে চৰ্চা হৈ আছে পাঠানৰ কথাই। পাঠানক লৈ পোনতে দাঙি ধৰা প্ৰতিক্ৰিয়াত বিৰক্তিহে প্ৰকাশ কৰিছিল অভিনেত্ৰী কংগনাই। কিন্তু ছবিখন মুক্তিৰ পাছতেই ছবিখন উপভোগ কৰি শেহতীয়াভাৱে কৰা মন্তব্যত ছবিখন ভাল হোৱা বুলি প্ৰকাশ কৰিছে কংগনাই। কংগনাইয়ো দীৰ্ঘ বিৰতিৰ অন্তত দেশবাসীক উপহাৰ দিব এখন বিশেষ ছবি। ইতিমধ্যে কংগনাৰ আহিবলগা ছবিখনৰ শ্বুটিঙৰ কাম সমাপ্ত হৈছে। ‘ইমাৰ্জেন্সি’ ছবিৰ শ্বুটিঙৰ বাবে অসমলৈকো আহিছিল কংগনা।
ছবিখনৰ শ্বুটিঙ শেষ হোৱাৰ পাছতেই নিজা অভিজ্ঞতা সামাজিক মাধ্যমত শ্বেয়াৰ কৰিছে অভিনেত্ৰী কংগনাই। এই ছবিখনৰ বিষয়ে প্ৰকাশ কৰিবলৈ গৈ কংগনাই কেইবাটাও গুৰুত্বপূৰ্ণ কথা উল্লেখ কৰিছে। তেওঁ সামাজিক মাধ্যমত লিখিছে, ‘ছবিৰ শ্বুটিঙত থাকোতে ডেংগুতো আক্ৰান্ত হৈছিলো। প্ৰতি মুহূৰ্ততেই মই চেলেঞ্জ লৈয়েই ভালপাও। ছবিখনৰ বাবেই মই মোৰ মুম্বাইত থকা সম্পত্তিও বন্ধকত দিছো। মোৰ সংগ্ৰাম আজিৰ নহয়। বলীউডত খোজ দিয়াৰে পৰা সংগ্ৰামেই কৰি আছো। মুম্বাইত যেতিয়া ভৰি থৈছিলো তেতিয়া মোৰ হাতত আছিল মাত্ৰ ৫০০ টকা। সেয়ে হেৰুৱাবলৈ মোৰ ভয় নাই। শূন্যত আৰম্ভ কৰা জীৱন হেৰুৱালে আকৌ গঢ়ি লম।’
২০২১ত ইমাৰ্জেন্সি ছবিৰ কথা ঘোষণা কৰিছিল কংগনাই। ছবিখনত ইন্দিৰা গান্ধীৰ চৰিত্ৰত অভিনয় কৰিছে কংগনাই। ছবিখনত গুৰুত্বপূৰ্ণ চৰিত্ৰত অভিনয় কৰিছে অনুপম খেৰ, শ্ৰেয়ছ তলপড়, মহিমা চৌধুৰী, মিলিন্দ চুমনে। চলিত বৰ্ষতেই মুক্তিলাভ কৰিব কংগনাৰ ছবিয়েও।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
