ক্ৰমাৎ ৰোমাঞ্চকৰ হৈ উঠিছে IPLৰ ১৭ সংখ্যক সংস্কৰণ। প্ৰতিটো দলে তুমুল যুঁজ দিছে সৰ্ববৃহৎ ক্ৰিকেট লীগৰ খিতাপ জয়ৰ বাবে। ৩১ মাৰ্চ পৰ্যন্ত অনুষ্ঠিত হৈছে আইপিএলৰ ১৩ খন মেচ। ইয়াৰ মাজতে IPLৰ মেচক লৈ এক নতুন সংকটে দেখা দিছে। কলকাতাত অনুষ্ঠিত হ’বলগীয়া আইপিএলৰ মেচত সুৰক্ষা দিয়াত অমান্তি হৈছে পশ্চিম বংগ আৰক্ষী। আৰক্ষীৰ এনে সিদ্ধান্তই এতিয়া বিমোৰত পেলাইছে আয়োজকক।
IPLৰ সূচী অনুসৰি ১৭ এপ্ৰিলত কলকাতাৰ ইডেন গাৰ্ডেনত অনুষ্ঠিত হ’ব এখন মেচ। মেচখনত ৰাজস্থান ৰয়েলছৰ মুখামুখি হ’ব কলকাতা নাইট ৰাইডাৰ্ছ। কিন্তু এই মেচখনক লৈ সৃষ্টি হৈছে অনিশ্চয়তাৰ। তথ্য অনুসৰি পশ্চিম বংগ আৰক্ষীয়ে মেচখনত সুৰক্ষা দিয়াত অমান্তি হৈছে। উক্ত দিনটোতে ৰাম নৱমী উৎসৱ পালন কৰা হ’ব। ৰাম নৱমীৰ বাবে সমগ্ৰ চহৰখনতে সুৰক্ষাত নিয়োজিত হ’ব আৰক্ষী। সেয়েহে আইপিএলৰ মেচখনত সুৰক্ষা প্ৰদানৰ পৰা বিৰত থকাৰ কথা ঘোষণা কৰিছে আৰক্ষীয়ে।
আৰক্ষীয়ে ১৭ এপ্ৰিলৰ মেচখন অন্য দিনত অনুষ্ঠিত কৰাৰ পৰামৰ্শ প্ৰদান কৰিছে। তেনেক্ষেত্ৰত মেচখন আয়োজকৰ বাবে চিন্তাৰ কাৰণ হৈ পৰিছে। ৰাজস্থান ৰয়েলছ আৰু কলকাতা নাইট ৰাইডাৰ্ছৰ মাজত মেচখন ইডেন গাৰ্ডেনতেই অনুষ্ঠিত কৰাটো আয়োজকৰ প্ৰাথমিক সিদ্ধান্ত বুলি সুত্ৰত প্ৰকাশ। গতিকে ১৭ এপ্ৰিলৰ মেচখন এদিন-দুদিন অগা-পিছা হোৱাৰ সম্ভাৱনা আছে।
উল্লেখযোগ্য যে, ৩১ মাৰ্চ পৰ্যন্ত IPLৰ দুখন মেচ খেলি দুয়োখনতে জয়লাভ কৰিছে কলকাতা নাইট ৰাইডাৰ্ছে। দুখন মেচৰ পৰা চাৰি পইণ্ট সংগ্ৰহ কৰি পইণ্ট তালিকাৰ শীৰ্ষত অৱস্থান কৰিছে কলকাতা নাইট ৰাইডাৰ্ছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
