ইয়াৰ পূৰ্বৰ লেখাত আমি শ্বেয়াৰ মাৰ্কেটৰ কিছু মৌলিক বিষয় আলোচনা কৰিছোঁ। এই ব্যৱসায়ৰ বাবে ডিমেট বা ট্ৰেডিং একাউণ্ট অতি জৰুৰী।বেংকত ধন জমা ৰাখিবলৈ যিদৰে চেভিংছ একাউণ্ট থাকিব লাগে, ঠিক তেনেদৰে শ্বেয়াৰ বজাৰত ধন বিনিয়োগ কৰিবলৈ বা ব্যৱসায় কৰিবলৈ ডিমেট একাউণ্টৰ প্ৰয়োজন হয়।
ষ্টক এক্সেঞ্জৰ ট্ৰেডিং মেম্বাৰ অথবা ব্ৰোকিং কোম্পানী সমূহত ডিমেট একাউণ্ট খুলিব পাৰি। আজি কালি বেংকসমূহতো ডিমেট একাউণ্ট খোলাৰ ব্যবস্থা আছে। অৱশ্যে বেংকত ডিমেট একাউণ্ট খুলিলে গ্ৰাহকে, প্ৰশাসনীয় ব্যয় বা একাউণ্টটো চোৱা-চিতা কৰাৰ বাবদ কিছু অতিৰিক্ত ধন আদায় দিবলগীয়া হয়। কিয়নো অধিকাংশ বেংকে অন্য কোনো ব্ৰোকিং কোম্পানীৰ জৰিয়তে শ্বেয়াৰৰ বেচা কিনা কৰে।
আনহাতে কিছু সংখ্যক বেংক ষ্টক এক্সেঞ্জৰ ট্ৰেডিং মেম্বাৰ হিচাপেও পঞ্জীয়নভুক্ত হৈছে। ব্ৰোকিং কোম্পানী আৰু বেংকসমূহে শ্বেয়াৰ বেচা কিনা কৰাৰ বাবদ গ্ৰাহকৰ পৰা কমিছন হিচাপে সামান্য ধন আদায় লয়। সাধাৰণতে এই কমিছন এক শতাংশৰ পৰা পাঁচ শতাংশ পৰ্যন্ত হ’ব পাৰে। অবশ্য দৈনিক বেচা কিনা কৰিলে কমিছনৰ হাৰ ০.০২ শতাংশৰ পৰা সৰ্বাধিক ০.১০ শতাংশও হ’ব পাৰে।ডিমেট একাউণ্ট খোলাৰ সময়ত এই বিষয়সমূহ আলোচনা কৰা উচিত। পৰবৰ্তী সময়ত ডিমেট একাউণ্টৰ অন্য কাৰিকৰী দিশসমূহ আলোচনা কৰা হ’ব।
কিন্তু শ্বেয়াৰ মাৰ্কেটৰ মূল বিষয়টো হ’ল শ্বেয়াৰ কিনা বেচা কৰি লাভ আৰ্জন কৰাতো। ইয়াৰ একেবাৰে সাধাৰণ প্ৰক্ৰিয়াটো হৈছে – এটা শ্বেয়াৰ কম দামত কিনি বেছি দামত বিক্ৰী কৰা। এই ক্ষেত্ৰত সততে মনত ৰাখিব লগীয়া কথাটো হ’ল কিনা বেচা দামৰ পাৰ্থক্য অতি কমেও দুই শতাংশ হ’ব লাগে। কিয়নো শ্বেয়াৰ কিনা বেচা প্ৰক্ৰিয়াত চৰকাৰক আদায় দিবলগীয়া কৰ আৰু ব্ৰোকিং কোম্পানীৰ কমিছনত ০.৫০ শতাংশ ধন ব্যয় হ’ব।
এই খিনিতে এটা উদাহৰণ দিছোঁ। ধৰিলোৱা হৈছে ডিছ টিভি কোম্পানীৰ শ্বেয়াৰ এটা দহ টকাত কিনা হ’ল। তেন্তে এই শ্বেয়াৰটো সৰ্বনিম্ন ১০.২০ টকা দৰত বিক্ৰী কৰিলে এক শতাংশ লাভ পোৱা হয়। অৱশ্যে এয়া এক উদাহৰণ মাত্ৰ। সাধাৰণতে সক্ৰিয় শ্বেয়াৰ সমূহ দিনটোতে ১৫ শতাংশ পৰ্যন্ত বঢ়া টুটা হয়। অৰ্থাৎ শ্বেয়াৰ কিনা বেচা কৰি এদিনত ১৫ শতাংশ লাভ আৰ্জন কৰাতো বৰ টান কাম নহয়।
অৰ্থাৎ শ্বেয়াৰ বজাৰত এক লাখ টকা বিনিয়োগ কৰি প্ৰতি দিনে ১৫,০০০/- টকা উপাৰ্জন কৰিব পাৰি। অৱশ্যে তাৰবাবে ১৫/২০টা কোম্পানীৰ শ্বেয়াৰ বঢ়া টুটা কৰাৰ গতিবিধিত সুক্ষ্ম নজৰ ৰাখিব লাগে।
কিন্তু শ্বেয়াৰ বজাৰত দাম বৃদ্ধি আৰু হ্ৰাসৰ ক্ষেত্ৰত যিকোনো ধৰণৰ ঘটনা ঘটিব পাৰে। কেতিয়াবা শ্বেয়াৰ এটা কিনাৰ পাছত তাৰ দাম হঠাৎ অস্বাভাৱিক হাৰত কমিবলৈ ধৰে। তেতিয়া বিনিয়োগকাৰী শংকিত হয় আৰু কম দামত শ্বেয়াৰ বিক্ৰী কৰে।পৰিণতিত তেওঁৰ লোকচান হয়। তেনে লোকৰ মনত শ্বেয়াৰ বজাৰ সম্পৰ্কত ভ্ৰান্ত ধাৰণা গঢ়ি উঠে।
আনহাতে ইয়াৰ বিপৰীত ঘটনাও ঘটে। শ্বেয়াৰ এটা কিনাৰ পাছত হঠাৎ ইয়াৰ দাম ২০ শতাংশলৈ বৃদ্ধি হয়। তেতিয়া বিনিয়োগকাৰীয়ে সন্তুষ্টি লাভ কৰে। কিন্তু জানিবলগীয়া কথাটো হ’ল শ্বেয়াৰ মাৰ্কেটত এটা শ্বেয়াৰ কিনাৰ পাছত তাৰ দাম বহু কমিলেও যথেষ্ট লাভ আৰ্জন কৰিব পাৰি। তৰবাবেও ইয়াত ব্যৱস্থা আছে। যিটো আন কোনো ব্যৱসায়ত নাই।
শ্বেয়াৰৰ দাম কমিলেও কেনেদৰে লাভ উপাৰ্জন কৰিব পাৰি সেই বিষয়ে পৰবৰ্তী লেখাত আলোচনা কৰা হ’ব। শেষত আমি ক’ব পাৰো যে, শিকি বুজি ল’লে শ্বেয়াৰ বজাৰত লোকচানৰ কোনো সম্ভাৱনা নাথাকে।
– মানৱেন্দ্ৰ কুমাৰ দাস
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
