কংগ্ৰেছৰ দুৰ্গ খ্যাত ৰায়বলেৰীত প্ৰিয়ংকা, বিজেপিৰ হৈ যুঁজত নামিব কোন ?
লোকসভাৰ কুছকাৱাজ দেখা পোৱা গৈছে সকলো দলতে, সকলো দলেই ব্যস্ত কিদৰে নিৰ্বাচন জয় কৰিব পাৰি তাৰেই ৰণকৌশল ৰচনা কৰাত। কংগ্ৰেছেই হওক বা বিজেপিয়ে, সকলো দলেই প্ৰতিটো সমষ্টিত জয় হোৱাৰ বাবে কৰিছে পৰিকল্পনা।
তাৰেই মাজতে সকলোতকৈ অধিক আসন থকা উত্তৰ প্ৰদেশক লৈ যুঁজ অধিক বৃদ্ধি পোৱা দেখা গৈছে। বিজেপিয়ে ইতিমধ্যে প্ৰথম পৰ্যায়ৰ নিৰ্বাচনক লৈ প্ৰচাৰো আৰম্ভ কৰি দিছে।
আনহাতে কংগ্ৰেছৰো প্ৰচাৰ আৰম্ভ হৈছে। উত্তৰ প্ৰদেশৰ কেইবাখনো আসনৰ প্ৰাৰ্থীৰ নামো সদৰি কৰিছে কংগ্ৰেছে। অৱশ্যে এই ক্ষেত্ৰত এতিয়াও বহু সমষ্টিৰ প্ৰাৰ্থীৰ নাম সদৰি কৰা নাই বিজেপিয়ে। সেয়ে বহুতেই কৈছে বিজেপিয়ে কংগ্ৰেছৰ প্ৰাৰ্থীৰ নাম চাইহে সদৰি কৰিব নিজৰ দলৰ প্ৰাৰ্থীৰ নাম।
পাছে এই সকলোবোৰৰ মাজতে সকলোতকৈ উল্লেখযোগ্য সমষ্টি দুটা হৈছে কংগ্ৰেছৰ দুৰ্গ খ্যাত ৰায়বলেৰী আৰু আমেঠী। এই সন্দৰ্ভতে খবৰ আহিছে যে, ৰায়বৰেলীৰ পৰা কংগ্ৰেছৰ হৈ নিৰ্বাচন খেলিব প্ৰিয়ংকা গান্ধী বাদ্ৰাই। যি সমষ্টিৰ পৰা পূৰ্বে প্ৰিয়ংকাৰ আইতাক আৰু মাকেও নিৰ্বাচন খেলি জয়ী হৈছিল।
আইতাক ইন্দিৰা গান্ধীয়ে ৰায়বৰেলীৰ পৰা দুবাৰ জয়ী হৈছে, তাৰ বিপৰীতে মাতৃ ছোনিয়া গান্ধীয়ে একেটা সমষ্টিৰ পৰা চাৰিবাৰ জয়ী হৈ সাসংদ হৈছিল। তাকো পূৰ্বৰ নিৰ্বাচনত কংগ্ৰেছে যি এখন মাত্ৰ আসনত জয়ী হৈছিল সেয়া আছিল কেৱল ৰায়বলেৰী।
কংগ্ৰেছৰ দুৰ্গত এইবাৰ প্ৰিয়ংকা গান্ধী। সেই সমষ্টিতেই এতিয়া বিজেপিয়ে কাক টিকট দিয়ে সেয়াহে চাব লগা হ’ব। এই ক্ষেত্ৰত সকলোতকৈ চৰ্চিত নাম হৈছে স্মৃতি ইৰাণীৰ।
যদিহে স্মৃতি ইৰাণীয়ে সঁচাকৈ ৰায়বৰেলীত টিকট লাভ কৰে, তেন্তে দুই নাৰী শক্তিৰ যুঁজ চাব লগীয়া হ’ব। দুয়োটা দলৰ দুয়োগৰাকী নেত্ৰীয়ে শক্তিশালী হোৱাৰ বাবে ৰায়বৰেলীত কোনে শেষ হাঁহি মাৰে সেয়া একেবাৰে অন্তিম সময়লৈ বাট চাব লাগিব।
উল্লেখ্য যে, এতিয়ালৈকে বিজেপিৰ কোনো প্ৰাৰ্থীৰে নাম উচ্চাৰণ হোৱা নাই। কংগ্ৰেছৰ ফালৰ পৰাও অনুষ্ঠানিক ভাৱে প্ৰিয়ংকা গান্ধীৰ নাম সদৰি হোৱা নাই, অহা ১৫ এপ্ৰিলৰ পাছত হে আনুষ্ঠানিক ভাৱে নাম সদৰি কৰাৰ সম্ভাৱনা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
