অসম লাইভ২৪ঃ লোকসভা নিৰ্বাচনক লৈ প্ৰস্তুতি তুংগত এতিয়া প্ৰতিটো ৰাজনৈতিক দলৰে৷ সকলো দলেই ৰাজনৈতিক এজেণ্ডা তৈয়াৰ কৰাত ব্যস্ত হৈ থকাৰ সময়তে ভাইৰেল হৈছে আন এক খবৰ৷ এইবাৰ ৰায়বৰেলীৰ পৰা নিৰ্বাচন নেখেলে ছোনীয়া গান্ধীয়ে৷ ৰায়বৰেলী এৰি কোন সমষ্টিৰ পৰা নিৰ্বাচন খেলিব ছোনীয়াই সেই বিষয়টোৱেই লাভ কৰিছে চৰ্চা৷ বহুতেই দাবী কৰা মতে ছোনীয়া গান্ধীয়ে এইবাৰ তেলেংগানাৰ পৰাহে নিৰ্বাচন খেলিব৷ প্ৰাক্তন প্রধানমন্ত্ৰী ইন্দিৰা গান্ধীয়েও তেলেংগানাৰ পৰা সেই বিশেষ লোকসভা সমষ্টিৰ পৰা নিৰ্বাচনত প্ৰতিদ্বন্দিতা কৰিছিল৷ ছোনীয়া গান্ধীয়েও সেই একেই সমষ্টিৰ পৰা নিৰ্বাচনত প্ৰতিদ্বন্দিতা কৰিব নেকি বুলি উত্থাপিত হোৱা প্ৰশ্নৰ উত্তৰত কংগ্ৰেছ নেতা মধু য়াক্ষী গৌৰাই কয়, ‘আমি এটা বিশেষ প্ৰস্তাৱ লৈছো৷ ছোনীয়া জীয়ে তেলেংগানাৰ পৰা নিৰ্বাচন খেলিব লাগে৷ তেওঁ তেলেংগানাৰ পৰা নিৰ্বাচন খেলিলে দক্ষিণ ভাৰতত কংগ্ৰেছ দলৰ যথেষ্ট লাভ হ’ব৷’
ছোনীয়া গান্ধী বৰ্তমান ৰায়বৰেলীৰ সাংসদ৷ ৰায়বৰেলীৰ আসনখনেই কংগ্ৰেছৰ দুৰ্গ হৈ আছিল৷ বিগত চাৰিটা নিৰ্বাচনত ছোনীয়া গান্ধী এই সমষ্টিৰ পৰা জয়ীও হৈছে৷ তেওঁ প্ৰতিটো নিৰ্বাচনতেই ৫০শতাংশতকৈয়ো অধিক ভোট লাভ কৰিছে৷ এই আসন ঐতিহাসিকভাৱেই কংগ্ৰেছৰ দখলত আছে৷ তেনে এক আসন এৰি হঠাৎ কিয় সমষ্টি সলনি কৰিব বিচাৰিছে ছোনীয়াই?
উল্লেখ্য যে দেশত অনুষ্ঠিত হোৱা ১৭টা লোকসভা নিৰ্বাচনৰ ভিতৰত ৩ টা নিৰ্বাচনৰ বাহিৰে মুঠ ১৪টা নিৰ্বাচনত সেই আসনত কংগ্ৰেছেই জয়ী হৈ আহিছে৷ দেশৰ ৭২ বছৰীয়া নিৰ্বাচনী ইতিহাসত উত্তৰ প্ৰদেশৰ ৰায়বৰেলীৰ আসন ৬৬ বছৰ ধৰি কংগ্ৰেছৰ হাতত আছে৷
ছোনীয়াই নেখেলিলে কোনে খেলিব ৰায়বৰেলীত?
তেলেংগানা কংগ্ৰেছে ছোনীয়া গান্ধীক নিজৰ এলেকাত বিচৰাৰ পাছতেই ৰায়বৰেলীৰ আসনক লৈয়ো প্ৰশ্ন উত্থাপিত হৈছে৷ যদি ছোনীয়া গান্ধীয়ে ৰায়বৰেলীত নিৰ্বাচন নেখেলে তেন্তে সেই বিশেষ সমষ্টিৰ পৰা কোনে নিৰ্বাচন খেলিব? একাংশ ৰাজনৈতিক বিশ্লেষকৰ মতে ছোনীয়াই বিশেষ আসনখন তেওঁৰ কন্যা প্ৰিয়ংকাক এৰি দিব৷ প্ৰিয়ংকা বৰ্তমান কংগ্ৰেছ দলৰ সাধাৰণ সম্পাদকৰ দায়িত্বতো আছে৷ ইফালে প্ৰিয়ংকাৰ জনপ্ৰিয়তাও পূৰ্বতকৈ বৃদ্ধি হৈছে৷ তেনেক্ষেত্ৰত এই আসনৰ বাবে প্ৰিয়ংকাই যোগ্য৷ প্ৰিয়ংকাক উত্তৰপ্ৰদেশ কংগ্ৰেছৰ সভাপতি অজয় ৰায়ে কিছুদিন পূৰ্বে উত্তৰ প্ৰদেশৰ পৰা প্ৰতিদ্বন্দিতা কৰিবলৈ আহ্বানো জনাইছিল তেনেক্ষেত্ৰত সকলো ভাৱিগুণীয়েই ছোনীয়া গান্ধীয়ে বিশেষ সিদ্ধান্তত দেৰী নকৰিব বুলি বহুতে আশা প্ৰকাশো কৰিছে৷
ৰাহুল গান্ধীয়ে ২০১৯ চনৰ লোকসভা নিৰ্বাচনত আমেঠিৰ আসনত পৰাজয়ৰ সন্মুখীন হৈছিল৷ ৰাহুল গান্ধীয়ে আমেঠিৰ সেই আসনৰ পৰা তিনিবাৰ সাংসদো হৈছিল৷ কিন্তু সেই আসনতেই স্মৃতি ইৰাণীৰ হাতত পৰাস্ত হৈছিল ৰাহুল গান্ধী৷ এইবাৰ ৰাহুলে আমেঠিৰ পৰা নিৰ্বাচন খেলিবনে সেই বিষয়টোও উত্থাপিত হৈছে৷ ৰাহুলৰ হাতত অৱশ্যে এতিয়াও এখন আসন আছে৷ ৰাহুল বৰ্তমান কেৰালাৰ ৱায়নাড সমষ্টিৰ সাংসদ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
