হঠাৎ ভয়ংকৰ হৈ পৰিছে কোকৰাঝাৰৰ পৰিস্থিতি৷ কোকৰাঝাৰত মৰিয়াই মৰিয়াই দুজন ব্যক্তিক হত্যা কৰাৰ পাছতেই অশান্তজৰ্জৰ পৰিস্থিতিয়ে বিৰাজ কৰিছে কোকৰাঝাৰত৷ গৰুচোৰৰ সন্দেহত দুটা ফৈদৰ মাজত হৈছিল মাৰপিটৰ ঘটনা৷ এই ঘটনাতে সোমবাৰে প্ৰাণ হেৰুৱাইছিল চিকনা জৌহলৌ আৰু বিস্মিত নামত দুজন ব্যক্তিয়ে৷ ঘটনাত আঘাতপ্ৰাপ্ত হৈছিল সুনীল মুৰ্মূ৷ লগে লগে সুনীলক হাস্পতালত ভৰ্তি কৰোৱা হৈছিল যদিও গুৰুতৰভাৱে আঘাতপ্ৰাপ্ত সুনীলৰো মঙলবাৰে হাস্পতালতে মৃত্যু ঘটিছে৷
কোকৰাঝাৰৰ এই গণপ্ৰহাৰৰ ঘটনাক লৈ ৰাজপথলৈ ওলাই আহিছে হাজাৰ হাজাৰ লোক৷ ৰাজপথত আৱদ্ধ কৰি ৰখা হৈছে বিটিচি চিফ হাগ্ৰামা মহিলাৰীৰ বাহনো৷ প্ৰতিবাদকাৰীয়ে ইতিমধ্যেই জ্বলাই দিছে আদিবাসী সাংস্কৃতিক ভৱনো৷ উত্তপ্ত জনতাই ভাঙি লণ্ড ভণ্ড কৰিছে কেইবাখনো ব্যৱসায়িক প্ৰতিষ্ঠান৷ শেহতীয়াকৈ পৰিস্থিতি উত্তপ্ত হৈ প্ৰতিবাদকাৰীয়ে আক্ৰমণৰ লক্ষ্য কৰি লৈছে আৰক্ষী থানাও৷
বীৰছা কামাণ্ডো ফৰ্চৰ দুটাকৈ অস্থায়ী কাৰ্যালয়তো অগ্নিসংযোগ কৰিছে প্ৰতিবাদকাৰীয়ে৷ বৰ্তমানলৈকে এই ঘটনাত জড়িত ২৯গৰাকীক আটক কৰিছে আৰক্ষীয়ে৷ পৰিস্থিতি নিয়ন্ত্ৰণৰ বাবে আৰক্ষীয়ে শূন্যলৈ গুলিচালনা কৰাৰো খবৰ আহি পৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
